MALAKAI 3
3
1“Zauc lo, akhang chaeng kasiamh khang ai rui atuang latdiutatmei ta thouclou puni the. Khou kiu nangniw rigwnna bammei Ringhpouc kiu thay mak daekna katuang Ravkai khou guang puni the. Nangniw how niina bammei latdyng tuang latdiutatmeipu kiu guang puni the,” twna Ngamparymei Ringhpouc rui sa the.#Met 11.10; Mrk 1.2; Luk 1.76; 7.27
2Kamei guangpui ganv khou kiu thow akhaengv ngam nina cho? Kamei guang pwkhou thow dingchaek ngam nina cho? Kamei tei phey soumei sabuan kumc puni the khatni ntanh raw nthanmei mai kumc puni the.#Jol 2.11; Nda 6.17 3Tiki raw nthanmeipu kumc kamei latzan sw khang guang puni the. Ntanh taanhmeipu rui daandi lev kachaekc sw nthanmei kumcna, Ringhpouc tuang latdiutatmeipu rui amuh nunc ta sw nthan puni the. Kalam thu Ringhpouc rui laalou nuhmei puatkat kaniw rui kat diu khang e. 4Kum pwkhou reynungc kumcna Juda khatni Jerusalemmei nunc rui phungc guangmei kaipat tei rui Ringhpouc ta tipian dat puni.
5Ngamparymei Ringhpouc rui sa e, “Latzan sw khang ai nangniw pang khou guang puni the, kumna duaih-raengh sin bammei nunc; lungcmaanv lungcmow bammei nunc; saraamhmei sakhi tii bammei nunc; phihmei nunc khang taanvphy tii makmei nunc; amaypui nunc, nru nac nunc khatni gin-ga nunc khou rui kadow chamei laa bammei nunc, ata chakhwang sw makmei nunc khuay tei katumcna kalauhpat puni the.
Ruh Dam Tiimei
6“Ai hei Ringhpouc e, kumna ai thu kalaic mak ge. Kumhpui zaeng rui Jakob kikta guay hei amaanpary mak ge. 7Nangniw hei nangniw pupouc nunc khou rui thauna atuang latdanv khou rui mbiangh tat kan the kumna mi guay tei ngaek mak khe. Akhou hancguang dat ro kum e thei ai nangniw khou guang dat puni. ‘Nang khou aniw akumhna hancguang dat nina,’ twna nangniw thanv bam e. 8Ai rui nangniw khou kumna thanv e, thowkumhmei rui Ravguangc tuang houctu bammei hei nchumh dai? Nzih zat mak khe. Nchumh zat mak khe, tiki nangniw ata guat bam e. ‘Akumhna?’ twna nangniw thanv e. Ruh dam khatni puatkat tiimei khou tei e. 9Nangniw kaguayna ruc khou syang nai the kalam thu zaatc kapwm rui atuang houctu bam the. 10Akai khou taektw nai diu khang nangniw tuang ruh dam kapwmna tei Ravkai khou phungc guang o. Ata nchanv zauc o kumna ai rui tingkauh kaikhamv laancpatna nangniw khou suaihiam mphamh mphahna louchan lakmei nganv bun key puni the.#Lev 27.30; Sin 18.21-24; Ria 12.6; 14.22-29; Neh 13.12 11Ai rui nangniw tuang phunling phunlu ta nkav nkit rui tiswkasic lak ge, kumna nangniw tuang drakha bang guay tei nthai bau kan ni kumc, nthai puni the. 12Kum pwkhou zaatc guay rui nangniw ta suaihiamloumei nunc twna kaw puni the, kalam thu nangniw kandic hei mbaanv thaymei kandic sw puni the. Heikumna Ringhpouc rui sa e.
Ravguangc rui Zauc Nzianlou Nimei Latdyng
13“Nangniw aruc khou ndevna sa the, tiki ‘Aniw nang ruc khou tabui sana cho,’ twna nangniw sa dat re,” twna Ringhpouc rui sa e. 14Nangniw rui kumna sa the, “Ravguangc ta kalum bammei hei nsa de. Ravguangc lat piu bammei rui tabui gaengmei naina cho khatni Ngamparymei Ringhpouc hu khou lungh kabiumei lyan bammei rui tabui gaengmei naina cho? 15Aniu rui how bammei tei di the, daihriw sw bammei nunc tei neihlana lungc bam de. Meicsimei nunc tei ni lungcgay bam de, Ravguangc ta ntanvna bammei nunc tei ni ramhsw makna bam de.”
16Khoutei Ringhpouc ta pingmei nunc khat khat khou sa bammei tei Ringhpouc rui nkingna kaniw rui sa bammei tei chu the. Ringhpouc ta pingmei nunc khatni kata chakhwang champouhmei nunc lam khou ningtowmei latrik buk Ringhpouc hu khou hy bam the. 17Ngamparymei Ringhpouc rui sa e, “Kaniw hei amei nunc sw puni, ai taanv sw thaupui nungc kiu, kaniw tei atuang sw puni. Kasiamruai swmei kanac mpouh ta kapu rui nzianloumei kumcna ai rui kaniw ta nzianlou puni. 18Ravchaptatmei lev meicsi meicroucmei, asiamruai swmei lev sw makmei kak khou tabui nai cho twmei amei nunc thay dat puni.”
Currently Selected:
MALAKAI 3: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
