THAUREYMEI 14

Abram rui Lot ta Kanloumei

1Sinarmei guangc Amraphel, Ellasarmei guangc Ariok, Elammei guangc Kedorlaomer, Goammei guangc Tidal, kaniw guangh padeih hei rui 2Sodommei guangc Bera, Gomoramei guangc Birsha, Atmamei guangc Sinap, Zeboammei guangc Semeber khatni Belamei (Zoarmei) guangc hei nunc ta adow khang guang the. 3Kum tina mi guangc panguh hei lunghnchamcna Siddim nzaengc, ntaw Theihmei duipui nai bammei bamv khou hei kaniw tuang ricmei nunc guang kariu the. 4Tingkwm 12 Kedorlaomer bangc khou bam guangmei tuang the, tiki tingkwm 13mei kwm thu kaniw rih thau the. 514mei kwm Kedorlaomer rui kabiak lianghmei guangc nunc khatni kaniw tuang ricmei nunc nduanghna guangna Rephaimmei ta Asterot Karnaim khou, Zuzimmei ta Ham khou, Emimmei ta Save Kiriathaim nzaengc khou, 6khatni Hormei ta Edom tuang chyng khou rih ngam the, kumna kaniw ta tazikramv tin Elparan nganv ngam key the. 7Mi tangv tei kaniw ngalanc ngangh datna Kades (mi douc tei Enmispat twna kaw khwan e) khou guang dat the. Kaniw rui Amalekmei kandic kapwm laagut the khatni Hazazon Tamar khou bammei Amormei ta ngam the.

8Khoutei Sodommei guangc, Gomoramei guangc, Atmamei guangc, Zeboammei guangc khatni Belamei guangc mi nunc guangh panguh rui kaniw tuang ricmei khuam kaduaina Sitdim nzaengc khou guangna 9Elammei guangc, Goammei guangc, Babilonmei guangc khatni Ellasarmei guangc mi nunc guangh padeih ta adow the. 10Mi nzaengc khou tei khunh nthukmei mpeyna nai khwan e Sodommei guangc lev Gomoramei guangc tei pak khou rui khunh khou paklou the; tiki guangh baihmei gaanv thumh tei thu chyng thangc pak duak tat kan the. 11Mi guangc padeih tei rui Sodom lev Gomora khou naimei puatc katana tuzangvmei tuang nganvna laa tat kan the. 12Abram suangc alaucmei nac Sodom khou bammei Lot ta ni kaniw rui katuang lanv guay lev kazauhna nymtat kan the.

13Khoutei pak duak patmei gaanv khat pu rui Amormeipu Mamre tuang mphauhbang ding daeng khou lungc bammei Ibrimeipu Abram khou mi chamv tei guang poulou the. Mamre hei kachana Eskol lev Aner chana e. Kaniw hei Abram lev champanv sw khwan e. 14Kanac Lot ta nym tat kan the twmei chamv Abram rui chu pwkhou kakai khou rui puanhmei rihphyan khang nchamloumei rihphianh 318 ta nduanghna mi guangc padeih ta tei Dan nganv nthau key the. 15Hei khou tei kamei nunc ta kalangv kalangv nzanhlouna zauczihmei nunc ta tei zingbangc adow the, kumna kaniw ta ngam the. Kamei rui kaniw ta Damaskas tuang dihpy thangc naimei Hoba nganv nthau tangclou the. 16Kumna asut laa kanmei puat guay tei laa dat the. Kamei rui kanac Lot lev katuang puat guay, ntumei nunc khatni baihmei nym tat kanmei nunc ta asut guang dat the.

Melkizedek rui Abram ta Suaihiamloumei

17Abram rui Kedorlaomer khatni baihmei guangc nunc ta rihngamna guang dat pwkhou, Sodommei guangc rui kata Save nzaengc (guangh tuang nzaengc twna ni kaw e) khou kata ariw khang pat the. 18Salemmei guangc khatni Kauh Liangsingmeipu Ravguangc tuang amuh Melkizedek rui Abram khang ntyan lev drakhadui phungc guangna,#Ibr 7.1-10 19Abram ta kumna suaihiamlou the, “Kauh Liangsingmeipu Ravguangc tingpuk kandih damhmeipu rui Abram ta suaihiamlou kan di tho! 20Nang ta rih tingamloumeipu Kauh Liangsingmeipu Ravguangc ta thuanhmei sw diu!” Kumna Abram rui kamei rui asut guang datmei puat guay tuang kadam ruh tuang akhat tei Melkizedek khang tii the. 21“Puatc guay tei thu nang khang laa tho, tiki amei nunc ta tei thu akhang tiilou dat ro,” twna Sodommei guangc rui Abram khou sa the.

22Abram rui daw the, “Kauh Liangsingmeipu Ravguangc, tingpuk kandih damhmeipu mav khou syangdyng swmei tuang e, 23‘Ai rui Abram ta tilungcgaylou tu e’ twna nang rui sa mak khang ai nang tuang puat langhriang na, phaythuapc riang na sini laa lak ge. 24Ai akhang ramh akhat na sini laa lak ge. Tiki amei nunc rui tu-zangvlou kanmei dam tei thu laa puni e, kumna Aner, Eskol khatni Mamre kaniw ni kaniw tuang dam laa kan diu.”

Currently Selected:

THAUREYMEI 14: RONGBSI

Highlight

Copy