THAUREYMEI 25

Abraham Kikta Baihmei

(1 Ki 1.32-33)

1Abraham kanow baihmei akhat kazanc Ketura twmeipui ta kaw dat re. 2Mipui khoutei rui Zimran, Joksan, Medan, Midian, Isbak, khatni Sua ta puanclou dat re. 3Joksan hei Sheba lev Dedan pu e, khatni Dedan kikta rui Asurimmei, Letusimmei, khatni Leumimmei e. 4Midian nac nunc rui Epha, Epher, Hanok, Abida, khatni Elda e. Mi guay hei Ketura khou rui lungc guangmei nunc the.

5Abraham rui katuang naimei kapwm Isak khang ganclou duc the; 6tiki katuang laamvnow nac nunc khang kaipat tiilou the kumna kamei rui ringc bammei dak khou Isak daeng khou tilungh makna neihpat biak kandic thangc thouc ganclou khwan e.

Abraham Theihmei khatni Mbeihloumei

7Abraham katingkwm 175 lungclou e, 8kamei tingkwm mpeyna lungclouna gaanvthaih sihna theic khwan e. 9Isak lev Ismael kanac nei rui Mamre tuang neihpat biak khou naimei Hittimeipu Zuar nac mpouh Ephron ramv khou Makpela tuang khowlang khou mbeihlou kan the. 10Mi ramv tei Abraham rui Hittimeipu khou rui liumei ramv e; Abraham lev Sara ta khou tei mbeihlou the.#Tha 23.3-16 11Abraham theic tangmei tangv, Ravguangc rui Isak ta suaihiamlou khwan e. Isak tei Beer Lahai Roi daeng khou tei lungc bam khwan e.

Ismael Kikta

(1 Ki 1.28-31)

12Mi hei Sara bangc Hagar, Izipmeipui rui puanhmei Ismael nac nunc, gaanvthaihmei khou rui alaucmei swna chak keymei lwan e: 13Ismael nac nunc zanc kiu mi hei e, Nebaiot, Kedar, Adbeel, Mibsam, 14Misma, Duma, Masa, 15Hadat, Tema, Jetur, Naphis, khatni Kedema. 16Kaniw hei Ismael nac mpouh nunc kaikhwang ruhna kanei the. Kumna kaniw zanc hei kaniw namv zanc khatni zypui bamv zanc swna phuaklou the. 17Ismael tingkwm 137 lungclouna theic the. 18Ismael kikta nunc hei Izip tuang neihpat khou, Asiria chaeng khou Havila lev Shur kak khou naimei ramv khou lungc the. Kamei kachana nunc lev diang makna lungc khwan the.

Esau khatni Jakob Puanhmei

19Mi hei Abraham nac Isak tuang pary e. 20Isak, kamei Mesopotamia thangcmei Aramianmei Laban tanpui Rebekka ta kanow kaw khou tei kamei tingkwm 40 tangc the. 21Rebekka tei ngana puanc timakna, Isak rui kanow khang Ringhpouc khou huayneylou khwan e. Kamei rui huayneymei tei Ringhpouc rui dawlouna Rebekka kapumc nrit the. 22Kapui bunglungc khou bammei ngana gaanv nei tei anuay bam khwan e. “Tabui swna mi kumhmei hei akhou guanglou bam tu cho?” twna Rebekka rui kakhanh e. Kumna kamei rui Ringhpouc khou thanv the.

23 Ringhpouc rui kumna daw e:

“Nang lungc khou hei zaatc kanei nai e,

nang khou rui puanhmei zaatc kanei;

tei ntamv puni the;

gaanv khat tei gaanv khat khang tei suangc tanc puni the,

gaanvthaihmeipu tei rui alaucmeipu siamruai sw puni the.”#Rom 9.12

24Kamei tei nah bam pwkhou nggaanvmei nac gaanv nei puanc the. 25Gaanvthaihmeipu tei haengh haengna kapumc kapwm tei kahiw thungh thungmei phey kumcna puancpat the, kum tina kazanc Esau twna phuaklou the. 26Kaneimeipu tei Esau phaytyang zamcna pat the, kum tina kazanc Jakob twna phuaklou the. Mi nac nei tei puanhmei ganv khou Isak tingkwm 60 tangc the.

Esau rui Nareimei Dam Zuanc Kanmei

27Mi nac nei tei daicthau the, kumna Esau tei suc-zouc mpac thaymeipu sw khwan e kumna kamei ramv thangc rana tatna lungc khwan e. Tiki Jakob hei thu khuimuih muina kai khou na bam khwan e. 28Esau rui suc-zouc mpac guangna tugay zangvgaymei kapu khang kic bam tina kapu rui Esau ta kungc khwan e, tiki kapui thu Jakob ta kungc khwan e.

29Zaeng neih khat Jakob rui ganhuai haenghmei gan suangc bam khou Esau tei ramhchaeng tatna guang dat khwan the. Kamei ndaapc lana kumna 30Jakob khou sa e, “Ai ndaapc the; mi gan haenghmei tei akhang ni asaekc tii o.” (Kum tina kata Edom twna kaw the.)

31Jakob rui daw the, “Nang tuang gaanvthaihmei tuang dam tei akhang tii e thei mi hei nang khang tii puni.”

32“Gay the, ai theic puni the; atuang dam tei rui akhang tabui gaeng tuang nai thena cho?” twna Esau rui daw the.

33“Nang tuang dam tei akhang tii ni the twmei latdyng akhou swlou rey o” twna Jakob rui sa the.#Ibr 12.16

Esau rui latdyng swna katuang dam tei Jakob khang tii kan the. 34Khoutei Jakob rui kakhang ntyan asaekc lev gan asaekc tei tii the. Kamei tuzangv tangv lana ding thauna tat kan the. Heikumna Esau rui katuang dam tei thouh sw mak khe.

Currently Selected:

THAUREYMEI 25: RONGBSI

Highlight

Copy