THAUREYMEI 22

Isak ta Khaeng khang Neymei

1Mi tangv tei Ravguangc rui Abraham ta nchanv the. Ravguangc rui “Abraham!” twna kauc the. Abraham rui, “Ai khou hei bam e,” twna mundaw the.#Ibr 11.17-19

2Ravguangc rui sa the, “Nang rui heidi nzianna bammei, akhat namei nang nac mpouh Isak ta nduanghna Moria ramv thangc tat tho. Hei khou tei chyngbut akhat khou ai rui kabamv dinclou puni, hei bamv khou kiu nang rui Isak ta rawna akhang kat tho.”#2 Ki 3.1

3Abraham tei tinggaanc pat pwkhou khaeng nimei thing khang thwanzingh riam thuanna, katuang kuanniam khou tiphungclouna Isak lev kabangc gaanv nei ta nduanghna Ravguangc rui dincloumei bamv thangc tei tat kan the. 4Zaeng neih thumhpui nungc Abraham rui mi bamv tei duh thangc rui phaengc how the. 5Khoutei Abraham rui kabangc nei khou tei “Nangney khou hei kuanniam ta zaucna bam khwan o. Nggaanvpu launa aney mi bamv thangc tei tatna rav kalum lana aney guang dat puni e” twna kadylou the.

6Abraham rui rawna khaeng nimei thingbanv tei Isak ta tipuanc the kumna kamei baengsic lev mai sin the. Kumna kaney luan tat bam khou tei, 7Isak rui “Apule!” twna kaw the. “How, tabui cho abungle!” twna kamei rui daw the.

“Mai lev thing thu nai the tiki khaeng nimei lauziu thu tabui tei cho?” twna Isak rui thanv the.

8Abungle, “Ravguangc kamei kahak rui khaeng khang lauziu kiu tiilou puni de” twna Abraham rui daw the. Kumna kaney tei luan ngangh the.

9Ravguangc rui kakhou dincloumei bamv tei guang tangc pwkhou Abraham rui ravchabamv kasiamh thauna thing tei mi khou tei peiclou the. Kamei rui kanac ta tei karak lana thingkhwan ruc khou tei nzilou the.#Jos 2.21 10Kumna kanac ta tei chumluai khang katuang baengsic tei khuan thau the. 11Khoutei Ringhpouc tuang baanchara rui tingkauh thangc rui “Abraham, Abraham!” twna kauc key the.

“Ai khou hei bam e” twna Abraham rui daw the.

12“Mi nac ruc khou tei nang baanc keylou riu, nang hei Ravguangc ta pingmeipu e twmei ntaw thu ai thay the. Nang hei Ravguangc khang rui nang nac mpouh akhat namei ta sini daek mak bu the,” twna kamei rui sa the.

13Abraham rui kathei ziangrih pat pwki lauziuchic akhat kachei luaihbou khou goulouna ding bam khwan the. Abraham rui hei tei nymna kanac phaan rawna khaeng the. 14Abraham rui mi bamv zanc tei “Ringhpouc rui tiilou e” twna phuaklou the. “Ringhpouc tuang chyng khou kamei rui tiilou e” twna meic nunc rui ntaw nganvna sa bam e.

15 Ringhpouc tuang baanchara rui kaneimei swna tingkauh thangc rui Abraham ta kawna sa the, 16“Azanc saancna ai rui nrianhlou e- Ringhpouc rui sa e, ai rui nang khou suaihiam geicna tiilou puni, kalam thu nang rui nang nac mpouh akhat namei ta daek makna akhang mi hei taanclou the.#Ibr 6.13,14 17Ai rui tingpuk khou naimei gaanchuangcna zu khatni duipui paengc khou naimei syniang zu nang kikta tigeiclou puni. Nang kikta rui kaniw ta zauczihmei guay ta ngam puni.#Ibr 11.12 18Nang kikta khou rui kandihmei zaatc kaguayna ta suaihiamlou puni, kalam thu nang alat piu the.”#Lat 3.25 19Abraham tei kabangc nei bamv khou tei guang datna kamei bammei bamv Beersheba thangc tei guang dat the.

Nahor Kikta

20Kanakmei tangv, kakai nac Nahor now Milka ni kanac gaanv tachat puanclou the twmei Abraham chu the: 21nareimei rui Uz, mi tangv Buz, Aram pu Kemuel, 22Kesed, Hazo, Pildas, Jidlap khatni Bethuel hei nunc hei e. 23Bethuel hei Rebekka pu e. Mi Nahor nac gaanv tachat hei kanow Milka rui puanclou the. 24Nahor laamvnow Reuma rui ni Teba, Gaham Tahas, khatni Maaka ta puanclou the.

Currently Selected:

THAUREYMEI 22: RONGBSI

Highlight

Copy