THAUREYMEI 48

Jakob Josep Nac Nei ta Suaihiamloumei

1Kanakmei tangv kapu nnau bam e twmei Josep khou dinclou the. Kumna Josep tei kanac nei, Manase lev Ephraim ta nduanghna kapu ta zauh khang guang the. 2Kanac Josep kata zauh khang guang e twmei Jakob khou dinclou pwkhou kapumtan kaluan thauna kalaeng khou thau dungc the. 3Jakob rui Josep khou sa the, “Ngamparymei Ravguangc rui Kanaan kandic khou Luz twna kawmei bamv khou akhou guangna suaihiamlouna#Tha 28.13,14 4kumna sa the, ‘Ai rui nangkik nangta tikingckiuclou puni the, nang kikta khou rui kaikhwang mpeyna lungc pat puni the; mi kandic hei nang kikta tuang tingsaengzaeng dic sw khang tii puni the.’ ”

5Jakob rui kumna sa dat re, “Joseple, ai key makmei hu khou rui Izip kandic khou rui puanhmei nang nac mpouh gaanv nei tei ni anac de; Reuben lev Simeon tei anac swmei lev nchamcna Ephraim lev Manase hei ni anac de. 6Lungc guang dat nimei nang nac mpouh nunc tei thu nang tuang di the; kaniw rui laa nimei ramvdui guay tei Ephraim lev Manase khou rui laa nina the. 7Nang pui Rachel zaeng rui mi hei kaphianhloumei tuang the. Azaengsimei kiu thu aney Mesopotamia thangc rui hanc guang datmei chaenglwan khou Kanaan kandic khou Ephrat namv guang tangh khang rambiuc dou nai khou kamei theic kan the. Ai rui mi bamv khou tei Ephrat chaeng daeng khou mbeihlou kan the.” (Ephrat tei ntaw thu Bethlehem twna kaw the.)#Tha 35.16-19

8Jakob rui Josep nac nei ta how lana “Mi nggaanv nei hei thow cho?” twna thanv the.

9“Mi nei hei Ravguangc rui akhou mi Izip kandic khou rui tiiloumei mpouh nei kiu the,” twna Josep rui daw the.

Jakob rui sa the, “Kaney ta adaeng khou nduangh guang o, ai rui suaihiamlou puni e.” 10Jakob tei karapouc tithena kamik how nthan-ntha mak khe. Josep rui kaney ta kadaeng khou nduangh guang tina kamei rui kaney ta pamcna kaput the. 11Jakob rui Josep khou sa the, “Ai nang zaw how dat pwng e twmei khat sini ning mak khe, tiki ntaw Ravguangc rui atou nei ta ni tihowlou the,” 12Hei tangv tei Josep rui kaney ta tei kapouc pamv khou rui zay pat dat lana kazaw kandih key tangcna kalum the.

13Josep rui Ephraim ta baanzat khatni Manase ta baandau thangc zayna kapu daeng khou nduangh guangna Ephraim ta kapu baandau thangc Manase ta baanzat thangc lou the. 14Tiki Jakob tei kabaanc haamv zarih patna alaucmeipu Ephraim khou tei kabaanzat khatni gaanvthaihmeipu Manase py khou kabaandau mbaenglou the. 15Kamei rui kumna sana Josep ta suaihiamlou the:

“Apu apouc Abraham khatni Isak rui kalum guangmei Racguangc rui mi nac nei khou hei suaihiamlou di tho!

Aseic nganvna ata zaylou bammei Racguangc rui mi nac nei ti hei suaihiamlou di tho!

16Theic sucnumei bamv guay khou rui

ata kanloumeipu baanchara tei rui mi nac nei ti hei suaihiamlou diu tho!

Azanc khatni apu apouc

Abraham lev Isak zanc hei mi nac nei khou rui nai bam kan di tho!

Kaney kikta kingckiucna kandih nam ruc khou lungc kan diu tho.”

17Kapu baanzat tei Ephraim py khou lou bammei ta howna Josep tei neihla mak khe. Kumna Josep rui kapu baanzat tei Manase py khou mbaenglou khang Ephraim py khou rui sin thauna 18kapu khou kumna sa the, “Apule, hei tei hamh the, mi hei gaanvthaihmei de; nang baanzat kapy khou mbaenglou nimei tuang de.”

19Kapu rui daw e, “Ai thay de, anacpule, Manase kikta hei ni khwang daihmei sw puni e. Tiki kakainac rui kasuangc daic puni e, kumna kakikta tei khwang daihmei sw puni e.”

20Kamei rui kumna sana kaney ta suaihiamlou the: “Isaraelmei rui suaihiam tii khou kumna nangney zanc panc puni the: ‘Ravguangc rui nang ta Ephraim ta kumc khatni Manase ta kumc swlou pu di tho.’ ” Heikumna Jakob rui Ephraim ta Manase hu khou lou the.#Ibr 11.21

21Hei tangv Jakob rui Josep khou sa the, “Ai theic zaic kan puni the twmei nang how the, Ravguangc rui nangniw ta nduanghlou puni kumna nangniw ta nangniw pupouc kandic thangc tei nduangh guanglou dat puni e. 22Amormei nunc khou rui abuy-abaeng rui laaloumei ramv gaymei Sekem tei nang khang na tiilou the; nang chaic nunc khang thu hamh e, nang khang na de.”

Currently Selected:

THAUREYMEI 48: RONGBSI

Highlight

Copy