THAUREYMEI 46

Jakob Kai Izip khou Keymei

1Jakob rui katuang naimei guay phungcna Beersheba twna kawmei bamv khou guangna kapu Isak Racguangc khou khaeng the. 2Ravguangc rui zingbangc ndawman khou “Jakob, Jakob” twna kauc guang the. “Ai khou hei bam e” twna Jakob rui daw the.

3Khoutei Ravguangc rui sa the, “Ai hei Ravguangc e, nang pu tuang Ravguangc e. Izip kandic thangc key khang ping nangh e; hei khou tei ai rui nang kikta ta zaatc daihmei tiswlou puni. 4Ai nang lev Izip thangc tei key nchamc puni de, kumna nang kikta ta ai rui mi kandic khou hei nduangh guanglou dat puni de. Josep rui nang buc sin tutlou puni de.”

5Jakob tei Beersheba khou rui tatpat the. Kanac nunc rui kata khatni kaniw now nac nunc ta Izip guangc rui thouc guangmei gari pang khou tei lou the. 6Kaniw rui kaniw tuang khouringh khounah guay khatni Kanaan kandic khou rui lungc patmei puat guay tei phungcna Izip thangc key the. Jakob rui kakik kata guay ta nduangh key the:#Lat 7.15 7Kanac mpouh aluh nunc khatni katou mpouh aluh kaguayna ta nduanghna key the.

8Jakob kamei rui Izip thangc nduangh keymei kakai kaikhuncmei nunc kiu mi hei the: kanac gaanvthaih liangmei Reuben, 9Reuben nac mpouh nunc: Hanok, Pallu, Hezron khatni Karmi 10Simeon nac mpouh nunc: Jemuel, Jamin, Ohat, Jakin, Zohar, khatni Kanaanmeipui rui puanhmei Shaul. 11Levi nac mpouh nunc: Gershon, Kohat, khatni Merari. 12Juda nac mpouh nunc: Sela, Perez, khatni Zera (Juda nac Er lev Onan thu Kanaan khou theiclou kan the.) Perez nac hei Hezron lev Hamul e. 13Isakar nac mpouh nunc: Toala, Pua, Jasup, khatni Simron. 14Zebulun nac mpouh nunc: Sered, Elon, khatni Jaleel. 15Mi nac mpouh nunc hei Jakob now Lea rui Paddan aram khou rui puanhmei e. Kanac aluhpui Dina lev twna Lea khou rui lungc guangmei nac mpouh aluh nunc hei gaanv 33 the.

16Gad nac mpouh nunc Zephon, Haggi, Shuni, Ezbon, Eri, Arod khatni Areli. 17Aser nac mpouh nunc Imna, Isva, Isvi, Beria, khatni aluhpui Sera. Beria nac hei Heber lev Malkiel ne. 18Mi Jakob kik gaanv 16 hei Laban rui kanacpui Lea bangc khang tiimei Zilpa khou rui lungc guangmei nunc the.

19Jakob now Rachel rui mpouh gaanv nei Josep lev Benjamin ta puanclou e. 20Josep tei kanow amuh Potiphera nacpui Asenat khou rui mpouh gaanv nei Manase lev Ephraim puanc e.#Tha 41.50-52 21Benjamin nac mpouh hei Bela, Beker, Ashbel, Gera, Naaman, Ehi, Ros, Muppim, Huppim, khatni Arda re. 22Mi gaanv 14 hei Rachel rui puancloumei Jakob kikta nunc e.

23Dan nac mpouh Husim, 24Naphtali nac mpouh nunc: Jazeel, Guni, Jezer, khatni Sillem, 25mi gaanv chanei hei Laban rui Rachel bangc khang tiiloumei Bilha rui puanhmei Jakob kikta nunc e.

26Jakob khou rui lungc guangmei kikta, kamauc nunc ta chaklou makna Izip khou keymei kaguayna gaanv 66 ge. 27Izip khou rui puanhmei Josep nac mpouh gaanv nei nai e. Kumna Jakob kai kaikhunc Izip khou guang lunghmei kapwmna meic 70 khwan e.#Lat 7.14

Jakob Kai Kaikhunc Izip khou

28Kaniw khou Gosen bamv dinclou khang Josep ta kaw khang Jakob rui Juda ta thouclou hu kan the. Kaniw tei Gosen ramv lungc khou guang tangc pwkhou, 29Josep tei takuanh gari tuangcna kapu ta ariw khang Gosen khou guang the. Josep tei kahu khou tei guangpui lev kamei rui kapu ta kaputna pamcna kap saengc sihna kap the. 30Jakob rui Josep khou sa the, “Ntaw mu ai nang zawpaanv howna nang ringc bam de twmei thay thena theic zuh zuna theic diu the.”

31Khoutei Josep rui kachana nunc khatni kapu kai kaikhuncmei guay khou sa the, “Kanaan khou lungc bammei achana nunc khatni apu kai tei key the twna Pharao khou salou khang tat kan ni the. 32Kaniw hei khouringh nruaihmei nunc e kumna kaniw tuang lauziu pang khatni kiruai guay khatni baih baihmei kaniw khou naimei guay phungc key the twna salou puni the. 33Pharao rui nangniw ta kaw guangna nangniw tabui taanv taancna lunghmei nunc cho twna thanv pw e thei, 34aniw pupouc nunc rui sw guangmei kumcna aniw hei khouringh nruaihmei nunc e twna sa o. Kum ti thei Izipmei nunc thu lauziu nruaihmei nunc ta lungc kariu khang karaeng lana, kamei rui nangniw ta Gosen ramv khou tilungclou puni the.”

Currently Selected:

THAUREYMEI 46: RONGBSI

Highlight

Copy