MARK 6
6
Jisu ta Nazareth khou Laalou Makmei
(Met 13.53-58; Luk 4.16-30)
1Jisu mi khou tei rui tat patna karamc kaidai khou guang the. Khoutei kaziap nunc ni kathei lay guang the. 2Kumna Sabbathneic guang pwkhou kamei rui sinagog khou nchamlou thau the. Khoutei nking bammei meic mpeyna ngakna sa the, “Mi pu hei mi guay hei tabui thangc rui laa lana cho? Kakhou tiiloumei hei akumhmei ningting lana cho? Mi kumhmei charynmei taanv kabaanc khou rui pat bammei hei! 3Mi pu hei Meri nac khatni Jakob, Josi, Juda khatni Simon chaic thing taanhmeipu tei hamhna cho? Kakainac aluh nunc ni mi khou hei aniw lungc nchamc bam tu hamhna cho?” twna sana kaniw kakhou phaysuy the.
4“Muhzwng ti hei kanamv nac, kakai kaikhwangmei khatni kakai kaikhunhmei hamhna chakhwang swlou mak mak ge,” twna Jisu rui kaniw khou sa the.#Jhn 4.44
5Kumna nnaumei gaanvsaekc na ta kabaanc bouclouna tigayloumei hamhna, kamei mi khou tei charynmei taanv taanclou ngam kan mak khe. 6Kaniw rui lwm mak ti khou tei kamei ngak the.
Jisu rui Kaziap Ruhna Kanei ta Ndiu Patmei
(Met 10.5-15; Luk 9.1-6)
Kumna Jisu namv guay khou tat lianglouna nchamlou the. 7Kumna kamei rui ziap ruhna kanei ta tei kadaeng khou kaw guangna gaanv nei gaanv nei ndiu pat the. Nthan makmei bumaengc ta nthau ganh khang kaniw khou ngamv tiilou the. 8Kumna builwang na hamhna ramh baihmei—ntyan ni, khau ni, bungkam khou syan ni phungh riu;#Luk 10.4-11 9tiki phaythuapc tuangcna thiula kanei nu makna tat ro twna sa the. 10Kamei rui kaniw khou sa the, “Tabui bui bamv khou pw ni nangniw guanglou pwkhou, mi bamv khou tei rui tat pat dat mak saanv, kaibang kalaih riu. 11Tiki nangniw ta laalou makmei khatni nangniw lat nkinglou makmei bamv khou tei thu, mi khou tei rui nangniw tat pat dat ni khou kaniw ruc khou sakhi khang nangniw phaypav niang kadiw keylou duc o.”#Lat 13.51
12Khoutei kaniw tat pat lana lungh laic nina e twna dinc the. 13Kumna ravsic mpeyna ta nthau ganclou the khatni nnaumei mpeyna ta thauh teylouna tigaylou the.#Jos 5.14
Duiluploumei Jahon ta Swluaimei
(Met 14.1-12; Luk 9.7-9)
14Khoutei guangh Herod#Mi hei Galili sinmei Herod Antipas ta e. tei Jisu pary chu the. Kalam thu Jisu zanc tat thau the. Khoutei, “Kamei hei duiluploumei Jahon tei ringcthau dat lana di the, kum lana mi kumhmei charynmei pumtan guay hei kakhou nai bam tuang the,” twna meic gaanvsaekc rui sa the.#Met 16.14; Mrk 8.28; Luk 9.19
15Tiki baihmei gaanvsaekc rui, “Kamei Elija de,” twna sa the.
“Kamei muhzwng akhat re, rey nungc muczwng kumhmei akhat re,” twna baihmei rui sa the.
16Tiki hei tei Herod chu lana, “Mi hei ai kapy dangv kanmei Jahon tei ringcthau dat lana di the,” twna sa the. 17Kalam thu kamei rui asut kawmei kakainac Philip now Herodia zaeng rui Herod kamei rui Jahon ta nymna kangkai khou bangclou khwan e.#Luk 3.19-20 18Tabui cho tiki, Jahon rui Herod ta, “Nang kainac now ta kawmei hei nang nchumh mak ge,” twna sa bam tina e.
19Kum tina Herodia tei Jahon ta karaeng the, kumna kata swluai nii the. Tiki swluaimei chaeng maekna bam khwan e. 20Kalam thu Jahon hei ravchaptatmei khatni nthanmei mei e twmei Herod thayna kata ping e. Kumna kata swluai mak khang gaekna lou bam khwan e. Herod tei Jahon lat tei chu pwkhou ramh sw la khang thay mak khe; tiki kalat nking niina nking bam khwan e.
21Herod rui katuang ricmei nunc, khatni meicdaihmei nunc khatni Galili tuang meicpy nunc ta kata puanhmei ngai khou napkaw pw khou, kadouchamei tingmik guang khwan e. 22Khoutei Herodia nacpui#Baanhhy baibal asaekc khou kanacpui Herodiatwna hylou e. gutna alaamh the, kumna Herod khatni kamei lev dungc nchamc bammei guay ta tei tipianlou the. Kum tina guangh tei rui mi nacpui khou tei, “Nang rui kahaw hawmei ney o, ai tii puni. 23Nang rui ney neymei, atuang guangcdic kapaek nganvna tii puni,” twna kakhou latryan swlou the
24Khoutei mi nacpui tei tat patna, “Ai tabui ney kho cho?” twna kapui khou thanv the. Khoutei, “Duiluploumei Jahon py tei,” twna kapui rui sa the.
25Khoutei kamei kaluak kalat guangh daeng khou guangna, “Duiluploumei Jahon py syandaih kuak khou louna ntaw dyng khou akhou tiiloumei ta ai kahaw e,” twna sa the.
26Khoutei guangh tei kalung mpeyna kabiu the, tiki kalatryan khatni kamei lev dungc nchamc bammei nunc zaeng khou tei rui kamei piu mak ngam mak khe. 27Kadyng khou guangh tei rui latdanv patna Jahon py laaguang khang rihmei gaanv khat ta ndiulou the. Kumna kamei kangkai thangc tatna Jahon py dangv the. 28Kapy tei syandaih kuak khou puanc guangna tunacpui khou tei tiilou the. Kumna kamei rui kapui khou tiilou the. 29Khoutei Jahon ziap nunc rui mi chamv tei chu lana guangna kaphouc tei laana tarou khou mbeihlou the.
Jisu rui Meic Ching Panguh ta Tituloumei
(Met 14.13-21; Luk 9.10-17; Jhn 6.1-14)
30Khoutei latdiutatmei nunc tei Jisu daeng khou guang kaduai dat the. Kumna kaniw rui taanclou kanmei khatni nchamlou kanmei guay kakhou raclou the. 31Kum tina, meic mpeyna guangmei guang, tatmei tat twna meic padik bam tipui zaeng rui tu zangvpui ganv khang sini maek khe. Khoutei Jisu rui kaziap nunc khou, “Meic maekpui bamv thangc tat pat lana matak khat nthaekc tat kho,” twna sa the. 32Kumna kaniw rana meic maekpui bamv thangc hih tuangcna tat the.
33Tiki kaniw tat kanmei ta tei meic mpeyna how the, kumna hei tei kaniw e twmei kaniw thay the. Khoutei kaidai guay khou rui meic nunc pak guangna kaniw suangc mi bamv khou tei guang bam hu the. 34Kumna Jisu hih khou rui tat pat pwkhou, meic kangdai ta tei how the. Khoutei kamei kaniw ta ningngam mak khe. Kalam thu kaniw tei gaengcloumei maekmei lauziu nunc kumc the. Khoutei kamei rui lat mpeyna kaniw khou nchamlou the.#Sin 27.17; 1 Ki 22.17; 2 Ki 18.16; Eze 34.5; Met 9.36 35Kumna neih khyam key pwkhou kaziap nunc kadaeng khou guangna sa the, “Mi hei meic lungh makpui bamv de. Kumna ntaw thu tingzyn di the. 36Kum thena mi gaengv zaengv khou naimei namv nunc khatni kaidai nunc khou hei tatna kaniw tu nuhmei puat liu tu tat kan khang kaniw ta ndiulou ti tho.”
37Khoutei Jisu rui, “Kaniw tu khang nangniw rui tii tio,” twna sa the.
Khoutei, “Aniw tatna denari#Mi hei namv khou bammei nunc tuang neih khat zaengphy e (Mat 20.2 tei zauc o). phay nei tuang ntyan liuna kaniw ta titu tio twna cho?” twna kaniw rui daw the.
38Khoutei, “Nangniw khou ntyan dwm azuh nai cho? Tatna zauc o,” twna Jisu rui sa the.
Khoutei kaniw thay la khou, “Ntyan dwm panguh lev khav kanei nai e,” twna sa the.
39“Kum e thei, meic nunc ta tei kakang kakang swna mphuaih ndiakcmei ruc khou tidungc tho,” twna Jisu rui kaniw khou sa the. 40Khoutei kaniw meic phay khat tuang khatni riakngu tuang kang kang, karian karian swna tidungc key the. 41Kumna Jisu rui ntyan dwm panguh lev khav kanei tei laana tingkauh thangc zauc kuna suaihiam neylouna ntyan dwm guay tei by baklou the, kumna nzanh khang kaziap nunc khou tiilou the. Khav kanei tei ni kamei rui kaniw khang nzanhlou the. 42Kaniw meic guayna tu ngguna tu the. 43Kumna kaniw rui tu nsaekcloumei tyan khatni khav tei nggiuh ruhna kanei padikna khuam guang khwan e. 44Mi ntyan tumei tei nggaanvmei ching panguh khwan e.
Jisu Dui Ruc khou Tatmei
(Met 14.22-33; Jhn 6.15-21)
45Mi tangv meic kangdai ta tei kamei ndiu ganc bam kanmei dak khou kaziap nunc tei hih tuangcna Bethsaida thangc kaan pat hu khang Jisu rui ndiulou the. 46Kamei kaniw ta ramnavloupui tangv, huayney khang chyngbut thangc tat the. 47Zingbangc key pwkhou, hih tei zeihlat chung khou bam khwan e. Mi khou tei Jisu karana ramkiang khou bam khwan e. 48Khoutei mpwan kaniw hu biak rui aliu riu guang tina, kaniw hih hwan ryanra bammei ta how lana, Jisu laukhwan khwanpaengc kaniw daeng nzwanna#kaniw daeng nzwanna hamh e thei kaniw ta tat ri ni kumna. dui ruc khou tat guang khwan e. Kamei kaniw ta tat kaan ni kumc guang khou, 49kamei dui ruc khou tat bammei ta kaniw how lana hei tei mbuhrav di the twna ningna kauc thau the. 50Hei tei kaniw meic guayna how the, kumna ping the.
Mi dyng khou tei Jisu rui, “Nangniw diw si nangh e, ai de. Ping riu,” twna sa the. 51Kumna kamei kaniw daeng khou guangna hih khou tei ku the. Khoutei mpwan tei nchwng kan the. Mi khou tei kaniw khang ngak the. 52Kalam thu ntyan dwm panguh tuang kabac tei kaniw thay mak khe; kaniw lungning ndy the.
Jisu rui Gennesaret khou Nnaumei ta Tigayloumei
(Met 14.34-36)
53Kaniw kaan patna, Gennesaret ramv khou guang the, kumna dui khuangc khou hih bangclou the. 54Kaniw hih khou tei rui tat pat rappui lev Jisu e twmei kaniw thay lana, 55meic nunc tei mi ramv kapwm khou tei pak liklouna, kamei mi khou tei bam e twmei chu chumei bamv khou nnaumei nunc ta puanc guang geic the. 56Namv khou, kaidai khou, lau khou, kamei guangloupui bamv bamv khou nnaumei nunc ta kaithyan bamv khou louna kaniw katuang pheychuanh tin na sini kahi khang zaenghuay the. Kumna kahitowmei guay gay dat the.
Currently Selected:
MARK 6: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
