LUK 4
4
Jisu ta Nthiammei
(Met 4.1-11; Mrk 1.12-13)
1Jisu, Bumaengh Nthanmei rui padikna Jordan thangc rui guang dat khou, Bumaengh rui kata tazikramv thangc zaeng riakdei nduanghlou khwan e. 2Mi khou tei ravsic rui kata nchanv khwan e. Mi ganv lungc khou tei kamei tu zangv mak khwan e, kumna nkhamh khou ndaapc khwan the.
3Khoutei, “Nang Ravguangc Nac Mpouh e thei, mi taucbut ti hei ‘ntyan mbaih o’ twna sa tio,” twna ravsic rui kakhou sa the.
4Khoutei Jisu rui daw the, “‘Ntyan na rui meic ringh mak ge’ twna hylouna nai e.”#Ria 8.3
5Khoutei ravsic tei rui Jisu ta kauh khou nduangh kuna kadyng khou mbaanv kapwm tuang guangcdic guay lyanlou the. 6Ravsic tei rui kakhou sa the, “Mi guangcdic guay tuang ngamv khatni hym hei ai rui nang khang tii puni; kalam thu mi hei abaanc khou tiilou the; kumna mi hei ai rui tiilou nii niimei khou tiilou e. 7Kumna nang ahu khou nkhum keyna ata kalum e thei, mi guay hei nang tuang sw puni.”
8Khoutei Jisu rui sa the, “‘Poubauhmei nang Racguangc ta nang kalum nina e khatni kasiamruai na sw nina e’ twna hylouna nai e.”#Ria 6.13
9Khoutei Jisu ta Jerusalem khou nduangh guangna Ravkai twan pinh khou tidinglouna ravsic tei rui sa the, “Nang Ravguangc Nac Mpouh e thei, mi khou hei rui cham key o; 10-11‘Nang ta gaeklou khang kabaanchara nunc ta ndiulou puni; kumna nang phay ntauh khou kadyang mak khang kaniw baanc rui nang ta kapuanglou puni’ twna hylouna nai e.”#Kal 9.11; Kal 91.12
12Khoutei Jisu rui sa dawna sa the, “‘Nang Racguangc Poubauhmei ta nang nchanv lak nina e’ twna sa e.”#Ria 6.16
13Nchanv nimei guay nchanv ntangh lana, kadouchamei ganv ariw dat mak saanv khang ravsic tei kakhou rui tat pat kan the.
Jisu ta Nazareth khou Laaloumei
(Met 4.12-17; Mrk 1.14-15)
14Jisu Bumaengh pumtan phungcna Galili khou guang dat the, kumna mi ramv gaengv zaengv kapwm khou tei kazanc dinc lik the. 15Kamei rui kaniw tuang sinagog guay khou nchamlou the, kumna meic guayna rui kata thuanc the.
Jisu ta Nazarethmei rui Laalou Makmei
(Met 13.53-58; Mrk 6.1-6)
16Mi tangv Jisu kamei daic thaumei kaidai Nazareth khou guang the. Khoutei kamei katuang chav sw bammei thei layna, Sabbathneic sinagog ku the. Kumna Nthanmei Latrik pah khang kamei dingthau the. 17-18Khoutei muhzwng Isaia tuang latrik zy kakhou tiilou the. Kumna kamei hei tei ric pat pwkhou, mi kumcna hylou bammei tei ariw the:
“Poubauhmei Bumaengc akhou bam e;
kalam thu lungcsimei nunc khou gaychamv dinh khang,
kamei rui ata suanglou the.
Bangclou bammei nunc khou ricloumei chamv,
khatni mik tiatmei nunc khou,
mik tirakloumei chamv dinc ndauh khang,
sin zyn bammei nunc ta tiduaklou khang,
19khatni Poubauhmei tuang zauzian ganv kauc ndauh khang,
kamei rui ata ndiulou the.”#Isa 61.1-2
20Kumna Jisu latrik zy tei kazihlou datna siamruaimeipu khou tiilou lana dungckey kan the. Khoutei sinagog khou bammei guay tei kata miktunna zauc the.
21Khoutei kamei rui kaniw khou, “Aseic nangniw nking bammei Nthanmei Latrik khou hyloumei hei ntaw guang tangc bam the,” twna sa the.
22Khoutei kiuc dyng the twna meic guayna rui laalou the khatni kamwang khou rui patmei zauzian lat guay khou tei kaniw ngak the. Kumna, “Mi hei Josep nac tei hamhna cho?” twna kaniw rui sa the.
23Khoutei Jisu rui kaniw khou sa the, “ ‘Ravtow amucle, nang rana nang ta swgay o’ twmei latchap hei nangniw akhou suai makna sa puni. ‘Nang rui Kapharnahum khou taanclou kan e twna aniw chumei guay tei mi nang ramc kaidai khou hei taanclou o’ twna sa puni.
24“Ai rui nangniw khou kaling siakna sa tuang e: Muhzwng ta karamc khou thu laalou mak ge.#Jhn 4.44 25Tiki ai rui nangniw khou latling samei kiu mi hei e: Elija ganv khou tingkwm kathumh bw charuk ting key makna mi kandic kapwm khou tei nap nkow dai nkow khou tei, Isarael khou maypui mpeyna nai kan de,#1 Ki 17.1 26tiki Elija ta kaniw daeng khou ndiulou makna, Sidon kandih khou Zaraphath khou bammei maypui khat khou ndiulou kan e.#1 Ki 17.8-16 27Khatni muhzwng Elisha ganv khou Isarael khou mphaanhmei mpeyna nai kan de, tiki kaniw ta tigaylou kan mak ge; Suriamei Naaman ta tigaylou kan e.”#2 Ki 5.1-14
28Mi hei chu la khou, sinagog khou bammei guay tei lungh puamc the. 29Khoutei kaniw thauna kata kaidai paengc thangc nthau patna, kaniw tuang kaidai paengc khow khou phaic key khang nthau pat the. 30Tiki kamei meic pang chung khou tei tat patna tat kan the.
Jisu rui Ravsic Nthau Ganhmei
31Khoutei kamei Galili tuang Kapharnahum kaidai khou key the, kumna Sabbathneic kamei rui meic nunc khou nchamlou bam khwan e. 32Kamei rui nchamloumei khou tei kaniw ngak the, kalam thu kalat tei ngamv naimei lat khwan e.#Met 7.28-29
33Mi sinagog khou tei nthan makmei ravsic bumaengc gutmeipu gaanv khat bam khwan e. Kamei rui kauc ranvna kaucna sa the, 34“He Nazarethmei Jisu, nang aniw lev tabui tuang sw khang naina cho? Aniw ta swmaan khang guang tu cho? Nang thow cho twmei ai thay e—nang hei Ravguangc tuang Nthanmeipu e!”
35Khoutei, “Reih rei bam o! Kakhou rui tat pat tho!” twna Jisu rui kata luh the. Khoutei ravsic tei rui kata tei meic pang la khou tei siauc keylouna, kata sw kabiu kabaeng makna kakhou rui tat pat kan the.
36Meic guay tei ngakna, “Mi lat hei tabui tina cho? Kalam thu ngamv khatni pumtan naina nthan makmei bumaengc guay ruc khou latdanv pat tina kaniw tat pat kan the!” twna kaniw khat khat khou sa the. 37Kumna kachamv tei Kapharnahum gaengv zaengv khou tei chu lik sik kan the.
Jisu rui Meic Mpeyna ta Tigayloumei
(Met 8.14-17; Mrk 1.29-34)
38Jisu sinagog khou tei rui tat patna Simon kai khou gut the. Khoutei Simon now pui ravmanc ranv sihna bam khwan e. Kumna kata tigaylou khang kaniw rui Jisu khou sa the. 39Jisu kadaeng khou guang dingna ravman ta tei luh the; khoutei mi ravman tei kakhou rui tat kan the. Kumna kadyng khou kamei thauna kaniw siamruai sw the.
40Neih key kan pwkhou, meic nunc rui ravpuat kazaat baih baihmei nnaumei guay ta Jisu daeng khou phungc guang the. Khoutei kaniw kathuic khou kabaanc bouclouna kaniw ta tigaylou the. 41“Nang hei Ravguangc Nac Mpouh e!” twna kaucna meic mpeyna khou rui ravsic nunc ni tat pat khwan e. Kum tina kaniw ta luh the khatni lat sa khang nuhlou mak ge. Kalam thu kamei Khrista e twmei ravsic nunc tei thay e.
Jisu Sinagog guay khou Chamv Dinhmei
(Mrk 1.35-39)
42Tinggaanc pat pwkhou, Jisu mi kaidai tei mpatlouna meic khwan meic ring chu makpui bamv thangc tat kan the. Khoutei meic nunc tei kata phu the, kumna kaniw kata ariw pwkhou, kamei kaniw khou rui tat pat dat mak khang kham the. 43Tiki, “Ravguangc guangcdic tuang gaychamv hei ai kaidai baih baihmei khou ni dinc tat mak nuh mak ge, kalam thu Ravguangc rui ata ndiu guangmei hei mi khang hei rui e,” twna sa the.
44Kumna kamei Judia tuang sinagog guay khou mi gaychamv hei dinc tat the.
Currently Selected:
LUK 4: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
