LUK 2

Jisu Puanhmei

(Met 1.18-25)

1Mi douc tei kaguangcdic kapwm zanh hy nina e twna Kaisar Agasta rui latdanv pat khwan e. 2Mi rey liangmei zanh hymei hei, Kureni rui Suria khou guanghkhyn sw bammei douc khwan e. 3Kumna zanh hy khang meic kapwmna karamc kaidai kaidai thangc tat khwan e.

4Kumna Josep ni Galili tuang Nazareth kaidai khou rui Judia tuang David kaidai, kazanc Bethlehem kawmei kaidai khou ngangh the. Kalam thu kamei David puinacmei lapui zaeng rui, 5kapumc nrit bammei kakhaamv Meri lev mi khou tei zanh hylou nina khwan e. 6Kumna kaney mi khou tei bam khou, Meri ganthiangc nipui ganv tangc khwan the. 7Kumna Meri nareimei mpouh khat puanc the, kumna nahdwam phey rui kaduapclouna guaih kuak khou nzilou the. Kalam thu kaney khang ginbangvkai khou bangv bamv maek khwan e.

Jisu Puanhmei Chamv Lauziu Gaenghmei nunc khou Dincloumei

8Mi ramv gei khou tei lauziu gaenghmei nunc kaniw tuang lauziu nkhwanna zingbangc ramvpuk khou bam khwan e. 9Khoutei Poubauhmei tuang baanchara kaniw daeng khou guangna Poubauhmei riw rui kaniw bamv guay tei gaanclou the. Khoutei kaniw ping the. 10Khoutei baanchara tei rui kaniw khou sa the, “Nangniw ping riu, zauclo, neihla daihmei chamv ai rui nangniw khang phungc guang e; mi hei meic guayna khang e. 11Mi kiu thu: seic hei David kaidai khou nangniw khang Kanloumeipu puanclou bam the. Kamei Khrista Poubauhmei e. 12Mi nac ta kiu madanh khang mi hei e: Ngasatna akhat nahdwam phey rui kaduapclouna guaih kuak khou nzilou bammei ta nangniw ariw puni.”

13Khoutei thay mak liang khou tingkauh mei kangdai patna mi baanchara tei lev Ravguangc hym thuancna sa the:

14“Tingkauh khou Ravguangc hym daic diu,

khatni kandih khou Ravguangc lung kwnmei nunc khou,

chuzaenghmei nai diu.”

Lauziu Gaenghmei nunc Ngasatna Jisu ta Zauhmei

15Kauh baanchara guay tei kaniw khou rui tingkauh thangc tat dat kan pwkhou, “Aniu Bethlehem thangc tatna Poubauhmei rui aniu khou dincloumei ta kiu zauc di kho,” twna kaniw kaphianh the.

16Kaniw katumcna tat lana Meri lev Josep khatni guaih kuak khou nzilou bammei ngasatna ta ariw the. 17Kaniw hei tei how lana, mi ngasatna lam khou tei kaniw khou saloumei tei kaniw rui rac lik sikh siklou the. 18Kumna lauziu gaenghmei nunc tei rui samei pary tei chumei guay ngak the. 19Meri mi guay hei kalung khou rylouna kakhanhna bam khwan e. 20Lauziu gaenghmei nunc tei kaniw khou saloumei kumc rapna, kaniw rui chu kanmei khatni how kanmei khang tei Ravguangc hym thuancna hanc guang dat the.

Jisu Zanc Phuakmei

21Zaeng tachat tangcna mi ngana ta tei gihruamc pwkhou, kapui bung khou meic cha mak khou rui kauh baanchara rui phuakloumei zanc “Jisu” twmei zanc hei kazanc khang phuaklou the.#Lev 12.3; Luk 1.31

Jisu ta Ravguangc khou Kat Gutloumei

22Mousi tuang Riakdanv thei layna, kaney pumh nthanpui thouc swpui ganv tangc pwkhou, Jisu ta Poubauhmei khou kat gut khang Jerusalem khou phungc guang the.#Lev 12.6-8 23“Nareimei nggaanvmei nac guay tei Poubauhmei khang reic patlou nina e,” twna Poubauhmei tuang Riakdanv khou hylouna nai tina e.#Tat 13.2,12 24Poubauhmei tuang Riakdanv khou saloumei thei layna, akhouhna kanei hamh e thei aphyna kanei katlou khang e.

25Khoutei kazanc Simeon twna kawmeipu gaanv khat Jerusalem khou nai khwan e. Kamei hei ravchaptatmei khatni ravning nthukmei khatni Isaraelmei ta swmloumeipu ta nkhwanna bammeipu khwan e. Bumaengh Nthanmei kakhou bam khwan e. 26Kamei theih mak khou Poubauhmei rui suangloumei Khrista ta kamei how puni twna Bumaengh Nthanmei rui kakhou dinclou khwan e. 27Kumna Bumaengh rui zaylouna kamei Ravkai khou guang the. Khoutei kariak thei layna angana khou taanclou nimei thouc taanclou khang, Jisu ta kapui kapu rui phungc guang pwkhou, 28kamei rui ngana ta tei puancna, 29Ravguangc ta thuancna sa the:

“He Kaipouc, ntaw thu nang bangc ai zuh zuna tat kan ni the.

Nang rui nrianhloumei tei guang tangc the.

30Kalam thu, nang rui tiiloumei Kanloumeipu ta,

amik kahak rui how the.

31Nang rui meic guayna mikdaan khou,

chamdaanvloumei ti hei how the.

32Zentelmei guay khang tigaancloumei riw,

khatni nang mei Isaraelmei khang hymdaihmei e.”#Isa 42.6; 49.6; 52.10

33Mi hei kumcna mi angana lam khou hei saloumei khou tei kapui lev kapu ngak the. 34Khoutei Simeon rui kaniw khou suaihiamlouna, kapui Meri khou sa the:

“Zauclo, mi nac khou hei,

Isaraelmei meic mpeyna ta,

bow khang khatni dingthau khang tiilou kan the,

khatni mi nac hei,

meic nunc rui nuh zihna sa bammei tuang tei,

madanhmei tuang sw puni the;

35Kumna meic mpeyna lungning ndauh pat puni the,

khoutei baengsaeng rui nang lungthw biw puni.”

36Khoutei Ashar kaikhwangmei, Phanuel nac aluhpui, kazanc Anna twna kawmei karacpeic sihmei muhzwngpui gaanv khat nai khwan e. Kamei micna kagaanv lev tingkwm chanei lungclouna, 37ntaw katingkwm riaktachatna padeih nganvmei hei may swna lungc bammeipui#hamh e thei tingkwm 84 may sw bammeipui. khwan e. Kamei ravkai khou rui tat pat makna, zingbangc kalaanv kalumna, munthiangcna huayney bammeipui khwan e. 38Mi dyng khou tei kaniw daeng khou guangna kamei rui Ravguangc ta thuancna, Jerusalem ta thuakloumei ta nkhwan bammei nunc khou mi angana lam khou tei salou the.

Nazareth khou Guang Datmei

39Poubauhmei tuang Riakdanv thei layna taanc nimei thouc guay taanclou luai lana, kaniw Galili khou, kaniw ramc kaidai Nazareth khou hanc guang dat the.#Met 2.23 40Kumna mi angana tei kapumc lwan daic thauna, kapumtan tanc thau the; kamei ningting padik the, khatni Ravguangc zauzian kakhou nai khwan e.

Alauc Jisu Ravkai khou Bammei

41Kumna Jisu pui pu tei tingkwm pum, Kaanpatpui Ngai khou Jerusalem thangc tat tanh tan bam khwan e.#Tat 12.1-27; Ria 16.1-8 42Kamei tingkwm ruhna kanei tangc pwkhou, kariak thei layna, Jisu kapui kapu lev mi ngai khang tei Jerusalem khou ngangh the. 43Ngay luaina, kapui kapu tei kai hanc dat pwkhou, alauc Jisu tei Jerusalem khou bam duc the. Tiki hei tei kaney thay mak khe. 44Kamei lay tat bam khuang de twna ningna kaney zaeng neih khat chaengkaamv tat guang the. Kumna kakai riangluaicmei khatni zaw thai zaw howmei pang khou kata phu the. 45Tiki phu tow lam mak khena, kata phu khang kaney Jerusalem thangc hanc ngangh dat the. 46Khoutei kamei Ravkai khou dinhpouc nunc pang khou dungcna, kaniw lat nkingna khatni kaniw khou lat thanvna bammei ta zaeng neih thumh tangv kaney ariw the. 47Kalat tei chuloumei guay rui katuang takh khatni karam dau khou tei ngak the. 48Kaney rui kata how pwkhou ngak the, kumna kapui rui, “Abungle, nang aney ta mi kumcna sw bammei hei tabui tuang cho? Nang pu aney thu lungh geicna nang ta phu tat bam tu the,” twna kakhou sa the.

49Khoutei Jisu rui kapui kaney khou sa the, “Tabui swna nangney ata phu bam tu cho? Ai apu kai khou bam nimei thouc e twmei nangney thay mak nah cho?” 50Khoutei kamei rui sa bammei kabac tei kaney thay mak khwan e.

51Khoutei Jisu kanei thei Nazareth thangc lay key dat the, kumna kaney lat piuna lungc bam kan the. Kapui tei mi guay hei kalung khou rylouna bam khwan e. 52Kumna Jisu tei ningting khou khatni kasaeng kadai khou khatni Ravguangc lev maansei rui kasyanmei khou daic thau khwan the.#1 Sa 2.26; Lat 3.4

Currently Selected:

LUK 2: RONGBSI

Highlight

Copy