JAHON 14
14
Jisu hei Pu khou Tat Nimei Chaeng e
1Jisu rui kaniw khou sa the, “Nangniw lung katuakc riu, Ravguangc khou lwm o, akhou ni lwm o.#lwm o hamh e thei lwm e. 2Apu kai thangc, nangniw bampui bamv khang mpeyna nai e; kum mak khwan e thei, ai nangniw khou salou puni tuang e. Mi khou tei nangniw bamv khang chamdaanvlou khang ai tat ni he.#hamh e thei Apu kai thangc kai mpeyna nai e; kum mak ge thei ai nangniw bamv khang kasiamh khang tat ni he twna ai nangniw khou salou ni tuang e. 3Ai tatna nangniw bampui bamv khang chamdaanvlou tang e thei, ai nangniw ta guang laa dat puni, kumna ai bampui bamv khou tei nangniw ni bam puni. 4Ai tat nimei bamv thangc tat nimei chaeng tei nangniw thay e.
5“Poubauhmei, nang tabui thangc tat nina cho twmei aniw thay mak ge; akumhna mi chaeng kiu aniw thay nina cho?” twna Thomas rui sa the.
6Jisu rui mundawna kakhou sa the, “Ai hei chaeng kiu the, nchumhmei kiu the khatni ringhmei kiu the. Apaan rui hamhna meic gaanv khat na sini aPu pamv tangc ngam mak ge. 7Nangniw ata thay e thei, nangniw aPu ta ni thay the,#Baanhhy baibal asaekc khou Nangniw ata thay khwan e thei, nangniw APu ta thay ni tuang e twna hylou e. kumna ntaw thu nangniw kata thay the khatni how the.”
8“Poubauhmei, Pu ta kiuc aniw khou lyanlou o; kum e thei aniw pian puni e,” twna Philip rui sa the.
9“Mi saan ai nangniw lev bam nchamc guang the; tiki Philip, nang ata thay mak he nah cho? Ata howmei tei aPu ta how tu the. Akumhna, ‘Pu ta kiuc aniw khou lyanlou o,’ twna sa dat ni hena cho? 10Ai aPu khou bam e khatni aPu akhou bam e twmei, Philip, nang lwm mak nah cho? Ai rui nangniw khou salou kanmei lat guay tei akhou rui pat tu hamh e. Akhou bammei aPu rui kataanv taanc bam tuang de. 11Ai aPu khou bam e khatni aPu akhou bam e twna samei hei nangniw lwm o. Kum mak ge thei, ai rui taancloumei taanv khou tei rui nangniw lwm o. 12Ai rui nangniw khou kaling siakna sa tuang e: Akhou lwmpui mei rui ai taanhmei hei taanc puni. Ngguay, mi khang tei suangc daihmei taanv sini kamei taanc puni, kalam thu ai aPu daeng thangc tat puni the. 13Nangniw tabui pw ni azanc khou neymei guay tei, Nah Mpouh khou rui aPu tik-hym tidaih khang ai rui taanclou puni. 14Nangniw rui tabui pw ni azanc khou#azanc khou: Baanhhy baibal asaekc khou azanc khou akhou neymei twna hylou e. neymei guay tei, ai rui taanclou puni.
Bumaengh Nthanmei Tii Key khang Nrianhloumei
15“Nangniw ata nzian e thei, alat piu puni, 16Ai rui nangniw khang Nkhavloumeipu baihmei gaanv khat aPu khou neylou puni, kumna tingsaeng nangniw ta bam nduangh bam khang kamei rui tiilou puni. 17Kamei hei mbaanv rui laatow ngam lakmei nchumhmei Bumaengc e. Kalam thu mbaanv thu kata how mak ge khatni thay mak ge; tiki nangniw thu kata thay e. Tabui cho tiki kamei nangniw ta bam nduangh bam e khatni nangniw lung khou bam puni.#Baanhhy baibal asaekc khou thu bam e twna hylou e.
18“Ai nangniw ta ganc nrulou ni tu hamh e. Ai nangniw daeng khou guang dat puni de. 19Asaanh makmei lungc khou mbaanv rui ata how dat ni tu hamh the, tiki nangniw thu ata how puni. Kalam thu ai ringc bam e, nangniw ni ringc bam puni. 20Ai aPu khou bam e, nangniw akhou bam e khatni ai nangniw khou bam e twmei mi nungc kiu nangniw thay puni.
21“Atuang latdanv guay hei laalou lana piupui mei tei ata nzianpui mei e. Ata nzianpui mei ta tei aPu rui nzian puni; ai ni kata nzian puni kumna ata kakhou ndauhlou puni.”
22Khoutei Iskariot hamhmei baihmei Juda rui, “Poubauhmei, nang ta mbaanv khou thu hamhna aniw khou na ndauhlou nimei kiu akumh nina cho?” twna thanv the.
23Jisu rui mundawna sa the, “Ata nzianpui mei tei alat piu puni. Apu rui kata nzian puni, kumna aPu lev ai kakhou guang lungc bam puni. 24Ata nzian makpui mei tei alat piu mak ge. Ai rui sa bammei lat hei akhou rui patmei lat hamh e, ata ndiu guangmei aPu lat de.
25“Nangniw lev bam nchamc bammei dak khou, mi guay hei ai rui nangniw khou dinclou tuang e. 26Apu rui azanc khou ndiu guang nimei Nkhavloumeipu, Bumaengh Nthanmei tei rui ramh lam guayna nangniw khou dinclou puni khatni ai rui nangniw khou saloumei guay hei kamei rui nangniw khou tiningtowlou puni.
27“Ai rui nangniw khang chuzaenghmei tiilou duc e. Atuang chuzaenghmei hei ai nangniw khang tii tuang e. Mbaanv rui tiimei kumcna ai tii mak ge. Nangniw lung ryanra riu khatni ping riu. 28‘Ai tat lana guang dat puni de,’ twna ai rui nangniw khou samei tei nangniw chu kan dyng the cho! Nangniw ata nzian e thei, ai aPu daeng thangc tat nimei khou hei nangniw neihla puni de; kalam thu aPu hei akhang suangc daic e. 29Guang tangc pwkhou nangniw lwm khang mi guay hei nangniw khou salou kasuakc bam tuang e. 30Ai nangniw khou lat sa saengc bam khang kaganv maek khe. Kalam thu mi mbaanv sinmeipu guang pw the. Kamei aruc khou kangamv maek ge; 31tiki ai aPu ta nzian e twmei mbaanv rui thay khang aPu lat piu nina di the.
“Thau tho, aniu mi khou rui tat pat di kho.”
Currently Selected:
JAHON 14: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
