LUKE 18

Vaihawmtu dihtatlou tehkhinthu

1Huleh ama’n mihingte’n lungke loua a haamtei zing diing uh ahi chih heetna diingin a kawmvah tehkhinthu khat a soi a; 2Khopi khatah Pathian lau lou, huleh mihing zong bangmah a sim lou vaihawmtu khat a um a. 3Huleh hu khosungah meithai khatmah a um a; amahnu chu a kawma hungin, Ka langpa tungah phuba hung laahsah in, ahung chi a. 4Huleh amah chu tomkhat sunga ut sih a; hizongleh a nungin a lungsim in, Pathian lau louin mihing bangmahin sim sih mahleng, 5Hi meithainu’n ahung suhbuai jiahin a phuba ka laahsah diing; huchilou inchu ahung thithena in ahung sutawlkha diing, a chi a. 6Huleh Lalpa’n, Vaihawmtu dihtatlou thusoi chu ngai un. 7A tungvah jaidoh sawt zong mahleh a miteelte, suun leh jana amah koutute phuba chu Pathian in laahsah lou diing ahiai mah? 8Ka hung hilh ahi, ama’n a phuba uh a laahsahpah diing hi. Hizongleh mihing Tapa ahung chiangin leitung ah ginna ahung mu na diai? a chi a.

Pharisaipa leh Siahdongtu tehkhinthu

9Huleh ama’n mi amahuh midihtat a kingaihtuaha midangte musit koite aha kawmah hi tehkhinthu a soi a. 10Mi nih Pathian biahinn ah haamtei diingin a chiahtou va; khat chu Pharisai ahi a, huleh khat chu siahdongtu ahi. 11Pharisaipa chu a dinga, amah chauhin a haamtei a, Pathian, midang negute, tawn dihloute, aangkawmte bang ka hih louha, hi siahdongtu bang zong ka hih louh jiahin na tungah ka kipaah hi. 12Hafta khat sungin an nihvei ka ngawl a, ka neih zousiah sawma khat ka pe veu hi, a chi a. 13Huleh siahdongtu chu gamlataha dingin, vaanlam zong a en ngam sih a, himahleh, Pathian, kei misual tungah zahngai in, chi'n a awm a tuum a. 14Ka hung hilh ahi, khatpen sangin hipa chu siamtang in a inn ah a chiahsuhta hi; ajiahchu mi amah kingailoupi photmah a ngiam diing a; huleh mi amah kingaingiam photmah chu tawisangin a um diing, a chi a.

Jesu’n naupang neute a vangpiahna

15Huleh ana khoih diingin a kawmah naungeehte ahung pui va; hizongleh nungjuite’n a muhun amahuh ana tai uh a. 16Hizongleh Jesu’n amahuh a kou a, Naupang neute ka kawmah hungsah unla, khaam sih un; bang jiahin i chih leh Pathian gam chu huchibangte a ahi. 17Chihtahzetin ka hung hilh ahi, Koi hizongleh Pathian gam naupang neute banga kipaahpih lou chu a sungah a luut hial sih diing, a chi a.

Hauhsatna in kumtuang hinna muh diing a daalna

18Huleh vaihawmtu koiaha in a kawmah, Houtupa hoih, kumtuang hinna ka tan theihna diingin bang ahiai ka bawl diing? chi'n a donga. 19Jesu’n a kawmah, Bang diinga hoih hung chi na hiai? khat chauh chih louh koimah a hoih a um sih, huchu Pathian ahi. 20Thupiahte na he hilou maw? Aangkawm sin, Tual that sin, Gu sin, Heetpihtu tahlouin pangsin, Na pa leh na nu zahbawl in, chihte, a chi a. 21Ama’n, Hite zousiah ka naupan apata ka juih veh ahi, a chi a. 22Jesu’n hi thute a jah tahin, a kawmah, Sil khat na sam nalai hi, na neih zousiah zuah inla mi zawngte kawmah hawmin, huchi'n vaan ah gou na nei diing; huleh hung inla, hung jui in, a chi a. 23Huleh ama’n hi chu a jahin a lungkham mahmah a; ajiahchu mihausa mahmah ahi. 24Huin Jesu’n a lungkham mahmah chih a muh in, Mihausate diingin Pathian gam a luut hahsa hina mai e! 25Ajiahchu mi hausa Pathian gam a a luut sangin sangawngsaau phinbil vanga a luut paisuaah a baih zaw hi, a chi a. 26Huin hu thu jatute’n, Huchi ahihleh koi hutdamin a um zou diai? a chi va. 27Huin ama’n, Mihing diing a sil hithei lou chu Pathian diingin ahi thei hi, a chi a. 28Huin Peter in, En in, kei un bangkim nusiain ka hung jui uhi, a chi a. 29Jesu’n a kawmah, Chihtahzetin ka hung hilh ahi, Pathian gam jiaha a inn aha, a nulepa aha, a unaute aha, a ji aha, a tate aha nusia chu, 30Tu damsung ngeia a leh tampi, huleh hun hung tung diing a kumtuang hinna toh mulou diing koimah a um sih, a chi a.

Jesu’n a sih diing a soilawh thumveina

31Huin ama’n sawmlenihte a puituam a, a kawmvah, Ngai un, Jerusalem khua a chiahtou diing i hi a; mihing Tapa tungtaang thu a zawlneite thugelh zousiah ahung taangtung diing hi. 32Ajiahchu amah hi Jentelte khutah piahkhiah ahi diing a; chiamnuih bawlna’n a zang diing va; zumhuaitaha bawl in chil a siatkhum diing uh; 33Huleh a vo diing va, a that diing uh; huleh ni thum ni’n a thou kiit diing, a chi a. 34Amahun hi silte chu a hesiam sih va; hi thu chu a lahvah phual in a um a, thu kisoite zong a he sih uhi.

Jesu’n mittaw a suhdamna

35Huleh hichi ahung hi a, Jeriko khua a tun kuanin mittaw koi ahakhat lamgeiah khutdohin ana toua. 36Ama’n mipi pai thawm ging a ja a, bangchi thu ahitai chi'n a dong a. 37Amah un, Nazareth Jesu a pai ahi, chi'n a hilh va. 38Huin ama’n, Jesu, nang David Tapa, hung khotuah in, chi’n a kikou a. 39Huleh a masate’n amah chu sip diingin a tai va; hizongleh amah chu, David Tapa, hung khotuah in, chih a kihahkou sema. 40Huin Jesu a dinga, amah chu a kawma hung pui diingin thu a pia a; huleh Bang diinga ahung tunin ana donga, 41Na tungah bang hung bawlsah leng na uh ei? a chi a. Ama’n, Lalpa, muhtheih ka ut hi, a chi a. 42Jesu’n a kawmah, Mutheita in; na ginna in ahung damsah ahi, a chi a. 43Huin thakhat in ahung mutheita a, Pathian paahtawi kawmin amah a juita a; huleh mi zousiah in hi a muh tahun Pathian a phat ta uhi.

Currently Selected:

LUKE 18: SIMTBSI

Highlight

Copy