LATDIUTATMEI 18

Korinmei khou Chamvdinhmei

1Mi tangv hei, Paul Athen mpatlouna Korin thangc tat the. 2Mi khou tei Pontamei Akuila ta kamei ariw the. Jihudimei guay ta Rom khou rui tat pat khang guanghdaihmei Klaudia rui latdanv pat tina, kamei kanow Priskilla lev Itali thangc rui mi khou tei asaanh makmei hu khou guang bam khwan e. Kamei kaney ta ariw khang tat the. 3Kumna kaniw pheykai taanc thaymei nchamc lapui zaeng rui, Paul ni mi khou tei kaney lev bam kariuna taanc nchamc the. 4Kamei Sabbathneic pum sinagog khou kariuna Jihudimei ta ni Grikmei ta ni tikwmlou the. 5Sila lev Timothi Makidonia thangc rui guang dat pwkhou, Paul katuang ganv kapwm chamv dinhmei khou tii gutlouna, Khrista kiu Jisu hei the twmei Jihudimei khou dinclou the. 6Kaniw rui kata akhangvna sa kasicna sa ti khou, “Nangniw theic sini nangniw man di the; akhuay maek khe. Ntaw khou rui ai Zentelmei khang dinc tat kan ni the,” twna sana kaphey kakhuplou the. 7Kumna kamei kaniw ta mpatlouna, Tasangmeipu Tita Jasta kai thangc bam tat kan the. Mi pu hei Ravguangc ta kalummeipu e, kumna kakai sinagog daeng khou na nai khwan e. 8Sinagog tuang kapypu Krispa lev kakai kaikhunc Poubauhmei khou lwmlou the; khatni Korinmei meic mpeyna ni Paul lat tei chu lana lwm the, kumna duilup the.

9Zingbangc akhat Paul ndawman akhat how khwan e. Mi khou tei Poubauhmei rui kakhou, “Ping riu, lat hei dinc bam o, nthaekc riu; 10ai nang ta nduanghlou bam e. Nang ta meic gaanv khat na rui sini sw kasic ngam ni tu hamh e; mi kaidai khou hei amei mpeyna nai e.” twna sa the. 11Kumna Paul mi khou tei tingkwm akhat kapaek bamlouna meic nunc khou Ravguangc lat dinclou the.

12Gallio rui Akhaia khou Rommei tuang guanghkhyn swpui ganv khou, Jihudimei nunc guang kariuna Paul ta nym the, kumna latzankai khou zay guang the. 13“Riakdanv rui nuh makmei khou meic nunc ta Ravguangc ta tikalum khang mi pu hei rui sw the!” twna kaniw rui sa the.

14Paul rui lat sa nina thau pwkhou, Gallio rui Jihudimei nunc khou sa the, “Mi hei nkhuai mbamei, hamh e thei taanvsic taanvrouc taancloupui tuang e thei, nangniw lev kaphianh nuh e. 15Tiki mi hei thu Jihudimei nangniw tuang lat lam khou, zanh lam khou khatni Riakdanv lam khou tuang dina, nangniw rana kaphianh tat ro. Mi kumhmei lam khou thu ai latzan sw khang hamh e.” 16Kumna kamei rui kaniw ta latzankai khou rui nthau pat the. 17Khoutei kaniw rui sinagog tuang kapypu Sostheni ta nymna latzankai kaimav khou tei bai the. Tiki mi ta tei Gallio nchyanlou mak ge.

Antiokh khou Guang Datmei

18Paul lwmmei nunc lev Korin khou zaeng mpeyna bamloumei tangv, mi bamv tei mpatlouna Priskilla lev Akuila ta nduanghna rungh tuangcna Suria thangc tat the. Rungh tuangc thau mak khou, Kenkhria kaidai khou kapy guat the,#Jihudimei riak khou latryan daihmei swlouna sam nzuakcna, mi latryan tei ngaek suaklou e thei kasam guat datmei riak nai lana e. kalam thu kamei latryan swlou khwan e.#Sin 6.18 19Kaniw Ephisi kaidai guang tangc the. Mi khou tei Priskilla lev Akuila bam duc kan the. Ephisi khou tei Paul sinagog thangc tatna Jihudimei nunc lev pary rac the. 20Kata bam kanaklou o twna meic nunc tei rui sa the; tiki kamei bamlou mak khe. 21“Ravguangc rui ningmei e thei, ai guang dat puni,” twna kadylou ducna Ephisi khou rui rungh tuangcna tat dat the.

22Kamei Kaisaria guang tangc pwkhou, Jerusalem thangc tatna phwamlingmei guay ta ariwlouna, Antiokh thangc tat the. 23Kamei mi khou tei bam kanaklou lana, tat thau datna Galati khatni Phrugia ramv khou tat ruanlouna lwmmei guay ta su-ntiplou the.

Apollo Ephisi lev Korin khou

24Mi ganv khou tei, Alekzandria kaidai khou puanhmei Jihudimei Apollo twna kawmeipu Ephisi khou guang khwan e. Kamei hei lat sathaymei khatni Nthanmei Latrik thay chuyna thaymeipu khwan e. 25Kakhou Poubauhmei tuang Chaeng tei dinclou the, kumna kamei lungh gutna Jisu tuang pary kaling dinc the khatni nchamlou the. Tiki kamei Jahon tuang duilupmei na tei thay khwan e. 26Kamei baucna sinagog khou ni rac tat the. Priskilla lev Akuila kalat tei chu lana kata kaney kai khou nduangh guangna Ravguangc tuang Chaeng lam khou dinc ntwn chuylouna dinclou the. 27Apollo tei Akhaia thangc tat nii the, kum tina Ephisimei lwmmei nunc rui kata katiulouna, kata laalou khang Akhaia khou bammei lwmmei nunc khou tatdyn hylou the. Kamei guang tangc lana, Ravguangc zauzian paan rui lwmmei nunc ta tei mpeyna nkhavlou the. 28Kalam thu Jisu hei Khrista e twmei Nthanmei Latrik khou rui dincna Jihudimei nunc ta charuangc mav khou agi ngamlou the.

Currently Selected:

LATDIUTATMEI 18: RONGBSI

Highlight

Copy