THAUREYMEI 30

1Ntaw Rachel tei thu kanac gaanv khat na sini puanh mak khe, kumna kamei kachaic ta mamavna “Akhang nah tii tho, kum mak ge thei ai theic kan ni the,” twna Jakob khou sa the.

2Jakob rui Rachel ta kalungpuamcna, “Ai hei nang ta tinakamcloumei Racguangc tei dina cho?” twna sa the.

3Rachel rui sa the, “Abangcpui Bilha nai e, kamei rui akhang ngana puanclou diu khang nang kakhou tatlou tho. Kumna kakhou rui ai nahpui sw khang di the.” 4Kumna kamei rui Bilha ta kagaanv khou tiilou the. Jakob rui kakhou tatlou the. 5Bilha kapumc nritna Jakob nac mpouh akhat puanc the. 6“Ravguangc rui akhang tamzanh chuylou the. Kamei rui aravsuai chulouna akhang nah mpouh akhat tiilou the,” twna Rachel rui sana mi nac zanc tei Dan twna phuaklou the. 7Bilha Rachel bangcpui, kapumc nrit datna Jakob nac mpouh kaneimei puanc dat the. 8“Achaicluc lev ai athwng ranv sihna athwng the, kumna ai rui ngam the,” twna Rachel rui sana mi zanc tei Naphtali twna phuaklou the.

9Lea nah puanckam the twmei thay lana kabangcpui Zilpa ta Jakob now khang tii the. 10Kumna Lea bangcpui Zilpa tei Jakob nac mpouh akhat puanc the. 11“Sangay the” twna Lea rui sana mi nac zanc tei Gad twna phuaklou the. 12Zilpa tei Jakob nac mpouh kaneimei ni puanc dat re. 13“Ai adih neihla cho! ntaw thu meicpui nunc rui ata neihlameipui twna kaw puni the” twna Lea rui sana mi zanc tei Aser twna phuaklou the.

14Gehu Lautay ganv khou Reuben laupuk thangc tat ki mandarak bang ariw the. Hei tei kamei rui kapui Lea khou laaguang the. “Nang nac tuang mandarak bang akhang ni asaekc tii o,” twna Rachel rui Lea khou ney the.

15“Nang agaanv ta asutmei tei na rui pian makna anac tuang mandarak bang hei sini asut dat ni hena cho?” twna Lea rui luh the. “Nang nac tuang mandarak bang tei akhang tii pw e thei, aseic zingbangc hei Jakob rui nang khou tatlou kan di tho,” twna Rachel rui sa the.

16Tingzyn Jakob tei lau thangc rui guang pwkhou Lea rui tat ariu patna “Aseic nang adaeng khou zip nina the, kalam thu anac tuang mandarak bang rui nang ta liulou tang the,” twna sa the. Kumna mi nungc zingbangc tei kamei rui Lea khou tatlou the.

17Ravguangc rui Lea rui huayneymei chulouna, kamei kapumc nrit dat the, kumna kakhou rui Jakob nac mpouh panguhmei puanc the. 18“Ai rui abangc ta agaanv khang tiimei swan Ravguangc rui akhang tii the,” twna Lea rui sana kanac mpouh zanc tei Isakar twna phuaklou the. 19Lea kapumc nrit datna Jakob nac mpouh charukmei puanclou dat the. 20“Ravguangc rui akhang kaipat gaymei tiilou the, ai rui kanac mpouh gaanv charukmei puanclou tina agaanv rui ata ningkungc puni muay di the,” twna Lea rui sana kamei rui mi nac zanc tei Zebulun twna phuaklou the. 21Mi tangv kamei aluh akhat puanc dat the, kazanc Dina twna phuaklou the.

22Ravguangc rui Rachel ta ningtowlou the, kumna kamei rui huayneymei Ravguangc rui dawlouna kakhou nahbamv laanclou the. 23Kumna kamei kapumc nritna nah mpouh akhat puanc the. “Ravguangc rui ai zakmei laa ganclou the. 24Ringhpouc rui akhou nah mpouh akhat ni tiilou dat pw diu o,” twna kamei rui sana mi nac zanc tei Josep twna phuaklou the.

Jakob rui Laban ta Lat Athwngmei

25Josep ta puanhmei tangv Jakob rui Laban khou sa the, “Ata mpatlou dat tho, ai akandih akai thangc tat dat kan ni the. 26Ai rui phicloumei anow anac nunc ta tii pat tho, ai tat kan ni the. Ai nang khang rui adih nang siamruai sw chuylou kan the twmei nang thay the cho.”

27Laban rui kakhou daw dat the, “Ringhpouc khou thanv pwki nang paan rui Ringhpouc rui ata suaihiamlou the twmei dinclou the. 28Nang tuang taanvphy kiu sa tho, ai tiilou ni the.”

29Jakob rui daw the, “Ai rui tukumhna nang khang taanclou kan tu cho khatni tukumhna abaanc khou nang tuang kiruai pang kingckiuc pat kan tu cho twmei nang thay the cho. 30Ai guang mak khou katit na nai bammei tei ntaw thu kasing geicna kingc pat the, khatni ai tatloupui bamv kathuic khou Ringhpouc rui nang ta suaihiamlou the. Ntaw thu ai ni akhang zauc dat biuc the cho.”

31“Ai nang khang tabui tii o twna cho” twna Laban rui thanv the.

Jakob rui daw the, “Ai kaphy kadam laa nii mak ge. Ai rui samei hei nuh e thei ai rui nang tuang lauziu gaengclou bam nuh de. 32Aseic hei ai nang tuang lauziu pang khou tatna miwmei lauziunac lev nraengmei khatni tarikmei ziuh launa guay akhang laa ni the. Ataanv phy khang ai kahawmei kiu mi hei di the. 33Ai lungning nthanmei nthan makmei thay nuangc puni the. Nang rui ataanv phy zauh khang guang pwkhou, nraeng makmei khatni tarik makmei ziuc nai e thei khatni miw makmei lauziu nai e thei hei tei houhmei tuang the twmei nang thay puni the.”

34“Nuh the. Nang rui samei kumcna sw di kho,” twna Laban rui daw the. 35Tiki mi nungc tei Laban rui nraengmei khatni tarik-tarouhmei ziuchic guay, nraengmei khatni tarik-tarouhmei ziuhkui guay kapah pat the, lauziu miwmei guay ni kadah pat the. Mi guay tei kanac nunc khou nsinlou the, 36kumna kaniw tei zaeng neih thumh chaengkaamv duhmei bamv thangc lauziu pang ta tei nduangh tat kan the. Jakob tei Laban tuang ganclou duhmei lauziu pang ta tei gaengc bam duc the.

37Jakob rui poplar, almon, khatni palanv bang chy downa kagi tac-tarik tarouhlou the. 38Mi thingchy guay tei khouringh pang tuang duikuak hu khou tei lou the. Khouringh nunc tei dui zangv khang guang khou mi khou tei ganc raph rap tina hei tei loumei tuang e. 39Kumna ziuchic nunc tei mi thingchy guay hu khou tei ganc pwkhou, tarik-tarouhmei khatni nraengmei launa puanc pat geic the.

40Jakob rui nthyammei guay tei gaengc langc patna, baihmei guay tei Laban tuang tarikmei khatni miwmei biak thangc tei kazaw tikarihlou the. Heikumna kamei kakhouringc langv tei lou baicna lou the. Kumna hei tei Laban tuang khou lou kariu dat mak khe.

41Thingchy pang khou tei ganc kan khang kapumc gaymei khouringh nunc tei ganhmei ganv khou, Jakob rui thingchy guay tei kaniw hu khou dui zangv kuak bamv khou tei lou the. 42Tiki suanmei khouringc nunc hu khou tei thu kamei rui thingchy tei lou mak ge kumna Laban khang suanmei khouringc rana khatni Jakob khang kapumc gaymei khouringc rana cha pat the. 43Heikumna Jakob tei lungcgay thau the. Kamei lauziu pang, bangh nunc, guaikuan nunc, khatni kuanniam nunc mpeyna lungc pat the.

Currently Selected:

THAUREYMEI 30: RONGBSI

Highlight

Copy