METTHIU 14

Duiluploumei Jahon Theihmei

(Mrk 6.14-29; Luk 9.7-9)

1Mi ganv khou tei, Galili ramvlangv sinmeipu Herod rui Jisu lam khou chu lana, 2kabangc nunc khou sa the, “Kamei hei duiluploumei Jahon tei e. Kamei hei theihmei khou rui ringcthau dat lana di the. Kum lana kamei mi kumhmei taanv guay hei taanh khang pumtan nai lana the.”

3Kalam thu, kachana Philip now Herodia zaeng rui kamei rui Jahon ta nymna ntana kangkai khou lou khwan e.#Luk 3.19-30 4Tabui cho tiki, Herod kamei mi pui ta tei kariak thei layna kaw nuh mak ge twna Jahon rui kata sa khwan e.#Lev 18.16; 20.21 5Kum tina Herod rui kata swluai nii khwan e, tiki kamei meic nunc ta ping e, kalam thu kaniw rui kata muhzwng akhat re twna laa bam khwan e.

6Herod kamei puanhpui ngai khou Herodia nac aluhpui mathiuc mav khou alaamhna Herod ta tipianlou the. 7Kum tina kamei rui ney neymei tii ni twna Herod rui mi pui khou tei latryan swlou the. 8Khoutei kapui rui choulou tina “Duiluploumei Jahon py tei mi kuak khou hei louna akhang tii o,” twna mi pui tei rui sa the.

9Khoutei guangh tei kalung kabiu the, tiki kamei rui kakuak paeng khou dungc nchamc bammei mathiuc mav khou latryan swlou lapui zaeng rui hei tei tii khang latdanv pat kan the. 10Kumna meic ndiulouna kangkai khou rui Jahon py dangv the. 11Jahon py tei syandaih kuak khou puanc guangna tunacpui khou tei tiilou the. Kumna kamei rui kapui khou puanc guang the. 12Khoutei Jahon ziap nunc guangna kapumc tei laana mbeih the; kumna kaniw Jisu daeng thangc tatna mi chamv tei dinclou the.

Meic Ching Panguh ta Titumei

(Mrk 6.30-44; Luk 9.10-17; Jhn 6.1-14)

13Mi chamv tei chu lana, Jisu mi bamv tei mpatlouna hih tuangcna meic maekmei bamv thangc tat khang karana tat kan the. Meic guay tei Jisu tat kanmei chamv tei chu lana kaidai guay khou rui patna phay chaeng kathei lay nzwan the. 14Kamei hih khou rui pat pwkhou meic kangdai ta how the. Khoutei kaniw ta nzianmei pat the, kumna kaniw tuang sunu tigaylou the.

15Tingzyn key pwkhou kaziap nunc kadaeng khou guangna, “Mi hei meic lungh makmei bamv de, kumna neih ni maek khe. Kum thena kaniw namv namv thangc tatna tu zangv khang kaphianh tat kan diu khang meic nunc ti hei mpatlou ti tho,” twna sa the.

16Khoutei Jisu rui kaniw khou, “Kaniw tat khang kage maek ge. Kaniw tu khang nangniw tii tio.” twna sa the.

17“Aniw khou ntyan dwm panguh lev khav kanei na nai e,” twna kaniw rui daw the.

18“Mi guay kiu adaeng khou laaguang o.” twna Jisu rui sa the. 19Khoutei meic kangdai ta tei phuairiaw ruc khou dungckey khang sa the. Kumna ntyan dwm panguh lev khav kanei tei sinna tingkauh thangc zauc kuna thuancku the. Ntyan dwm guay tei by bakna kaziap nunc khou tiilou the. Kumna kaziap nunc tei rui meic kangdai khou tei nzanhlou the. 20Khoutei meic guayna kaniw bung tu nggu the. Kumna tu nsaekcloumei khuam kaduai dat pwkhou nggiuh ruhna kanei padik the. 21Mi khou tei tumei tei ntumei lev alauc ta pah makna nggaanvmei meic ching panguh dou e.

Jisu Dui Ruc khou Tatmei

(Mrk 6.45-52; Jhn 6.15-21)

22Jisu kamei rui meic kangdai ta tei titat ntamv dat bam kan khou, kaziap nunc tei hih tuangcna zeihlat paengc akhat thangc kaan pat khang tat hu kan the. 23Kamei meic kangdai ta tei ndiu ganclou ngam lana huayney khang karana chyngbut thangc ku the, kumna zingc key pwkhou mi khou tei karana bam the. 24Mi ganv khou tei hih tei zeihlat chung rambiuc dou khou puanzingh akhangvna bam khwan the. Kalam thu puanzingh tei hih hu biak thangc rui guang riu the.

25Khoutei, khwanpaengc pat pwkhou, Jisu dui ruc khou kaphay rui tatna kaniw daeng khou guang the. 26Kamei dui ruc khou tat bammei ta tei how lana, kaniw ping the. “Mi hei rav di the” twna sana pingna kauc thau the.

27Khoutei Jisu rui kaniw khou sa the, “Diw si riu, ai de; Ping nangh e!”

28Mundawna Pitar rui sa the, “Poubauhmei, nang de tw e thei, ai ni dui ruc khou tatna nang daeng khou guang khang latdanv patlou o.”

29Khoutei, “Guang tho” twna Jisu rui sa the. Khoutei Pitar hih khou rui keyna dui ruc khou tatna Jisu daeng thangc tat guang the. 30Puanzingh ta tei howna kamei ping the, kumna limc key khang sw the. Khoutei, “Poubauhmei ata kanlou o,” twna kamei rui kauc the.

31Khoutei kaluak kalat kabaanc haamv patna kata zayna, “Lwmmei nthyammei, tabui swna nang lwmsi tu cho?” twna Jisu rui sa the.

32Kaney hih khou tei ku rappui lev, puanzingh tei nthaekc kan the. 33Hih khou bammei nunc tei rui, “Nang hei Ravguangc Nac changh dyng the,” twna sana kata kalum the.

Jisu rui Gennesaret khou Nnaumei ta Tigayloumei

(Mrk 6.53-56)

34Kaniw zeihlat tei kaan patna Gennesaret ramv khou guang the. 35Khoutei meic nunc tei Jisu ta thay lana, mi gaengv zaengv khou bammei guay khou sa liklou the. Kumna nnaumei nunc ta kadaeng khou phungc guang geic the. 36Nnaumei nunc tei katuang phey tin na sini kahi khang guang the, kumna kahitowmei guay gay nthan thiak kan the.

Currently Selected:

METTHIU 14: RONGBSI

Highlight

Copy