LUKE 15

Belaam mang tehkhinthu

1Huin siahdongtute leh misualte zousiah a thu ngaikhe diingin Bang diinga ahung zu an va. 2Pharisaite leh lehkhagialtute’n, Hipa’n misualte a kipawlpih a, an bang a neeh khawmpih, chi'n a phunchiah va, 3Huin ama’n hi tehkhinthu a kawmvah a soi a, 4Nanguh laha mi koiaha in belaam za nei henla, a laha khat mangsah leh, sawmkuaah leh kuaahte gamdaia nusia a, a mangpen a muh masiah va hawl lou diing koi na hi viai? 5Huleh a muh kiit tahin kipaahtahin a liangkou ah a pua a, 6Inn a tunin a lawmte leh a innveengte a kou khawma a kawmvah, Hung kipaahpih un; ajiahchu ka belaam mang ka mu kiitta hi, a chi ahi. 7Ka hung hilh ahi, Huchimahbangin midih kisiihna tuan diing nei lou sawmkuaah leh kuaahte tungah sangin misual khat kisiih tungah vaan ah kipaahna a lianzaw diing.

Sum mang tehkhinthu

8Huleh numei koi ahiai dangka sawm nei in khat mangsah leh, thaumei de a, inn phiat a, huleh a muh kiit masiah nguntaha hawl lou diing um? 9Huleh a muh kiit chiangin a lawmte leh a innveengte a koukhawm a, Hung kipaahpih un; ajiahchu ka dangka mansah ka mu kiitta hi, a chi hi. 10Ka hung hilh ahi, Huchimahbangin Pathian angelte ma ah misual kisiih khat tungah kipaahna a um hi.

Tapa taimang tehkhinthu

11Huleh ama’n, Mi koiahakhat in tapa nih a nei a; 12A lahva a naupangzaw pa’n a pa kawmah, Pa, gou kei tan diing teng hung pia in, a chi a. Huchi'n a pa’n a sum chu amahuh a hawmsahta a. 13Huleh ni sawtlou nungin tapa naupangzaw pa’n a tan a bawnin a lakhawm a, khual gamlapi ah a zinta a, huleh hu munah a neih teng pahtattahin a va zang zoupahta hi. 14Huleh a bawna a zatbei veh tahin hu gam ah kial nasatah ahung tungta a; neeh diing ahung kitasamta a. 15Huleh amah chu a chiah a, hu gam mi khat a va beelta a; ama’n amah chu voh an pe diingin lou lamah ana sawl a; 16Huleh vohte neeh bangkhat hawngte a, a gil suhvah a ut mahmah a; koima’n lah bangmah a pe sih hi. 17Huleh ahung halh tahin, Ka pa kawma kiloh suaahte an neeh seeng louh a nei a tamtam u’toh, keilah gilkial a si diing himai veengin! 18Ka thou diing a, ka pa kawmah ka chiah diing a, a kawmah, Pa, vaan a tungah leh nangmah mitmuh in sil ka bawl sualta; 19Na tapa chih taah zong ka hi nawn sih; na kawma kiloh na suaahte khat bangin hung bawl in, ka chi diing, a chi a. 20Huin a thou a, a pa kawmah a hungta a. Huleh gamlapi a, a um laiin a pa’n ana mu a, a hehpih mahmah a, a tai a, a ngawngkawi a, huleh a tawpta a. 21Huin a tapa’n a kawmah, Pa, vaan a tungah leh nangmah mitmuh in sil ka bawl sualta; na tapa chihtaah zong ka hi nawn sih, a chi a. 22Hizongleh a pa’n chu a suaahte kawmah, Pu an hoihpen hung ladoh unla silhsah un; a khut ah zungbuh butsah unla, a keengah keengtophah butsah un. 23Huleh bawngnou thautah hung la unla, that un; huchi'n i ne diing a, kipaahtahin i um diing uh; 24Ajiahchu hi ka tapa chu a si a, ahung hing kiitta hi; a mang a, a kimu kiitta ahi, a chi a. Huchi'n kipaahtah in a umta uhi. 25Huleh a tapa upazaw chu lou ah a um a; Inn ahung tunkuanin sil tumging leh laam thawm a jata a. 26Huin a suaahte khat a kou a, Hite bang ata’i leh? chi'n a dong a. 27Amahpa’n a kawmah, Na naupa ahung tung a, dam leh hoih a, a muh kiit jiahin na pa’n bawngnou thautah a that ahi, a chi a. 28Huin amah chu a lungthahta a, a luut nuamta sih a; Hujiahin a pa chu ahung pawt a, ahung zawl a. 29Huin ama’n a dawng a, a pa kawmah, Ngai in, kum hizaatpi hung vaah inga, khatvei mah zong na thupiah juikhial lou inga; huchi'n zong ka lawmte toh nop ka bawl na diingin keelnou khat zong na hung pe ngei sih. 30Hizongleh hi na tapa, nohchizuahte kawma na sum teng va zang zouvehpa ahung tun tahin amah diingin bawngnou thautah na gohsahpah hi, a chi a. 31Huin a pa’n a kawmah, Tapa, nang ka kawma um zing na hi a, ka neih zousiah zong nanga ahi. 32Kipaahtah leh nuamtah a i um diing hilou maw? ajiahchu hi na naupa a si a, ahung hing kiitta hi; a manga, i mu kiitta hi, a chi a.

Currently Selected:

LUKE 15: SIMTBSI

Highlight

Copy