ZEKARIA 11
11
Meicsimei Zaat nunc ta Swmaanmei
1He Lebanon, nangniw tuang kaikhamv guay laanc pat tho,
nangniw tuang sidar bang guay mai rui raw key khang!
2Latluna kap tho, saipres bang guay—
sidar bang guay pun kan the;
mi katik kahym daihmei bang guay tei swmut kan the!
Latluna kap tho, Bashan tuang mphauh bang—
ngouhdai tei dwang key kan the!
3Dihsinpouc nunc lungh kabiuna kap the;
kaniw tuang hym guay tat kan the!
Kamangliangpui nunc rui rah bammei tei nking o;
kaniw bamv Jordan duithuak ngouh guay tei swmut kan the.
Lauziu Gaenghmei Gaanv Nei
4 Ringhpouc aRacguangc rui akhou sa the, “Dowluai khang nkhwan bammei lauziu nunc tuang gaenghpouc sw o. 5Lauziu kaipouc nunc rui kaniw ta swluai the. Tiki dandi tii mak khe. Kaniw tei rui kazanc tei zuanc lana kumna sa the, ‘Ringhpouc ta thuanc e! Aniu lungcgay the!’ Lauziu gaenghpouc nunc nganvna kaniw lunghsuclou mak khe.”
6(Ringhpouc rui sa the, “Kandih khou lungc bammei gaanv khat na ta sini ai lunghsuclou dat lak khe. Kaniw ta sin bammei nunc baanc khou kaniw ta ai kahak rui tiipatlou puni the. Dihsinpouc nunc tei rui kandih ta sw kasic karouc puni the, kumna ai kaniw ta mi nunc baanc khou tei rui kanptlou dat lak khe.”)
7Lauziu nunc ta tei liumei lev zuanhmei nunc tei rui ata niak dat the, kumna ai hei dowluai kan nimei lauziu nunc tuang gaenghpouc sw the. Ai builwang kanei laa the: Akhat ta ai rui “Puanclianghmei,” khatni baihmei akhat ta “Kariumei” twna phuaklou the. Ai rui lauziu nunc ta tei gaengc the. 8Ata karaengmei lauziu gaenghpouc gaanv thumh ta tei ai lunghpuamc the, kumna ai bw akhat lungc khou kaniw khou rui ntamv the. 9Khoutei ai rui lauziu pang khou tei sa the, “Ai nangniw ta gaenghmeipu sw dat ni tuang hamh the. Theic nimei nunc tei theic kan diu tho. swmutlou nimei nunc ta tei swmutlou kan diu tho. Theic nsaekcloumei nunc tei kaniw khat khat ta swmaan puni.” 10Khoutei “Puanclianghmei” twna kawmei builwang tei laana sw bau the, Ringhpouc rui zaatc nunc khou swlou kanmei latdyng tei kak khang e. 11Heikumna mi nungc tei mi latdyng tei kak kan the. Lauziu pang ta tei liumei lev zuanhmei nunc tei ata zauc bam khwan e, kumna ai rui sw bammei tei rui Ringhpouc rui lat sa bam e twmei kaniw thay the. 12“Nangniw rui atuang taanvphy tii nii e thei tii tho. Kum e tiki tii zih e thei ni tii nangh e,” twna ai rui kaniw khou sa tina kaniw rui ataanvphy daandi paek 30 tii the.#Met 27.9,10 #Met 26.15
13 Ringhpouc rui akhou sa the, “Hei tei Ravkai tuang lanv khuk khou lou tho.” Kumna daandi paek 30 akhang tii biuc the twna tiimei tei Ravkai tuang lanv khuk khou lou kan the. 14Mi tangv “Kariumei” twna kawmei builwang akhat tei ni laana ai rui swbau the, kumna Juda khatni Isarael kariumei tei amaan kan the.
15Mi tangv tei Ringhpouc rui akhou sa the, “Ntaw ni gaeng makmei lauziu gaenghpouc akhat sw dat ro. 16Alauziu nunc ta gaengh khang ai rui alauziu gaenghmeipu akhat lou kan the; tiki sw kasic karouc nimei khou rui alauziu nunc ta kamei nkhavlou mak ge; amaan kanmei ta phu mak ge, nzamhmei ta tigaylou mak ge, theic nsaekcloumei nunc ta sini titu tizangv mak ge. Mi phaan tei kamei gay liang liangmei lauziu ta dowluaina kangianc luap the. 17Mi biuh makmei lauziu gaenghmeipu tei theic puni! Kamei rui kalauziu nunc ta ganclou the. Kapumtan tei rih rui swmutsutlou puni the. Kabaancpwam tei theic key puni the, khatni nzat mik tiat puni the.”
Currently Selected:
ZEKARIA 11: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
