LATDIUTATMEI 20

Makidonia khatni Grik Kandih khou

1Kumna kachin karo bammei tei nchu keypui tangv, Paul rui ziap guay ta kaw guang kaduai the. Kaniw ta katiuloupui lat salouna kaniw ta ramnavlou the. Kumna kamei Makidonia kandic thangc tat khang tat pat kan the. 2Kamei rui mi kandic ramv guay khou tei tat ruanna Gaychamv mpeyna dinclouna, meic nunc ta lungh tithaulou the. Mi tangv kamei Grik kandih khou guang the. 3Kumna mi khou tei bw thumh bamlou khwan e. Mi khou tei rui kamei Suria kandic thangc tat khang chamdaanv bam khou, Jihudimei nunc rui kata zauczihna nrik bammei ta thay pat khwan e. Kum tina kamei Makidonia biak thangc ngalanh khang kalung ding the. 4Kumna Beria kaidai mei Pirrihas nac mpouh Sospatar, Thessalonika mei Aristarkha khatni Sikunda, Darbi kaidai mei Gaia khatni Timothi, khatni Asia kandih mei Tukhika khatni Trophima, kaniw rui kata tat nduanghlou the. 5Mi nunc hei tat huna, aniw ta Troa kaidai khou nkhwan the. 6Kumna Khay Lou Makpui Ngai tangv aniw Philippi kaidai thangc rungc tuangcna zaeng panguh nungc Troa khou kaniw daeng khou guang the. Mi khou tei aniw zaeng chanei neihlou the.

Paul rui Troa khou Nkhamhmei Ariwloumei

7Kumna neidak tuang reymei nungc ntyan tu kariu khang aniw guang kaduai khou, Paul rui meic nunc khou lat sa khwan e. Kumna kamei nthuanh thauna kaamc thau dat khang ning lana, kamei rui zipchwng nganv nchamlou khwan e. 8Kumna aniw guang kaduai bammei karucmei kailangv khou tei maibungc mpeyna daanclou khwan e. 9Kumna Eutikas kawmei nggaanv nac gaanv khat kailat khou dungc bam khwan e. Paul rui lat sa saengcna sa bam khou tei, Eutikas tei tanguihna nkhamh khou zipri the. Kumna kamei kailuan kathumhmei thangc rui kandih khou taek key the. Khoutei kaniw rui kata theicna laa thau the. 10Mi khou tei Paul keyna karuc khou nkhum keyna kata pamcna, “Nangniw katuakc katit bam riu; kamei theih mak ge,” twna sa the. 11Kumna Paul karucmei kailuan khou tei ku datna ntyan by bakna tu the. Kumna kamei rui kaniw lev tingsaengcna ting gaanhmei nganv lat saloupui tangv, Paul tat pat kan the. 12Kumna kaniw rui nggaanv nac ta tei ringcna kakai thangc nduangh tat dat kan the. Kumna kaniw neihlamei taraina mak khe.

Troa khou rui Milita khou

13Paul kamei phay chaeng tat ni lana aniw ta rungh tuangcna Assos thangc tat hu tho, kumna mi khou tei rui rungh tuangc nchamc dat di kho twna sana aniw rungh tuangcna tat hu the. 14Kumna kamei aniw ta Assos kaidai khou ariw dat the. Aniw rui kata rungh khou laa gutlouna, aniw Mitulini duipuidic khou guang the. 15Mi khou tei rui rungh tuangcna aniw nthuanh thauna Kio duipuidic khou guang tangc the. Nthuanh thauna aniw Samo duipuidic khou khanvlou the. Mi tangv nthuanh thauna aniw Milita kaidai guang tangc the. 16Nuhpui kamv Pentikost nungc Jerusalem khou bam namv khang kapiucna tat bam lana, Asia kandih khou kaganv sw chanah mak khang Ephisi khou gutlou lak khe twna kamei ning the.

Paul rui Ephisimei Gaanthaic Guay khou Kadyloumei

17Kumna Milita kaidai khou rui Ephisi kaidai thangc mei ndiulouna phwamling gaanthaic guay ta kadaeng kaw guang the. 18Kumna kaniw kadaeng khou guang pwkhou, kamei rui kaniw khou sa the,

“Ai Asia khou guang rap nungc tei rui thauna, ai nangniw daeng khou bammei ganv guay khou tei, ai tukumhna bam kan tu cho twmei nangniw thay e. 19Twmeithu, Jihudimei nunc rui ata sw kasic khang nrikpui chamraeng mpeyna ndaengna ryanrapui ganv mpeyna akhou guang khwan sini, mpeyna lungh niamhmei khatni mikdui keymei kazauhna ai Poubauhmei siamruai taanv taanc kan e. 20Nangniw khang kage naimei guay daeklou tuang maekna charuangc khou ni kai kai khou ni nchamlou kanmei tei nangniw thay e. 21Ravguangc khou lungh laic guangna aniu Poubauhmei Jisu khou lwm nina e twna Jihudimei khou ni Grikmei khou ni ai dinclou kan the. 22Kumna ntaw thu zauclo, Bumaengh Nthanmei rui ndiupui thei layna ai Jerusalem nzwan tat bam tuang e. Mi khou tei ai tabui ariw puni cho thay mak ge. 23Ahu khou Kangkai khatni ryanramei nai bam the twmei thu Bumaengh Nthanmei rui kaidai kathuic khou akhou dincna thay the. 24Tiki ai theih khang thu kadan tuang maek ge. Ai pak nimei pak suaklou e thei khatni Poubauhmei Jisu rui tiiloumei taanv, twmei thu Ravguangc zauzian gaychamv dinhmei taanv hei taanc suaklou e thei kiuc di the.#2 Ti 4.7

25“Kumna zauclo, nangniw pang khou ai Guanghdic lam dinc ndauhna tat bammei tei ntaw thu nangniw kapwmna azaw how dat ni tu hamh the twmei ai thay e. 26Hei zaeng rui ai rui aseic nthukna sa nimei thu mi hei e: thow pw ni nangniw pang khou maan nimei nai e thei, hei tei aman hamh the. 27Kalam thu Ravguangc rui chwnmei kapwm tei ai nangniw khou daeklou tuang maekna dinclou kan the. 28Poubauhmei rui kazei kahak rui liuloumei Racguangc phwamling ta makuat khang, Bumaengh Nthanmei rui lauziu gaenghmei nunc tiswloumei nangniw khang khatni nangniw khou nsinloumei lauziu nunc khang ntak nrakna bam o. Kazei kahak rui liuloumei Ravguangc phwamling ta tei gaengc o. 29Kalam thu ai tat patmei tangv swsimei angiw nunc nangniw pang khou gut puni the, kumna kaniw rui lauziu pang ta daeklou dat ni tu hamh the twmei ai thay e. 30Kumna kaniw thei lay khang nangniw pang kahak khou rui ziap nunc ta zay mbiangh khang nchumh makmei lat samei nunc nai thau puni. 31Hei zaeng rui tingkwm kathumh dak khou tei ai rui zingbangc kalaanv mikdui keyna meic kathuic ta riapna taek makna nchamlou kanmei tei ningtowna nangniw ntak nrak bam o.

32“Kumna ntaw ai rui nangniw ta Ravguangc khou khatni kazauzian lat khou nsinlou e. Lat hei rui nangniw ta kasiamh thau khang khatni Ravguangc rui kamei guay khang tiilou nimei suaihiam guay tei tiilou khang e. 33Ai meic gaanv khat na tuang sini kachaekc, daandi, hamh e thei pheybaan kahaw mak ge. 34Nangniw kahak rui thay e, akhang khatni apammei guay khang kage naimei guay mi baanc kanei rui taancna lungc kan tuang de. 35Ramh lam katana khou ai nangniw khou kathiak nchinlou kan the. Twmei thu hei tei kumcna alinghna taancna, swthuy lakmei nunc ta nkhavlou nina e. ‘Laatowmei suangc tiipatmei rui suaihiam mbu e,’ twna Poubauhmei Jisu rui samei tei ningtow o.”

36Mi guay hei sa tangna kamei khuksun keyna kaniw kapwmna lev huayney the. 37Kumna kaniw kapwmna kap ranv sihna kap the. Paul guang pamcna kata kapute the. 38Kaniw zaengsi dianghmei thu kaniw kazaw how dat ni tu hamh the twna kamei rui saloumei khou tei rui e. Mi tangv kaniw rui kata kamei tat nipui chaeng rungh bamv suanc tangclou the.

Currently Selected:

LATDIUTATMEI 20: RONGBSI

Highlight

Copy