METTHIU 4

Jisu ta Nthiammei

(Mrk 1.12-13; Luk 4.1-13)

1Mi tangv ravsic rui nthiam khang, Bumaengh rui Jisu ta tazikramv khou nduangh kulou khwan e.#Ibr 2.18; 4.15 2Kalaanv riakdei, zingbangc riakdei munthianghmei tangv, kamei ndaapc the. 3Khoutei nthiammeipu guangna kakhou sa the, “Nang Ravguangc nac mpouh e thei, mi tauc but nunc hei ntyan guanh khang sa tio.”

4Jisu rui mundawna sa the, “‘Ntyan na rui meic ringh mak ge, tiki Ravguangc mwang khou rui patmei lat guay tei rui ringh khang de’ twna hylouna nai e.”#Ria 8.3

5Mi tangv, ravsic tei rui kata nthanmei kaidai khou nduangh gutna ravkai twan pinh khou tidinglou the. 6Khoutei ravsic tei rui sa the, “Nang Ravguangc nac mpouh e thei, cham key o, ‘Nang phay na sini ntauh khou kadyang kasic mak khang, kaniw rui nang ta kapuanglou khang, kamei rui katuang baanchara nunc ta ndiulou puni,’ twna hylouna nai e.”#Kal 91.11-12

7Jisu rui kakhou sa the, “‘Nang Racguangc Poubauhmei ta nchanv lak nina e,’ twna ni hylouna nai e.”#Ria 6.16

8Ravsic tei Jisu ta kauh nganvmei chyngbut akhat khou nduangh kuna mbaanv guangcdic guay khatni mi tuang chingkhiuhmei guay lyanlou dat re. 9Kumna kamei rui, “Nang nkhum laamv keyna ata kalum e thei, mi guay hei nang khang tii puni,” twna kamei rui sa the.

10Khoutei Jisu rui kakhou sa the, “Tat kan o, Seitaan! ‘Nang Racguangc Poubauhmei ta kalum nina e, katuang siamruai na sw nina e,’ twna hylouna nai e.”#Ria 6.13

11Khoutei ravsic tei Jisu ta mpatlou the, kumna kauh baanchara nunc guangna kasiamruai sw the.

Jisu Chamv Dinc Kahouhmei

(Mrk 1.14-15; Luk 4.14-15)

12Jahon ta nym kan the twmei chu lana, Jisu Galili thangc tat dat kan the.#Met 14.3; Mrk 6.17; Luk 3.19-20 13Kumna kamei Nazareth mpatlouna, Zebulun khatni Naphtali ramv khou, zeihlat daeng khou naimei Kapharnahum kaidai khou guang lungc kan the.#Jhn 2.12 14Hei tei muhzwng Isaia rui mi hei kumcna saloumei tei guang tangh khang e:

15“Zebulun ramv khatni Naphtali ramv,

Galili duipui biak thangc,

Jordan paengc thangc naimei,

Zentelmei nunc bamv Galili!

16Zinghmei khou bammei nunc,

gaanhriw daihmei how the.

Theihmei lim kandic khou bammei nunc khang gaanclou the.”#Isa 9.1-2

17Jisu mi ganv khou tei rui thauna, “Nangniw lungh laic tho, tingkauh guangcdic ana the,” twna dinc thau the.#Met 3.2

Reymei Ziap nunc ta Kawmei

(Mrk 1.16-20; Luk 5.1-11)

18Jisu Galili zeiclat paengc khou tat guang khou, Pitar twna kawmei Simon lev kakainac Andriu zeihlat khou tei chiakc phaic bammei ta how the. Kaney tei achuanh khwan e. 19Khoutei, “Athei lay o, ai rui nangney ta meic nymmei achuanc tiswlou puni,” twna Jisu rui kaney khou sa the. 20Mi dyng khou tei kaney tuang chiakc guay ganclouna Jisu thei lay the.

21Mi khou tei rui tat pat dat pwkhou, baihmei chana gaanv nei—Zebedi nac Jakob lev kakainac Jahon, kapu Zebedi lev hih lungc khou kaniw chiak kasiamh bammei ta Jisu how the. Kumna Jisu rui kaney ta kaw the. 22Mi dyng khou tei hih tei lev kaney pu ta ganclouna Jisu thei lay the.

Jisu rui Nnaumei ta Tigayloumei

(Luk 6.17-19)

23Jisu tei sinagog guay khou nchamlouna, guanghdic tuang gaychamv dincna, khatni meic nunc tuang suan baengmei khatni sunu naunianmei guay tigaylouna Galili ramv kapwm khou ruanlou the.#Met 9.35; Mrk 1.39 24Kachamv tei Suria kapwm khou chu lik the, kumna nnaumei guay, ravpuat kazaat baih baihmei khou rui sunu suan baengmei guay, ravsic gutmei, theilanhmei, khatni kapaek theihmei guay ta kadaeng khou phungc guang the, kumna mi guay tei kamei rui tigaylou the. 25Galili, Dekapolis, Jerusalem, Judia khatni Jordan paengc khou rui meic kangdai Jisu thei lay the.

Currently Selected:

METTHIU 4: RONGBSI

Highlight

Copy