JAHON 12

Meri rui Jisu khou Thauh Teyloumei

(Met 26.6-13; Mrk 14.3-9)

1Kaanpatpui Ngai khang zaeng charuk nai khou, Jisu Bethani khou guangna kamei rui tiringcthauloumei Lazaras kai khou bam khwan e. 2Kaniw rui kakhang zingbangc naptw khang chamdaanvlou the. Martha rui siamruai sw bam khwan e, tiki Lazaras tei thu tuzangv khang Jisu lev dungc bammei pang khou lay kazauh bam khwan e. 3Meri rui kamanv kunghmei mwnduithauc liter kapaek doumei haan laana Jisu phay khou bunlouna kasam rui thutlou the. Mi namh gaymei thauc rym tei rui mi kainung kapwm tei padik the.#Luk 7.37-38 4Jisu ziap gaanv khat, kata zuanctu nimeipu Juda Iskariot rui sa the, 5“Mi hei daandi syanpaek#6.7 tei zauc o. phay thumh khang zuanc lana lungcsimei nunc khang tii damc bu cho!” 6Kamei mi hei samei hei lungcsimei nunc khang kadanna sa tu hamh e, tiki kamei thu kaihouhmei e. Kamei meic geihmei tuang syankhau phungc lana, mi khou tei rui kakhang num laa raph rap bam lana e.

7Khoutei Jisu rui sa the, “Kata sw kaguakclou ti riu! Katuang naimei tei ata mbeihmei nungc khang lou kan dio. 8Lungcsimei nunc thu nangniw lev bam nchamc tanh tan bam puni de, tiki ai thu nangniw daeng khou bam tanh tan ni tu hamh e.”#Ria 15.11

Lazaras ta Swluai khang Swmei

9Jisu Bethani khou bam e twmei meic kangdai tei chu lana, kaniw mi thangc tei tat the. Jisu zaeng khou rui na hamhna, Jisu rui tiringcthauloumei Lazaras ta zauh khang ni e. 10Kum tina amuh daihmei nunc kaphianhna Lazaras ta ni swluai khang sw the. 11Kalam thu kazaeng khou rui Jihudimei mpeyna kaniw lat laa makna, Jisu khou lwmlou the.

Jisu Jerusalem khou Guangh Swna Gutmei

(Met 21.1-11; Mrk 11.1-11; Luk 19.28-40)

12Nthuanh thauna, nngay khang guang bammei meic kangdai tei Jisu Jerusalem khou guang pu the twmei chu the. 13Kaniw tadanv kuang puancna, “Hosanna! Poubauhmei zanc khou guangmeipu, Isaraelmei guangc ti hei suaihiamlou o,” twna kaucna kata ariw khang pat the.#Kal 118.25,26 14Jisu kuanniam launa akhat ariwna mi khou tei tuangc the. Mi hei,

15“Ping riu, he Zaion kaidai!

Nang guangc guang the,

kuanniam launa khou tuangcna guang the.”

twna Nthanmei Latrik khou hylou bammei tei the.#Zek 9.9

16Kaziap nunc tei mi ganv khou tei thu mi kabac tei thay mak khwan e; tiki Jisu ta hymdaihmei khou tiringcthaulou dat pwkhou, Nthanmei Latrik rui sa bammei hei Jisu lam khou the twmei khatni kaniw mi hei Jisu khang swlou tuang the twmei ningtow the.

17Jisu rui Lazaras ta tarou khou rui kaw patna, tiringcthaulou datmei ganv khou bammei nunc rui mi lam khou tei meic nunc khou raclou the. 18Jisu rui mi sw-nchinmei taanv hei kakhou taanclou e twna chu lapui zaeng rui, meic kangdai tei Lazaras ta ariw khang guang tuang e. 19Khoutei Pharisimei nunc rui khat khat khou sa the, “Zauc tho nangniw rui sw bammei hei nsa di the! Kandih kapwm kathei lay kan the!”

Grikmei Gaanv Saekc rui Jisu ta Phumei

20Mi ngai khou hei kalum khang guangmei pang khou Grikmei gaanvsaekc kazauh khwan e. 21Galili ramv tuang Bethsaida kaidaimei Philip daeng khou kaniw guangna, “Haicpouc, aniw Jisu ta ariw nii e,” twna sa the.

22Philip rui hei tei Andriu khou salou tina, kaney tatna Jisu khou salou the. 23Jisu rui kaniw khou mundawna sa the, “Meic Nac Mpouh ta kahym tidaiclou nimei ganv guang the. 24Ai rui nangniw khou kaling siakna sa tuang e: Gehu thw akhat tei kandih khou keyna theiclou mak ge thei, mi thu tei mbu pat mak ge, tiki hei tei theiclou e thei kathai mpeyna nthai the. 25Thow pw ni karingcpaan ta nzavpui mei tei hei tei maan puni; thow pw ni mi mbaanv khou karingcpaan ta nzav makpui mei tei ringcsuangmei ringcpaan laa puni.#Met 10.39; 16.25; Mrk 8.35; Luk 9.24; 17.33 26Thow pw ni asiamruai sw nii tw e thei kamei athei lay nina e, kumna ai bampui bamv khou tei asiamruai swpui mei tei ni bam puni. Asiamruai swpui mei ta tei aPu rui chakhwang swlou puni.

Jisu rui Kamei Theic Nimei lam khou Saloumei

27“Ntaw alung katuakc the—ai tabui lat sa kho cho? ‘Apu mi ganv hei akhou tiguanglou rio!’ twna sa kho cho? Hamh e; mi khang rui ai guang tu the. 28Apu nang hym tidaiclou o!”

Khoutei, “Ai rui hei tei tidaiclou kan the, tidaiclou dat puni he,” twna tingkauh thangc rui kauc key the.

29Mi khou tei ding bammei meic kangdai tei hei tei chu the, kumna gaanvsaekc rui, “Ganh key tina e,” twna sa the, baihmei gaanv saekc rui, “Kauh baanchara rui kata kachuc tina de,” twna sa the.

30Khoutei Jisu rui kaniw khou sa the, “Mi khwan hei akhang hamh e, nangniw khang de. 31Ntaw hei mi mbaanv ta latzan sw puni the; ntaw mi mbaanv tuang dihsinpouc ta alay pat puni the. 32Ata kandih khou rui zay thau pwkhou, meic guayna ta ai rui akhou zay guang puni.” 33(Mi hei kamei akumhmei ramthei theic puni cho twmei sa tuang e.)

34Meic kangdai tei rui sa the, “Aniw tuang Riakdanv khou rui chumei thu, Khrista thu tingsaeng ringc bam puni twna sa e. Mi kum e thei, akumhna, ‘Meic Nac Mpouh ta zay thau puni,’ twna nang sa tu cho? Mi Meic Nac Mpouh kiu thow tei cho?”#Kal 110.4; Isa 9.7; Eze 37.25; Dan 7.14

35Jisu rui mundawna sa the, “Nangniw pang khou gaanhmei hei bam kanak puni he. Gaanc bammei dak khou tat la tho, hamh e thei zingc namv lamc e. Kalam thu zingh khou tatpui mei tei thu kamei tabui thangc tat bam tu cho twmei thay mak ge. 36Nangniw gaanhmei nac nunc sw khang, gaanhmei hei nai bam khou, nangniw mi khou hei lwmlou la tho.”

Meic nunc rui Lwm Makmei

Jisu mi hei salou tang lana tat pat kan the, kumna kaniw khou rui nkamh kan the. 37Kamei rui mi sw-nchinmei taanv guay hei kaniw hu khou taanclou tisini, kaniw kakhou lwmlou mak ge. 38Mi hei, “Poubauhmei, thow rui aniw tuang lat ta lwm thena cho? Thow khou Poubauhmei rui kapumtan lyanlou kan thena cho?” twna muhzwng Isaia rui hyloumei tei guang tangh khang e.#Isa 53.1

39Mi kumna kaniw lwmlou ngam mak khe, kalam thu Isaia rui mi kumcna salou e:

40“Kaniw mik how mak khang,

khatni kaniw lungning ning pat thay mak khang,

kumna ai rui kaniw ta tigaylou khang akhou guang mak khang,

Ravguangc rui kaniw mik swtiatlou kan the,

khatni kaniw lungning ti-ndylou kan the.”#Isa 6.10

41Isaia rui mi hei kamei Jisu tuang tikgunc how lana, kalam khou sa tuang e.

42Kum bam sini, Jihudimei kapy nunc ni meic mpeyna Jisu khou lwmlou de; tiki kaniw ta sinagog khou rui alay ganc pw khang Pharisimei nunc ta ping lapui zaeng rui, kaniw lwm the twmei thu sa pat mak khe. 43Kaniw Ravguangc rui thuancloumei ta suangc, maansei rui thuancloumei ta kahaw the.

Jisu Lat rui Latzan Swmei

44Jisu rui kaucna sa the, “Akhou lwmpui mei tei akhou na lwm tu hamh e, ata ndiu guangmeipu khou ni lwm tuang e. 45Ata howpui mei tei ata ndiu guangmeipu ta how the. 46Akhou lwmloumei guay tei zinghmei khou bam dat mak khe. Ai mbaanv khou gaanhmei swna guang e. 47Alat hei chu laki piu makpui mei ta tei, ai latzan sw lak ge. Ai mbaanv ta latzan sw khang guang tu hamh e; mbaanv ta kanlou khang de. 48Ata laalou makpui mei khatni alat ta laalou makpui mei ta tei, nkhamhpui nungc ai rui sa pat kanmei lat guay tei rui latzan sw puni. 49Kalam thu, ai arana achwnphuakh khou rui sa tu hamh e; ata ndiu guangmei aPu rui sa o twmei tei ai sa tuang de. 50Katuang latdanv rui ringcsuangmei phungc guang e twmei ai thay e. Hei zaeng rui, ai rui samei hei Pu rui sa o twna samei lat re.”

Currently Selected:

JAHON 12: RONGBSI

Highlight

Copy