THAUREYMEI 44

Buangh Amaanmei

1Josep rui kakai tuang tamvthiwmeipu khou tei sa the, “Mi kai chana nunc puat khou tei kaniw rui phungc tat diw saanv thimclou ti tho, kumna kaniw tuang syan guay tei kapuat kapuat khou tei tinc binlou ti tho. 2Alauc liangmeipu khau py khou tei katuang nap manv lev atuang daandi buangc hei tinc binlou ti tho.” Hei tei kumcna kamei rui taanclou kan the. 3Lauthwan gaanc patpui lev mi kai chana nunc ta kaniw tuang kuanniam nunc lev twna ti tat kan the. 4Kaniw tei kaidai khou tei rui asaanh tatpat makmei dak khou Josep rui kakai tuang tamvthiwmeipu khou tei sa the, “Mi nunc ta tei katumcna nthau tat tho. Kumna lay tangc pwkhou heikumna sa tho, ‘Nangniw tabui swna nangniw khang sw chuylou tiki simei taanv taanclou ducna tat tu cho? Nangniw tabui swna akaipouc tuang daandi buangc houc kan tu cho? 5Hei tei kamei zangv bammei buangc e, hei tei kamei rav ta kachuc khou sinswmei buangc e. Nangniw rui sw bammei hei nunei tuang di the.’ ”

6Kabangcpu tei rui kaniw ta lay tangh pwkhou kaniw khou mi lat tei kahak sa the. Kaniw rui kakhou kumna daw the, 7“Kaipoucle, tabui lat cho sa bammei kiu? Rav rui thay puni, aniw hei kumhmei tei khat sini sw mak ge. 8Aniw puatzwang khou nai bam khwanmei syan tei ni aniw Kanaan kandic thangc rui phungc key dat de twmei nang thay the. Akumhna aniw nang kaipouc kai tuang kachaekc daandi tei houc bam nina cho? 9Kaipoucle, mi kiu thowkumhmei khou nai bam khwan e thei mi pu ta kiuc mu swluai tho, kumna baihmei aniw guay nang bangc sw puni the.”

10Kamei rui kumna daw the, “Ai nuh the, buangh tei howmeipu na tei abangc sw nina the, baihmei nunc thu tat dat tho.” 11Kumna katumcna kaniw puatzwang kandih khou lou keyna meic kathuicna kapuat kapuat ric pat the. 12Josep bangcpu tei gaanvthaih liangmeipu khou rui thauna akhat akhat swna kaniw puat guay tei kathamna zauc thau the, kumna nkhamh liang khou Benjamin puatzwang khou buangh tei nai bam khwan the. 13Khoutei kakai chana nunc tei kaniw lung kabiuna kaniw phey siat kaek the, kaniw tuang kuanniam nunc puat tei swlou dat lana kaniw kaidai thangc tei hanc guang dat the.

14Juda tei kakai chana nunc lev twna Josep kai khou guang dat pwkhou Josep tei kakai khou tei bam khwan di he. Kaniw nkhum keyna kata kalum the. 15Josep rui kumna sa the, “Tabui tuang thav nangniw rui sw bammei hei? Ai kumhmeipu hei rui na thu rav lev kachucna thay pat puni de twmei nangniw thay makna cho?” 16Juda rui daw the, “Kaipoucle, aniw nang khou tabui lat sa khona cho thay mak khe. Akumhna aniw lam khou hei sa nthan dat nina cho? Ravguangc rui nangbangc nunc aniw khuay ndauh pat the. Ntaw thu kakhou rui buangh tei kariw patmeipu na hamhna aniw meic guayna hei akaipouc nang bangc di the.”

17Josep rui daw the, “Meicnu-meicnei e, ai heikumna sw bam ni tuang hamh e! Kakhou rui buangh tei kariw patmeipu na tei abangc sw nina de. Baihmei nangniw thu gayna nangniw pu daeng thangc tat dat tho.”

Benjamin ta Mpatlou khang Juda rui Samei

18Juda rui Josep daeng khou guangna sa the, “He kaipoucle, nang hei Pharao kumhmei di the, kum sini rouh tuang maekna nang bangc ai rui nang khou lat kaeng akhat na salou khang nuhlou o, nang bangc ata lungpuamhlou rio. 19Nangniw pu nai bam dai cho, nangniw kainac baihmei ni nai cho? twna kaipouc nang rui thanv khou tei 20aniw rui kumna dawlou kan the, ‘Aniw pu karapouc akhat nai e, khatni kamei karapouc key khou puanhmei nac nggaanvmei gaanv khat nai e. Nkhiwmeipu tei lev pui khat na khou rui puanhmei kachaic thu theic kan the, kum tina aniw pu rui kata kungc liang e.’ 21Kaipouc nang rui kata kiuc zauc nii e nduangh key o twna sa khou tei nangbangc aniw daw khwan e 22mi pu tei kapu ta ganclou nuh mak ge, kapu ta ganclouna tat kan ti thei kapu tei theic kan ni the twna aniw daw kan e. 23Tiki ‘nangniw kainac alaucliangmei ta kiuc nduangh guang mak ge thei ata ariw dat nuh mak khe’ twna kaipouc nang rui sa the.

24“Kaipouc nang rui samei tei nang bangc aniw pu khou salou the. 25Nap law tat dat khang aniw pu rui aniw ta thouc dat pwkhou aniw rui kakhou kumna sa the, 26‘Aniw tat dat ngam mak khe, nkhiwmeipu ta kiuc nduangh key mak ge thei aniw mipu ta kiuc ariw dat nuh mak khe,’ twna sana di the. Aniw rana thu tat dat lak khe! 27Kum tina nang bangc aniw pu rui kumna sa the, ‘Nangniw pui Rachel rui puanhmei mpouh gaanv nei na de twmei nangniw thay e. 28Kaney pang khou gaanv khat tei thu ata ganclouna tat kan the. Kata tei nwmbangc khouringc rui siat puat paruat key kanna khwang di the kamei tat kanmei tangv tei kata ariw dat zat mak khe. 29Nangniw rui ntaw mipu ti hei akhou rui nduangh tatna kakhou si suaimei patlou nangc e thei, nangniw rui azaeng tisilouna karapouc ati hei tarou khou tikeylou nina di the.’

30“Kumna ntaw hei apu daeng thangc hanc guangdat pwkhou nggaanvpu hei aniw lev guangdat nchamc mak e thei, mi nggaanvpu ta kalungthw sw bammei apu rui 31mi nac hei hanc guangdat mak khe twmei how pwkhou, kamei ringcbam ngam nitu hamh the. Kamei karapouc di the kumna aniw rui kazaeng tisiloumei kumcna kazaeng simei tei rui kapanty luaipwng di the. 32Nang bangc apanty hei akai nac khang apu khou sindaanclou duc kan the. Ai rui kata nduangh guang dat mak ge thei mi nwan tei ai apanty saanvsaengh phungc bam kan ni the twna apu khou ai rui salou kan the. 33Hei zaeng rui kaipoucle, akainac phaan ai nang bangc sw ni the; kata kachaic nunc thei ndiulou dat pu tho. 34Akai nac ta nduangh guang dat makna akumhna ai apu daeng khou guang dat nina cho? Apu khou pat pw nimei ryanra zaengsimei ta ai zauc ngam lak ge.”

Currently Selected:

THAUREYMEI 44: RONGBSI

Highlight

Copy