MARK 8

Jisu rui Meic Ching Padeih ta Tituloumei

(Met 15.32-39)

1Mi ganv khou tei meic kangdai guang kaduai dat khwan e. Khoutei kaniw tu khang maek bam ti khou Jisu rui kaziap nunc ta kaw guangna kaniw khou sa the, 2“Meic kangdai ti hei howlouna ai ningngam mak khe. Kalam thu kaniw adaeng khou bam guangmei ntaw zaeng neih thumh tangc the, kumna kaniw tu khang ramh maek khe. 3Ai rui mi kumcna ndaapcna kaniw ta kaniw kai thangc ndiulou ti thei kaniw chaeng khou daapmumanc puni the. Kaniw gaanvsaekc thu duh thangc rui de.”

4“Mi meic kangdai ti hei, titu nggulou khang mi ramvpuk khou hei tabui thangc rui laa nina cho?” twna kaziap nunc rui daw the.

5Khoutei, “Nangniw khou ntyan dwm azuh nai cho?” twna Jisu rui kaniw khou thanv ti khou, “Chanei nai e,” twna kaniw rui daw the.

6Khoutei meic kangdai ta tei kandih khou dungckey khang sa the. Ntyan dwm chanei tei laana thuanckulouna by bak the. Kumna nzanh pat khang kaziap nunc khou tiilou the. Kaniw rui meic nunc khang nzanh pat the. 7Kaniw khou khav lau launa asaekc ni nai khwan e. Kumna mi khou tei ni suaihiamlouna nzanh pat khang kaziap nunc khou sa the. 8Kaniw tu ngguna tu the, kumna tu nsaekcloumei giupaekc chanei laa thau the. 9Hei tei tumei meic ching padeih e. Jisu rui kaniw ta ndiu ganclou kan the. 10Mi tangv kamei kaluak kalat kaziap nunc lev hih tuangcna Dalmanutha ramv khou guang the.

Sw-nchinmei Taanv Taanclou khang Pharisimei rui Samei

(Met 16.1-4)

11Khoutei Pharisimei nunc patna Jisu ta agi thau the. Kata nchanvna tingkauh thangc rui sw-nchinpui taanv taanclou khang sa the.# xo 8.11: Met 12.28; Luk 11.16 12Khoutei kalung syng khou rui thiusaengc zayna sa the, “Tabui zaeng rui sw-nchinpui tuang lyanlou khang mi meikin hei rui sa bam tu cho? Kaling siakna ai rui nangniw khou sa tuang e: mi meikin khou hei sw-nchinmei lyanlou ni tu hamh e!”#Met 12.39; Luk 11.29

13Khoutei kaniw ta ganclouna hih tuangcna dui paengc akhat thangc kaan pat dat the.

Pharisimei khatni Herod tuang Khay

(Met 16.5-12)

14Khoutei kaniw ntyan phungc amuc the, kumna kaniw hih khou tei phungc bammei ntyan kiu kadwm akhat na di the. 15Khoutei, “Suriak thay o, Pharisimei nunc khatni Herod tuang khay ta tei zauc chuy lo,” twna Jisu rui kaniw khou chariakhpui lat kady the.#Luk 12.1

16Khoutei, “Aniu khou ntyan maek ge,” twna kaniw kaphianh thau the.

17Hei tei thay lana Jisu rui kaniw khou sa the, “Tabui swna nangniw ntyan maekmei lam khou kaphianh bam tu cho? Nangniw kabah thay mak he nah cho? Nangniw lungning ndy ngam the nah cho? 18Mik naina nangniw how mak khe nah cho, khatni nu naina nangniw chu mak khe nah cho? Nangniw amuc dat the nah cho?#Jer 5.21; Eze 12.2; Mrk 4.12 19Ai rui meic ching panguh khang ntyan dwm panguh rui by bakna nzanhlou khou tei tu nsaekcloumei padikmei giupaekc azuh nangniw laa thau tu cho?”

Khoutei, “Ruhna kanei,” twna kaniw rui daw the.

20“Ntyan dwm chanei rui meic ching padeih khang by bakna nzanhlou khou tei tu nsaekcloumei giupaekc padikmei azuh nangniw laa thau tu cho?” twna sa ti khou,

“Chanei” twna kaniw rui daw the.

21Kum e thei, “Ntaw nganvna nangniw thay mak he nah cho?” twna Jisu rui kaniw khou sa the.

Jisu rui Mik Tiatmei ta Bethsaida khou Tigayloumei

22Kaniw Bethsaida khou guang the. Khoutei meic nunc rui mik tiatmei gaanv khat ta Jisu daeng khou nduangh guangna mi pu ta kiuc kahilou khang kakhou zaenghuay the. 23Khoutei Jisu rui mik tiatmeipu ta tei kabaanc zayna kaidai paengc thangc nduangh pat the. Kumna kamik khou kateic nsukclouna khatni kabaanc bouclouna, “Nang ramh how bo?” twna kakhou thanv the.

24Khoutei, kamei zauc thauna, “Meic nunc ta thing bang kumcna how e, kaniw tat bam e,” twna kamei rui sa the.

25Khoutei Jisu rui kabaanc mi pu mik khou tei kabouclou dat the, kumna kamei how nthan the, gay dat the. Ramh guayna how nthan thiakh thiakna how the. 26Khoutei, “Mi namv khou hei gut sini gut dat ri tho,” twna kadylouna kakai thangc ndiulou kan the.

Pitar rui Jisu lam khou Sa Ndauhmei

(Met 16.13-20; Luk 9.18-21)

27Mi tangv Jisu Kaisaria Philipi tuang namv guay thangc kaziap nunc lev tat the. Kumna chaeng khou kamei rui kaziap nunc khou, “Meic nunc rui ai hei thow e twna sa bam bu cho?” twna thanv the.

28Khoutei, “‘Duiluploumei Jahon tei e,’ twna meic gaanvsaekc rui sa e, tiki baihmei gaanvsaekc rui, ‘Elija e,’ twna sa e, kumna baihmei gaanvsaekc rui, ‘muhzwng akhat re,’ twna ni sa e,” twna kaniw rui daw the.#Mrk 6.14-15; Luk 9.7-8

29Khoutei, “Nangniw thu ai hei thow e twna sa tu cho?” twna Jisu rui kaniw khou sa the.#Jhn 6.68-69

“Nang hei Khrista e,” twna Pitar rui daw the.

30Kum tina kaniw rui kalam khou meic gaanv khat na khou sini salou mak khang kamei rui kaniw ta kakhimlou the.

Jisu rui Kamei Ryanra khaengv Nimei khatni Theic Nimei lam Saloumei

(Met 16.21-28; Luk 9.22-27)

31Khoutei, “Meic Nac Mpouh hei mpeyna ryanramei ariw puni, kumna gaanvthaih nunc rui, amuh daihmei nunc rui khatni Riakdanv dinhpouc nunc rui ganc pat puni, nkhamh khou swluai puni. Tiki zaeng neih thumh tangv ringcthau dat puni,” twna Jisu rui kaziap nunc khou dinclou the. 32Kumna mi lat hei kamei rui nkamh dat makna ndaw sa the. Khoutei Pitar rui kata nduangh langc patna kakhimna sa the. 33Khoutei kamei thei ziangrih patna, kaziap nunc ta zaucna, “Seitaan, nang athei thangc tat kan o! Nang chwn hei Ravguangc chwn hamh e, maansei tuang de,” twna Pitar ta luh the.

34Khoutei meic kangdai ta tei lev kaziap nunc ta kadaeng khou kaw guangna kaniw khou sa the, “Thow pw ni athei lay nii e thei, karana kata nuh makna, katuang kros phungcna athei lay nina e.#Met 10.38; Luk 14.27 35Thow pw ni karingcpaan maan mak khang twna ning e thei hei tei maan puni; thow pw ni akhang rui khatni gaychamv khang rui karingcpaan maanlou e thei, hei tei kanlou puni.#Met 10.39; Luk 17.33; Jhn 12.25 36Thow pwni kandih kapwm hei kakhang laatow sini karingcpaan maanlou e thei, kakhang tabui gaengna cho? 37Maansei gaanv khat tuang ringc paan hei tabui lev akhiak nuhna cho? 38Thow pw ni alam khou khatni alat lam khou mi ravchap tat makmei khatni paapc padikmei meikin khou hei zakpui mei lam khou tei Meic Nac Mpouh rui ni kamei nthanmei kauh baanchara nunc ta nduanghna kapu tuang hymdaihmei khou key pwkhou zak puni.”

Currently Selected:

MARK 8: RONGBSI

Highlight

Copy