THAUREYMEI 24

Isak Now Laamei

1Ntaw thu Abraham tei gaanvthaih sih the, khatni Ringhpouc rui kalam kaguayna khou kakhou suaihiamlou khwan e. 2Katuang naimei kapwm ta sinmei, kabangc gaanvthaih liangmeipu khou kamei rui sa the, “Nang baanc akhukak khou louna latdyng sw o. 3Anac now khang Kanaanmei luc ta phulou lak ge twmei latdyng hei tingpuk kandih Ravguangc Ringhpouc zanc khou rui latdyng swloumei ta ai kahaw e. 4Nang rui ai puanhmei kandic thangc tei tatna ariang aluaic pang khou rui Isak now khang phutat nina e.”

5Banghpu tei rui ni kumna sa daw e, “Ntumei tei rui kakai ganclouna mi bamv khou hei guang ni mak ge thei thu tabui sw ni? Nang guangmei kandic thangc tei nang nac ta thouc tat dat khona cho?”

6Abraham rui daw the, “Isak ta mi thangc tei thouc tat dat nuh mak ge. 7Mi kandic hei akikta khang tii khang Ravguangc rui kalaic dat lakmei latdyng swlouna tingkauh Ravguangc Ringhpouc rui apu kai khou rui khatni ariang aluaic kandic khou rui ata nduangh guangmei tuang di the. Anac now khang mi bamv thangc tei rui phu khang kamei rui katuang baanchara ta nang hu khou thouclou puni. 8Ntumei tei rui mi bamv khou hei guang ni mak ge thei thu nang rui latdyng swlou bam sini kumkan di tho. Tabui bui pwni anac ta thu mi bamv thangc tei titat dat lak nina e.” 9Kumna banghpu tei rui Abraham khukak khou kabaanc louna kamei rui samei thei tei layna taanc ni the twna latdyng sw the.

10Abraham tuang kapahpatloumei lanv sinmei bangcpu tei rui kakaipouc tuang guaikuan ruh nduanghna kaipat kazaat mpeyna phungcna Mesopotamia khou naimei Nahor lunghmei kaidai thangc tei tat the. 11Kamei rui mi bamv tei guang tangc pwkhou, mi kaidai paengc khou naimei duikhunc akhat daeng khou guaikuan guay ta tei ti-nkhungh keylou the. Mi ganv tei tingzynrian ntumei nunc rui duizu khang patmei ganv khwan e. 12Khoutei kamei kumna huayney the, “Ringhpouc, akaipouc, Abraham tuang Racguangc, achaengtat hei tiguang nthuihlou o kumna akaipouc khou swloumei nang tuang latdyng tei tiguang tangclou o. 13Zauclo ai ntaw duikhunc daeng khou ding bam e, mi khou hei mi kaidai tuang tunac nunc dui zu khang guang puni e. 14‘Nang tuang duilai puanc keyna ata tizangvlou o twna sa tina zangv tho, nang tuang guaikuan nunc khang ni ai duizu guang puni’ twna sameipui tei nang bangc Isak now khang nang rui kadahloumeipui sw di tho. Kum pw e thei, nang rui akaipouc khou nrianhloumei latdyng tei taanclou the twmei ai thay puni the.” 15Kamei huayney luai mak khou, Rebekka duilai kabou khou puancna guang the. Mipui tei Abraham chana Nahor khatni kanow Milka rui puanhmei Bethuel nac aluhpui khwan e. 16Mipui tei kalwn kachav gaymei liuchang tunac chabwan na khwan e. Kamei duikhunc khou tei keyna kaduilai zu padikna ku dat khwan the. 17Banghpu tei mipui daeng khou tei pak guangna “Ai zangv khang nang tuang duilai khou rui dui tiilou o” twna mipui khou tei sa the.

18“Zangv do” twna mipui tei rui katuang duilai puanc keyna tizangv the. 19Mi pui tei rui kata tizangv tang pwkhou “ Nang tuang guaikuan nunc khang ni zu ngangh puni kaniw zangv pianna zangv kan diu” twna mi pui tei rui sa the. 20Katumcna kaduilai tei khouringh dui zangvmei kuak khou tei bun nsalouna guaikuan guayna tei zangv padik mak saanv zu guang the. 21Ringhpouc rui kachaengtat tiguang nthuihlou tu the ny twmei matatna mipu tei reih reina mipui rui sw bammei ta tei zauc bam the.

22Guaikuan nunc tei zangv tang pwkhou, mipu tei rui shekel kapaek nritmei kachaekc tadip kanukwang khou thaengclouna khatni shekel ruh nritmei kachaekc tadiu kabaancpwam khou runlouna 23kamei rui thanv the, “Nang thow nac cho? Aseic zingbangc aniw nang kai khou bangvlou khang kabamv nai puni cho?”

24“Ai hei Bethuel nac aluh pui e, apu hei Nahor khatni Milka rui puanhmei the” twna kamei rui daw the. 25“Akai khou khouringh khang napgou mpeyna nai e khatni nangniw bangvlou khang ni kabamv nai de,” twna mipui tei rui daw the.

26Khoutei mipu tei kapy bwm keyna Ringhpouc ta kalumna 27sa the, “Akaipouc Abraham tuang Racguangc Ringhpouc rui nzianloumei, lwmlou nuhmei tei taancloumei khang ta thuancku e. Kalatdyng tei suai mak ge, kumna kamei rui ata akaipouc tuang riangluaic khou nduanghlou the.”

28Tunacpui tei kapui kai thangc pak guangna mi pary guay tei raclou the. 29Rebekka puningc Laban twmeipu nai khwan e, mipu tei Abraham bangcpu bammei duikhunc thangc tei pak tat kan the. 30Laban tei kakainac nukwang khou naimei tadip khatni kabaancpwam khou naimei tadiu tei how the khatni banghpu tei rui mipui khou tei saloumei guay tei ni mipui tei rui racloumei tei chu the. Duikhunc daeng khou katuang guaikuan nunc daeng khou ding bammei Abraham bangcpu daeng khou tei guangna 31sa the, “Kai thangc guang tho, Ringhpouc rui suaihiamloumeipule. Tabui swna nang khou hei ding bam tu cho? Akai thangc nang khang bangv bamv chamdaanvlou kan the, nang tuang guaikuan nunc khang ni kabamv nai e.” 32Kumna mipu tei mi kai khou tei guang the, kumna Laban rui guaikuan puat guay tei laa key louna guaikuan nunc khang tei kataek titulou the. Abraham bangcpu khatni katheilay guangmei nunc khang tei phay khiu khang kamei rui dui tii the. 33Tuzangv khang laa pat pwkhou tei “Ai sa nimei lat sa mak saanv tuzangv lak ge” twna mipu tei rui sa the. “Sa nimei lat kiu salou tho” twna Laban rui sa the.

34Mipu tei rui sa the, “Ai hei Abraham bangcpu e.” 35“Ringhpouc rui akaipouc khou suaihiam geicna tiilouna kamei ntaw lungcgay chingkhiuhmeipu swna bam the. Ringhpouc rui kakhang lauziu pang, ziuh pang, guaih pang, daandi, kachaekc, katy-kabangc, guaikuan khatni kuanniam geicna tiilou the. 36Akaipouc now Sara tei kamei karapeic guang pwkhou nggaanvmei nac akhat puanc the, kumna akaipouc rui katuang naimei kapwm kakhang tiilou the. 37Akaipouc rui kamei rui samei taanclou khang ata latdyng tiswlou the. Kanac now khang Kanaanmei luc pang khou rui laa nuh mak ge, 38kapu kai thangc, kariang kaluaic bamv thangc tatna anac now khang phulou o twna salou the. 39‘Tunacpui kiu rui khou hei guang mu e thei thu tabui sw ni?’ twna ai rui akaipouc khou thanv tina 40‘Ai rui kalum bammei Racguangc rui kabaanchara nang hu khou thouclouna nang chaengtat ti-nthuihlou puni e. Anac now khang ariang aluaic, apu kai khou rui nang phutow puni de twna akaipouc rui salou e. 41Nang rui ariang aluaic khou tatna phu pwkhou kaniw rui nuh mak ge thei hei tei thu nang rui hamh the cho, mi tangv thu nang nyng di the,’ twna kamei rui sa the.

42“Aseic hei ai duikhunc khou tei guang tangc pwkhou kumna huayney the, ‘He Ringhpouc, akaipouc Abraham Racguangc, achaengtat hei ti-nthuihlou o. 43Ai mi duikhunc daeng khou hei bam e tunac dui zu khang pat pwkhou, katuang duilai khou rui dui zangv khang ai ney puni. 44Kamei rui hei tei nuhlouna atuang guaikuan guay khang ni dui zu guang nii e tw pw e thei, mi pui kiu akaipouc nac now khang kadahloumeipui sw diu tho.’ 45Ai alung khou suai bammei ravsuai tei luai mak khou, Rebekka kabou khou duilai puancna key lana dui zu khang duikhunc thangc tei key kan the. ‘Ai zangv khang dui tiilou o’ twna ai rui kakhou ney khwan e. 46Kamei rui kaluak kalat kaduilai kabou khou rui puanc keyna sa the, ‘zangv tho, nang tuang guaikuan nunc khang ni tizangvlou puni e,’ Kumna ai zangv the, atuang guaikuan guay ta ni tizangv the. 47‘Nang thow nac cho?’ twna ai rui thanv tina ‘Apu thu Nahor khatni Milka rui puanhmei Bethuel e’ twna kamei rui daw the. Kumna ai rui tadip hei kanukwang khou khatni tadiu hei kabaancpwam khou lou the. 48Kumna ai tangkhungh keyna Ringhpouc ta kalum the. Kanac aluhpui ta akaipouc nac now khang tiilou nimei akaipouc riangluaic kai khou ata zay guanglou rapmeipu akaipouc Abraham Racguangc Ringhpouc ta ai thuanckulou the. 49Nang rui akaipouc ta zauc nzianlouna nang rui kakhou swlou nimei zi tei swlou nii e thei ni salou pu tho; kum mak ge thei ni ai rui nuh nuh khang kaphianh khang di the.”

50Laban lev Bethuel rui daw the, “Mi latbamv hei Ravguangc khou rui guangmei tuang di thena, anei rui ramh lat sa dat bam khang maek khe cho? 51Rebekka ta kiuc nduangh tat tho kumna Ringhpouc kamei rui samei theilayna nang kaipouc nac now kiu tiswlou ti tho.” 52Abraham bangcpu tei mi lat hei chu pwkhou, kamei nkhum keyna Ringhpouc ta kalum the. 53Hei tangv tei pheybaan, daandi khatni kachaekc tuang ntuh-ntah laa patna Rebekka khang tii the. Banghpu tei rui kamanv kunghmei kaipat guay kachaic lev kapui khang ni tii the.

54Mi tangv tei Abraham bangcpu tei kamei rui nduangh guangmei nunc tei lev tuzangvna mi nungc zingbangc tei khou tei bamlou the. Kaniw lauthwan tinggaanc pat pwkhou zip thauna, “Ata akaipouc bamv thangc thouclou dat tho,” twna sa the.

55Tiki Rebekka chaicpu lev kapui rui kumna sa the, “Rebekka hei thu kanit akhat hamh e thei zaeng ruh dou thu bamlou kan di ho, mi tangv rui kamei tat kan diu o.”

56Tiki kamei rui sa the, “Aniw ta tineih keylou dat ri tho. Ringhpouc rui achaengtat ti-nthuihlou the; ai akaipouc daeng thangc tat kan ni the.”

57Kaniw rui daw the, “Rebekka ta kawna kamei ni tabui sa nii puni cho thanv zauh kho.” 58Kumna kaniw rui Rebekka ta kaw lana, “Mipu thei hei nang lay tat diu tha?” twna thanv the.

“Ngguay,” twna kamei rui daw the.

59Kumna kaniw rui Rebekka lev kakai siamruaimei akhat ta Abraham bangc khatni kamei nunc thei tei thouclou kan the. 60Kumna kaniw rui Rebekka khou mi lat hei suaihiamlou the:

“Alucle, nang hei meic aching aching pui sw kan di tho!

Nang kikta rui kaniw ta zauczihmei nunc tuang kaidai guay tei laana lungc kan di tho!”

61Hei tangv tei Rebekka tei kabianmei tunac nunc ta nduanghna guaikuan ngumc khou dungcna Abraham bangc tei lev twna kaamc thau the.

62Isak tei “Beer Lahai Roi” twna kawmei tazikramv khou tei patna kamei Kanaan tuang dihba ramv khou bam khwan the. 63Kamei tingzyn rian kalum khang ramvpuk khou pat pwki guaikuan nunc guangmei ta phaengc how the. 64Rebekka tei Isak ta how pwkhou kamei guaikuan ruc khou rui key the 65kumna Abraham bangcpu khou tei “Mi ramvpuk thangc tei rui tat riw guangmeipu hei thow cho?” twna thanv the.

“Mipu hei akaipouc kiu the” twna banghpu tei rui daw the. Khoutei kamei kaphey zay thauna kazaw gum the.

66Banghpu tei rui Isak khou kamei rui taanc kanmei guay tei raclou the. 67Mi tangv tei Isak rui Rebekka ta kapui Sara lungcloumei pheykai khou nduangh gutlou the, kumna Rebekka tei kanow sw the. Isak rui Rebekka ta nzian the, kumna kapui theic kanmei khang kazaeng simei tei hei tei rui swmlou the.

Currently Selected:

THAUREYMEI 24: RONGBSI

Highlight

Copy