LUK 6

Jisu Sabbathneic Kaipouc e

(Met 12.1-8; Mrk 2.23-28)

1Sabbathneic akhat khou, Jisu laupuk khou tat ruan pat khwan e. Khoutei kaziap nunc rui gehu guy chuncna kaniw baanc khou kanuaihna tu thau khwan e.#Ria 23.25 2Khoutei Pharisimei gaanvsaekc rui, “Kariak thei layna Sabbathneic taanc nupui taanv tabui swna nangniw taanh tu cho?” twna sa the.

3Khoutei Jisu rui kaniw khou sa the, “David rui kamei khatni kamei nunc ndaapcpui ganv khou tabui sw kan tu cho twmei nangniw pac zat mak he nah cho?#1 Sa 21.1-6 4Kamei Ravguangc kai khou gutna amuh nunc na hamhna tu nuh makmei Ravguangc khou katloumei ntyan kamei tw kan e, kumna kamei nunc khang ni tii kan e.”#Lev 24.9

5Kumna Jisu rui kaniw khou sa the, “Mei Nac Mpouh hei Sabbathneic tuang kaipouc e.”

Kabaanc Akhat Theihmeipu ta Tigayloumei

(Met 12.9-14; Mrk 3.1-6)

6Sabbathneic baihmei akhat khou, Jisu sinagog khou guangna nchamlou bam khou, baanzat baanc theihmeipu gaanv khat mi khou tei bam khwan e. 7Khoutei Riakdanv dinhpouc khatni Pharisimei nunc, kamei Sabbathneic tigaylou puni ny twna kakhuay phu khang rui kata zauc bam khwan e. 8Jisu kaniw lungning tei thay lana, “Nang thauna hu khou guang ding o,” twna kabaanc theihmeipu khou tei sa the. Khoutei kamei thauna mi khou tei guang ding the.

9Khoutei Jisu rui kaniw khou sa the, “Ai rui nangniw khou thanv e: Kariak thei layna Sabbathneic swgayloumei nchumh ny sw kasicloumei nchumh cho khatni panty kanloumei nchumh ni panty swmaanmei nchumh cho?”

10Kamei kaniw guay ta zauc kari kariangna zauc lana, mi pu khou tei, “Nang baanc ntyng pat ro,” twna sa#Baanhhy baibal asaekc khou lungh puamcna sa the twna hylou e. the. Khoutei ntyng pat the, kumna gay dat the. 11Khoutei kaniw reic thau the, kumna kaniw Jisu ta tabui sw nuh puni cho twmei kaniw kaphianh thau the.

Jisu Ziap Ruhna Kanei

(Met 10.1-4; Mrk 3.13-19)

12Mi ganv khou tei zaeng neih khat Jisu huayney khang chyngbut thangc tat the, kumna mi khou tei Ravguangc khou huayney thangc the. 13Tinggaanc pwkhou, kaziap guay ta kadaeng khou kaw guangna, kamei rui latdiutatmei nunc twmei zancphuakh tiiloumei ruhna kanei ta kapah the. Mi nunc kiu thu: 14Kamei rui Pitar twna ni phuakloumei Simon khatni kakainac Andriu, Jakob, Jahon, Philip, Bartholomiu, 15Metthiu, Thomas, Alphia nac Jakob, Zelot kawmei Simon, 16Jakob nac Juda, khatni Jisu ta zuanctumei Juda Iskariot, mi guay hei e.

Jisu rui Nzaengc khou Nchamloumei

(Met 4.23-25)

17Jisu kaniw lev keyna kazaengcmei bamv akhat khou ding the. Khoutei kaziap meic kangdai khatni Judia kapwm khou rui, Jerusalem khou rui, khatni duipui paengc ramv Tur lev Sidon khou rui guangmei meic kangdai bam khwan e. 18Kaniw hei kalat nking khang khatni kaniw tuang su nu tigaylou khang guangmei nunc e. Simei bumaengc nunc rui sw ryanra bammei guay ta tigaylou khwan e. 19Kumna meic guayna tei kata kahi khang karamc khwan e, kalam thu kakhou rui pumtan patna kaniw guay ta tigaylou khwan e.

Neihlamei khatni Ryanramei

(Met 5.1-12)

20Khoutei Jisu kaziap nunc ta zaucna sa the:

Lungcsimei nunc nangniw hei sangaymei nunc e;

Ravguangc guangcdic hei nangniw khang e.

21Ntaw ndaapcna bammei nunc nangniw sangaymei nunc e;

nangniw ta ti-ngulou puni.

Ntaw kap bammei nunc nangniw sangaymei nunc e;

kalam thu nangniw nuic puni.

22“Meic Nac Mpouh zaeng rui meic nunc rui nangniw ta karaeng pwkhou, nangniw khou latsic latrou salou pwkhou, khatni nangniw zanc satowmei na sini simei tuang e twna, kaniw pang khou rui alay ganclou pwkhou, nangniw sangaymei nunc e.#1 Pi 4.14

23“Mi ganv khou tei nangniw neihla o, neihlana kachuamh o; kalam thu zauclo, tingkauh thangc nangniw tuang swan daic e. Kalam thu kaniw pupouc nunc rui mi hei kumcna muhzwng nunc ta sw kanmei tuang e.#2 Ki 36.16; Lat 7.52

24“Lungcgaymei nunc nangniw sansi e dav!

nangniw amanvmei laatow tang the.

25Ntaw nggu bammei nunc nangniw sansi e dav!

nangniw ndaapc puni.

Ntaw nuic bammei nunc nangniw sansi e dav!

nangniw puihuayna kap puni.

26Meic guayna rui nangniw ta sa chuy bammei,

nangniw hei sansi e dav!

kaniw pupouc nunc rui guatmei muczwng nunc ta mi hei kumcna sw kan the.

Zauczihmei ta Nzianmei

(Met 5.38-48; 7.12)

27“Tiki alat nking bammei nangniw khou ai rui sa tuang e: Nangniw ta zauczihmei nunc ta nzian o, nangniw ta karaengmei nunc khang gaymei swlou tio, 28nangniw ta siangloumei nunc khou suaihiamlou tio, khatni nangniw khou latsic latrouc saloumei nunc khang huayneylou tio. 29Nang biangc kaphi pw e thei kabiak akhat tei ni nzuhlou tio. Nang phey asut kanmeipu tei rui nang tuang thiula ni laa ni tw e thei tii tio. 30Neymei guay khang tii tio, kumna thowkumhmei rui nang tuang laa kan e thei, hei tei ney dat ri tho. 31Meickai rui nang khou swlou pw tu laa niimei tei nang rui meickai khang swlou tio.#Met 7.12

32“Nangniw ta nzianmei nunc na ta nangniw nzian e thei, nangniw ta thuanckulou khang tabui tuang naina cho? Paapcmei nunc tei sini kaniw ta nzianmei nunc ta thu nzian muay de. 33Nangniw khang gaymei swloumei nunc khang na tei nangniw gaymei swlou e thei, akumhna nangniw suaihiam laatow nina cho? Paapcmei nunc ni hei tei kumcna sw de! 34Khatni nangniw khang khangclou dat nimei nunc na khang nangniw tipoulou e thei, nangniw ta thuanckulou khang tabui tuang naina cho? Paapcmei nunc sini tiiloumei zu tei khangclou dat khang paapcmei nunc khang tipoulou muay de. 35Tiki nangniw ta zauczihmei nunc ta nzian o, kaniw khou gayna swlouna, ramhkhat na sini tii dat pungh e twmei ning makna tii pat ro. Kum e thei nangniw tuang swan daic puni, khatni nangniw Kauh Liangmeipu nac nunc sw puni. Kalam thu kamei thu meic huath thay makmei khatni meicsimei nunc ta sini zauc nzianloumeipu de. 36Nangniw Pu zauzian thaymei kumcna, nangniw ni zauzian thay o.

Meickai ta Latzan Swmei

(Met 7.1-5)

37“Latzan sw riu, kum ti thei, nangniw ta ni latzan sw mak puni; khuay phu riu, kum ti thei, nangniw khuay ni phu mak puni. Kuaklou o, kum ti thei, nangniw ta ni kuaklou puni. 38Tii o, kum ti thei, nangniw khang tiilou puni; baanh daicna, nym keyna, kanuk padikna, nsuang lyamna nangniw pamv khou guang bunlou puni. Kalam thu, nangniw rui ndatmei dath tei rui nangniw khang ni ndatlou dat puni.”

39Jisu rui kaniw khou mi latgiam hei ni salou khwan e. “mik tiatmei rui mik tiatmei ta chaengzay nuh di nah cho? Kaney gaanvnei khunh khou keylou pu lak nah cho?#Met 15.14 40Ziap akhat tei katuang dinhpouc suangc mbu mak ge, tiki kamei thay nimei guay thay nthuih e thei, katuang dinhpouc lev nchamc puni.#Met 10.24-25; Jhn 13.16; 15.20

41“Nangniw mik khou thing paek naimei tei thu thay makna, tabui swna nang chana mik khou nrouc naimei ta tei how bam tu cho? 42Nang mik khou thing paek naimei ta tei thu how makna, ‘Chanale, nang mik khou nrouc naimei tei ai laa ganclou pumc e,’ twna nang chana khou nang akumhna sa ngam nina cho? Gaylwnswmei nang, nang mik khou naimei thing paek tei laa ganc rey o, kum e thei nang chana mik khou naimei nrouc tei laa ganh khang nang how nthan puni.

thing bang khatni Kathai

(Met 7.16-20; 12.33-35)

43“Karav gaymei thing bang rui kathai simei nthai mak ge, karav simei thing bang rui ni kathai gaymei nthai mak ge. 44Thing bang ta tei kathai rui dinc e. Raengtawsauc bang khou tadut thai nthai mak ge, sauhmuanhna bang khou ni drakha thai nthai mak ge.#Met 12.33 45Meicgaymei rui gaymei ryloupui bamv kalung khou rui gaymei laa pat re, khatni meicsimei rui simei ryloupui bamv kalung khou rui simei laa pat re. Kalam thu kalung khou padikna naimei khou rui kamwang khou rui sa tuang e.#Met 12.34

Ningtyngmei khatni Mpangmei tuang Kai

(Met 7.24-27)

46“Nangniw ata ‘Poubauhmei, Poubauhmei’ twna kaw lana, ai rui samei thu tabui swna taanh mak tu cho? 47Akhou guangna ai rui samei guay chu lana taanhpui mei tei, tabui kumhpui mei lev nchamc cho twmei ai nangniw khou dinclou puni. 48Kamei tei ntiangh khunc chau nthuk keyna ntauh ruc khou ntiangh lingclouna kai swmeipu tei kumh tuang e. Dui daic guangna mi kai ta tei duithuat rui guang nun sini hei tei kalung mak ge, kalam thu hei tei sw ntipna swlou the. 49Tiki alat chu lana taanh makpui mei tei thu ntiangh khunc ruangc key makna, syniang ruc khou kai swmeipu tei kumhmei tuang e. Duithuat rui kai ta tei guang nun pwkhou bow kasic karoucna bow kan the.”

Currently Selected:

LUK 6: RONGBSI

Highlight

Copy