ZEKHARIYA 11
11
Anyi Kedaggüthu keqanca
1Lebanon, ajenka sha chilo,
isanu anni ya nji sedar tonthu tsü mecang thsülo!
2Qai nu kohonlo, sipress tonthu,
sedarthu na qancadha;
anyankethang chantonthu tsü yasadha!
Qai nu kohonlo, Bashan yangtonthu,
ayinong kejang tsü shüchi khidha!
3Kekhang kesenthu na ahathakina wina magha;
mathu nyankethang tsüna nmidha!
Ssensitemithu kemagha hhai tsü kina chilo;
Jordan kechhen wi mathu jjen ayinong tsü yasadha!
Anenikehie Keni
4Apvüwa iNyiza na hi wi khi, “Anenithu pi pathi wa keten tsü khang kehiewa #11.4: anenikehiewa: Ha wi anenikehiewa hapi kadimiwa nyelela accülikesawa, nu anenithu tsüpi ma nyithu nyelela ma senkeniethu zensu wi sentheng. kekuli salo. 5Apvüthu na anenithu pathi lela nyu mathu nmeten. Mathu na asa pi jeü nu khiben, ‘Apvüwa sengle! Ithu na keban sadha!’ Mathu kehiethu lela mathu nanketizen nmila.”
6(Apvüwa na khi, “Hi ayyi wi anyi thola nantizen nten. Hi anyi tsüdi pi mathu kekhang kesenthu kekhu wi chiaben . Kekhang kesen hathu na ayyiwa tsü yasa, nu hi mathu kekhang wina tsü hangshaya nten.”)
7Khaghanenithu pi jeü nu shei ketenthu na hi dengaya, nu hi khaghaneni pi pathi wa ketenthu tsü kehiewa saya. Hi akhhatssü keni khuya: hi tsü kesü pi “Kenen” nu kepawa pi “Jühkesü” ciya. Nu hi akhang tsüwa nonccaya. 8Hi kepa wi anenikehiethu kecheng hi nanmeghü keten tsü n-ghang chala nu hi asha kesü jü na mathu tsüdi yasa pia. 9Tsaseng wi hi aneni khang wi khi, “Hi nthu kehiewa nsadha. Shei ketenthu ya shei thsülo, nu yasa-ketenthu yasa thsülo. Hang keyathu mathu khokho keyasaliaben.” 10Tsaseng wi hi akhhatssü “Kenen” le khi ketenwa tsü khuya nu pashüa, tsüna Apvüwa na mizzatentithu tsüdi ssinu cenkethenjühwa tsü pakhiale kesalina. 11Tsalina tsü ghanan na cenkethenjühwa tsü pakhia, khaghanenithu sheiya nu pi jeü kesathu na hi ghangben. Nu mathu na hi kekuli wina Apvüwa na mangwa khiben khe tsü chüben. 12#Mat 27.9-10. #Mat 26.15. Hi mathu wi khi, “Keujüla nthu kenen lethu ikutimen pi hi cülo, nyelethu tsüthu pi theng yalo.” Tsalina mathu na rükatssü changha pi ikutimen sacüa.
13Apvüwa na hi wi khi, “Tsüthu pi Kekinyijjen keben kethengpen wi chilo.” Tsalina hi rükatssü changha mathu na ikutimen kemehai sa cüdha le kemeshenwa tsü khuya nu pi Kekinyijjen keben kethengpen wi chia. 14Tsaseng wi hi akhhatssü keniwa “Jühkesü” tsü pashüya, nu Israel nu Judah jüwi jühkemece tsü yasa.
15Tsaseng wi Apvüwa na hi wi khi, “Kheneng kuti anenikehie ma men nkemi kesü ti salo. 16Hi anenikehie kesü pi ijithu hie thsü, isala keyasa na khaghanenithu pateqhe keben wi tsü ma mathu nkiqa; nyelela bhakitaghathu tsü nbha, mesa-mena kebenthu n-noncca, nu hang kebenthu ghanja ncü. Tsüti kesawa nye ma khaghaneni kekunon ntsathu pathi dsa nu tsüthu ccümezen la shia. 17Anenikehie ma men nkemiwa tsü yasa tendha le! Ma ma khaghanenithu tsü teshia, aghi na gho ma kekhang yasatha saaden. Ma hacü na shü nu ma nyon ajewa na pala nmulaben.”
Currently Selected:
ZEKHARIYA 11: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
