THAUREYMEI 33

Jakob Esau ta Ariwmei

1Esau kamei nunc 400 ta nduanghna keymei ta Jakob how lana, kanac nunc ta tei kapui pui khou nzanhlou the. 2Kumna kamei rui kabangcpui nei ta kaney nac nunc tei lev twna hu khou lou the, hei tangv Lea lev kanac nunc, thei liang khou Rachel lev Josep ta lou the. 3Jakob tei tat hu patna kachaic daeng khou guangna kandih nkhum key tangcna kalumliang chanei the. 4Esau rui pak guangna kata pamcna kaput the. Kaney gaanv neimei kap the. 5Esau tei zauc ngguic guicna meicpui nunc khatni alauc nunc ta how lana, “Mi nang thei lay guangmei nunc hei thu thow thow cho?” twna kamei rui thanv the.

“Mi nunc hei Ravguangc rui zauc nzianna nangbangc akhang tiiloumei nac nunc the,” twna Jakob rui daw the. 6Hei tangv banghpui nei tei kaney nac nunc lev twna guangna nkhum keyna kalum the; 7hei tangv Lea tei kanac nunc lev guang the, kumna nkhamh liang khou Rachel lev Josep tei guangna nkhum keyna kalum the.

8“Ai rui hu swangna ariwmei kang tei tabui swmei kang cho? Hei tei tabui kabac cho?” twna Esau rui thanv the.

“Akaipouc, nang rui zauc nzianlou pw diu khang mitei tiiguangmei tuang the,” twna Jakob rui daw the.

9“Akainacle, akhang biucna nai de; nang khang lou rap do,” twna Esau rui daw the.

10“Kiuc hamh e, nang rui ata nzian e thei, atuang kaipat hei laalou na ro. Nang zaw howmei hei akhang thu Ravguangc zaw howmei kumh tuang di the, ntaw nang rui ata heidikamv nzianlou the. 11Ai rui nang khang phungc guangmei mi kaipat hei laalou na ro; Ravguangc rui ata heidikamv nzianlouna akhang kage naimei kaguayna tiilou the,” twna Jakob rui sa the. Kamei rui heikumna sana bam tina Esau rui laalou the.

12“Guang di kho. Ai nang hu khou tat puni the,” twna Esau rui sa the.

13Khoutei Jakob rui daw the, “Akaipouc, alauc nunc hei suan e twmei nang thay e, kanac nduanghmei lauziu pang khatni guaih pang khang kakhanh mak nuh mak ge. Zaeng neih khat na sini hac ranvna tat tithei, khouringh guay hei theic ngam kan pwng e. 14Kum thena akaipouc nang guang hulou tho, nang bangc ai nzaengna lay guang puni the, khouringh pang khatni alauc nunc ta kapuyna Edom khou akaipouc nang ta lay tangh khang ntaanv guang puni the.”

15“Kum e thei, amei nunc gaanvsaekc ta ganclou duc puni the,” twna Esau rui sa the. “Apoubauhmei rui ai kumhmei ta heidikamv kha kadan bam ni cho twna Jakob rui daw the.” 16Kumna mi nungc tei Esau tei Edom thangc hanc dat kan the. 17Tiki Jakob thu Sukkot thangc tatna khou tei kakai khang khatni khouringh nunc kai khang kasiamhlou the. Kum tina mi bamv ta tei Sukkot twna kaw the.

18Mesopotamia thangc rui guang dat khou Jakob tei Kanaan kandic tuang Sekem kaidai gayna guang tangclou the, kumna mi kaidai daeng khou ramvpuk khou zypui kai kasiamh khwan e. 19Kamei mi khou tei ramvpuk akhat Hamor kikta, Sekem pu khou rui daandi paek 100 khang liu the kumna mi khou tei pheykai katingh thau khwan the.#Jos 24.32; Jhn 4.5 20Khoutei kamei rui ravchabamv kasiamh thau the, kumna mi ta tei El-Elohe Isarael twna kaw the.

Currently Selected:

THAUREYMEI 33: RONGBSI

Highlight

Copy