LATDIUTATMEI 10

Pitar khatni Kornelias

1Kaisaria khou kazanc Kornelias twna kawmeipu nai khwan e. Kamei hei “Italimei Rihphianh nunc” twna kawmei Rommei ricmei kang akhat tuang rihpy khwan e. 2Kamei hei ravning nthukmeipu e; kamei khatni kakai kaikhunh kapwm Ravguangc ta kalummei kai e. Kamei hei lungcsimei Jihudimei nunc ta mpeyna nkhavloumeipu e khatni Ravguangc khou huayney tanh tan bammeipu e. 3Zaeng neih khat tingzyn ganvdak kathumh zaengc khou, ndawman akhat how khwan e. Khoutei Ravguangc tuang baanchara guangna, “Kornelias,” twna kawmei ta kamei how nthan thiakh thiakna how the.

4Kamei kauh baanchara ta tei pingna kaluang the. Kumna, “Poubauhmei, tabui tuang cho?” twna kamei rui sa the.

Khoutei kauh baanchara tei rui sa the, “Nang rui huayney bammei khatni tii pat bammei tei Ravguangc thaylou the kumna dawlou the. 5Ntaw Joppa thangc meic ndiulouna Simon Pitar twna kawmeipu ta kaw o. 6Duipui daeng khou lungc bammei guaihgic nuaihmei Simon kai khou kamei bangv bam e.” 7Kauh baanchara tei tat dat kan pwkhou, Kornelias rui kabangc gaanv nei lev khatni kadaeng khou bammei ravning nthukmei rihmei gaanv khat ta kawna, 8pat kanmei guay tei raclou the, kumna kaniw ta Joppa thangc ndiulou the.

9Nthuanh thauna, kaniw Joppa ana guangpui ganv khou, kalaanv neih ndyng zaengc khou Pitar huayney khang kainam khou ku bam khwan e 10Kamei ndaapc the kumna ramh tu nii tuang ning pat the; tiki nap gan kasiamh luai mak he. Khoutei Pitar ndawman how the, 11Khoutei tingkauh laanc patna phey paek daihmei kumhmei akhat kakwn padeih biancna kandih khou mpat keymei ta how the. 12Mi khou tei khouringh zaat guay—tuihmei khouringc zaat guay khatni nruayna zaat guay nai khwan e. 13Khoutei khwan akhat rui, “Pitar, thau tho, swluaina tu tho!” twna sa the.

14Tiki, “Ai tu lak ge, Poubauhmei! Nthan makmei puat ai khat sini tu mak ge,” twna Pitar rui daw the.

15“Ravguangc rui nthan the twna samei ta tei, nthan mak ge twna laa riu,” twna mi khwan tei rui sa dat khwan e. 16Mi hei kumcna lyanlou liang kathumh khwan e, kumna tingkauh thangc laa ku dat kan the.

17Mi hei tabui tuang kabac cho twna kamei kakhanh bam khou, Kornelias rui ndiu guangmei nunc tei Simon kai phu guangna kairaengvmun daeng khou ding bam khwan the. 18Kumna Simon Pitar bangv bam bu cho twna kaniw rui mi kai khou tei kaucna kakhi the.

19Mi ndawman lam khou kamei kakhanhna bam khou, “Zauclo! Meic gaanv thumh#Baanhhy baibal asaekc khou Meic gaanvsaekc twna hylou e; baanhhy baibal akhat khou rui gaanv nei twna hylou e. nang ta kakhi bam e. 20Nang thauna kabangc thangc key tho, kumna rouh tuang maekna kaniw thei lay tat tho; kaniw ta ai rui ndiu guang tuang e,” twna Bumaengh tei rui sa the. 21Kumna Pitar tei keyna, “Nangniw phu bammeipu kiu ai the. Tabui lam khang nangniw guang tu cho?” twna kaniw khou sa the.

22Kaniw rui mundawna sa the, “Rihpy Kornelias rui aniw ta ndiulou pwna guang tuang e. Kamei hei meicgaymei e, Ravguangc ta pingmeipu e khatni Jihudimei nunc rui sa chuy bammeipu e. Nang rui sa nimei lat tei kamei nking khang nang ta kakai khou kaw guang o twna Ravguangc tuang baanchara rui kakhou sa tina aniw ta ndiulou pwna e.” 23Khoutei kamei rui kaniw ta kaw gutna tibangvlou the.

Nthuanh thauna, Joppa khou rui lwmmei nunc gaanvsaekc ta nduanghna Pitar tei kaniw lev tat the. 24Kumna neih neipui neic, Kaisaria guang tangc the. Mi khou tei Kornelias tei kariang kaluaic nunc khatni kapam dianghmei nunc ta kaw guanglouna kata nkhwan bam khwan the. 25Pitar tei kainung kaamc gut ni khou, Kornelias pat riuna khuksun keyna kalum the. 26“Dingthau o, ai ni maansei de,” twna sana Pitar rui kata zay thau the. 27Pitar tei Kornelias khou lat sana sana kainung kaamc gut pwkhou, meic mpeyna guang kaduai bammei ta ariw the. 28Khoutei kamei rui kaniw khou sa the, “Jihudimei hei Zentelmei kai khou tatlou khang khatni kaniw pang khou kariu kara tat khang katuang ravchap rui nuh mak ge twmei nangniw thay e. Tiki ai meic gaanv khat na ta sini nthan makmei e twna ning nuh mak ge twna Ravguangc rui akhou lyanlou the. 29Kum thena nangniw rui ata kaw pwkhou rouh tuang maekna guang tuang e. Nangniw ata kawmei kiu tabui khang cho, salou o.”

30Khoutei Kornelias rui sa the, “Zaeng neih thumh hu thangc, mi ganv zaengc khou, tingzyn ganvdak kathumh khou, ai akai khou huayney bam khou,#huayney bam khou; Baanhhy baibal asaekc khou munthiangcna huayney bam khou twna hylou e. titah tamei pwan piumeipu gaanv khat ahu khou guang dingna, 31‘Kornelias, Ravguangc rui nang huayneymei chulou the khatni nang rui tii patmei tei thaylou the. 32Joppa thangc meic ndiulouna Simon Pitar twmeipu ta kaw o. Duipui daeng khou lungc bammei guaihgic nuaihmei Simon kai khou kamei bangv bam e,’ twna sa the. 33Kumna ai rui kadyng khou nang ta kaw khang ndiulou tuang the. Kumna nang nzianlouna guanglou dyng the. Poubauhmei rui nang ta sa o twna saloumei lat kiu nking khang ntaw aniw mi khou hei Ravguangc hu khou guang bammei tuang the.”

Pitar rui Latdinhmei

34Pitar rui mi kumcna sa thau the, “Ravguangc thu gahsw guhsw makna meic guayna ta nchamcna swmeipu de twmei ai ntaw thu thay the.#Ria 10.17 35Kata pingthaypui mei khatni nchumhmei taanhpui mei ta thu zaatc kapah makna kamei laalou de. 36Meic katana Kaipouc Jisu Khrista paan rui chuzaenghmei phungc guangmei Gaychamv— Ravguangc kamei rui Isaraelmei khou tii guang kanmei chamv tei nangniw thay the. 37Jahon rui duilup khang chamvdinhmei tangv tei rui Galili khou rui thauna, Isarael kandih kapwm khou pat kanmei pary tei nangniw thay the. 38Nazarethmei Jisu lam tei nangniw thay e. Ravguangc rui kakhou Bumaengh Nthanmei khatni pumtan bun keylou kanmei tei nangniw thay e. Kamei kabamv kathuic khou tatlouna gaytaanv taanclou khwan e khatni ravsic rui rai bammei nunc ta tigaylou khwan e. Kalam thu kata Ravguangc rui nduanghlou khwan e. 39Kamei rui Isarael kandih khou khatni Jerusalem khou taanclou kanmei guay tei howmei kiu aniw hei the. Kaniw rui kata kros khou thaengcluai kan the. 40Tiki Ravguangc rui kata zaeng neih thumh nungc tiringcthaulou dat kan the, kumna kata tihowlou the. 41Hei tei meic guayna khou hamh e; Ravguangc rui mi lam khou tei dinh khang kapahloumei aniw khou e. Kamei ringcthaumei tangv, aniw kamei lev tu nchamc zangv nchamc the. 42Meic nunc khou lat hei dinc o khatni kamei hei ringc bammei ta ni theic kanmei ta ni latzan sw khang Ravguangc rui langloumeipu e twmei sa tat ro twna kamei rui aniw ta ndiulou the. 43Kakhou lwmloumei kathuic paap guay tei kazanc paan rui kuaklou puni twna muhzwng guay rui kalam khou sa guang tuang the.”

Zentelmei nunc Bumaengh Nthanmei Laatowmei

44Pitar rui sa bammei dyng khou, nking bammei guay khou tei Bumaengh Nthanmei keylou the. 45Ravguangc rui katuang kaipat—Bumaengh Nthanmei Zentelmei guay khou ni tii keyloumei khou tei Joppa thangc rui Pitar thei lay guangmei lwmmei nunc tei ngak the. 46Kalam thu kaniw lat baih baihmei sana, Ravguangc ta thuanc bammei ta kaniw chu the. 47Khoutei, “Aniu kumcna kaniw ni Bumaengh Nthanmei laatow lana the. Kaniw ta dui rui duilup khang thow rui thingc dat ngam ni thena cho?” twna Pitar rui sa the. 48Kumna kaniw ta Jisu Khrista zanc khou duiluplou ti tho twna sa the. Mi khou tei tingmik asaekc bam keylou dat khang kaniw rui sa the.

Currently Selected:

LATDIUTATMEI 10: RONGBSI

Highlight

Copy