MARK 2
2
Jisu Na kecügüshü Kesü sa pi Mehaikecü
(Mat 9.1-8; Luk 5.17-26)
1Ghanan keu seng wi Jisu na Kapernaum wi wa neng, nu ma ajjen wi benle kesa nyu na khi wa. 2Tsalina ciwi anyi ji ntsa na gho saghuya nu ajenka wi lela apen nmila. Jisu na ajühkemehaiwa pi mathu khisansi. 3Ciwi meshu mejü na kecügüshü kesü pienu Jisu wi gho. 4Isala anyitenti ghena mathu anyi tsüwa pienu Jisu wi du meyala. Tsalina mathu ajjenmili wi ki Jisu kejentan wi aku bhiya nu mathu kecügüshüwa tsü pi ma we miwi na ciwi du thsü. 5Jisu na mathu kenondi tsü mukeya wi ma kecügüshüwa wi, “Itsawa, no kesami teshi cüdha,” isakhi.
6Ayenkesansithu pahan na ciwi donki keben mathu leben wi hati meshen, 7“Anyi hawa ha mangkesa na hati khiben nu? Ma Anyiza kethenjüh khiben. Anyiza ketan khe thowa na nyu kesami teshi pi cüya mehai nu?”
8Jisu na mathu leben wi meshen keben tsü chüya nu mathu wi, “Mangkesa na nthu leben wi pala hati kesa meshen ten nu? khi. 9Anyi kecügüshüwa wi, ‘No kesami teshi pi cüdhale,’ kekhi wala ‘Shaghala nwekeshiphi pieya nu alentsen walo,’ manyi khawa le nu? 10Isathu, hi Anyi Tsawa na ayyi wi kesami teshi pi cüya kemehai kekhang benle kesa nthu ya chüya thsüden.” Tsalina ma anyi kecügüshüwa wi kiza,
11“Hi no kizaben, shagha nwekeshiphi pieya nu ajjen wi whalo!”
12Tsümeyi mathu tsüdi tuwi na anyi tsüwa na shagha ma wekeshiphi pieya nu bvüa. Tsalina mathu tsüdi amansa ntsa nu hati khi nu Anyiza seng: “Ithu na khie wi la pala hati kesa npi mule!”
Jisu na Levi Cikeya
(Mat 9.9-13; Luk 5.27-32)
13Jisu na kheneng Galilee Ghajü ghüsa wi wa. Anyitenti kesü na gho ma vüla saghuya nu ma mathu zhüsansi. 14Ma wa keten wi khajana kekhüwa Alfia tsa Levi na ma kekuli jjen wi donki keben muya. Jisu na ma wi khi, “Hi nie ghalo.” Levi na shagha ma nie wa.
15Jisu na wala Levi jjen wi dsajjü keben wi khajana kekhüthu nu kesami nyithu kejon la ma nu ma sansikeyathu gweghe donkiben, kepaghenanye anyi kejon la ma nie keten ghena. 16Ayenkesansithu pahan, tsüthu na Farisithu, Jisu na wala kesami nyithu nu khajana kekhüthu gweghe dsajjü keben muya nu ma sansikeyathu wi keü, “Mangkesa na ma anyi hati kesathu gweghe dsajjü ben nu?”
17Jisu na mathu jüh tsü zaya nu luneng, “Anyi kesakinaathu khe mehai kebenthu na dawa kechüwa nsen la mehai. Hi anyi kesamithu khe ketsatanthu ciyale nghole.”
Kezi Cüki Kekeü
(Mat 9.14-17; Luk 5.33-39)
18Matsü kesü wi Johan Baptizwa sansikeyathu nu Farisithu na ziben. Anyi pahan na Jisu wi gho nu ma wi keü, “Johan Baptizwa sansikeyathu nu Farisi sansikeyathu na zi lela mangkesa na no sansikeyathu na zi nten nu?”
19Jisu na mathu wi khineng, “Keshanyi kemishu wi akejjenthu na shanyiwa mathu gweghe keben wi ndsajjüla ben thsüya mehai kwe? Shanyiwa na mathu gweghe keben chu mathu ziya nben. 20Matsü na ghoben le, mathu jawi na shanyiwa ssi bvü lethu tsü ghanan wi ccüna mathu ziben.
21“Thola athsü ketheü kesü pi athsü kaghawen miwi khhwenki nten. Keujüla ma tsüti sa lethu, athsü ketheüwa tsüna zanghu nu kaghawenwa pahan mezüqhe sen bvü nu kheni miwi ma ku di kayi shaben. 22Nyelela thola kisengtssü ketheü pi akhüti kaghawen wi chi nten. Keujüla tsüti sa lethu, kisengtssü tsüna akhüti bvükhhiaben, nu kisengtssü nu akhüti la yasa shaben. Tsüti kesawa nye, kisengtssü ketheü tsü pi akhüti ketheü wi nchithu yishü.”
Sabbath Cüki Kekeü
(Mat 12.1-8; Luk 6.1-5)
23 #
Aye 23.25
Sabbath tsathang kesü wi Jisu na awhengsu lli pahan pvüdhi wa. Sansikeyathu na ma gweghe kewalen sala mathu asu bi dsale mahang. 24Tsalina Farisithu na Jisu wi khi, “Ghangchilo, no sansikeyathu na Sabbath tsathang yenwa tsü pakhhi ben le!”
25Jisu na luneng, “David nu ma nyithu na ghama keya wi nu pala pahan ndsathu keyishü tsü wi ma khati sa khe nthu na khiela si meya kwe? 26#Lev 24.9 Ma Anyiza jjen wi du nu amesa pi Anyiza kekinyiwa tsü khu pi dsa. Hawa ha Abiathar na Keqhaikedi Kemisiwa sa keben tsüwi sa. Ithu Yenwa kenie wina keqhaikedithu ketan amesa tsü dsaden — isala David na tsü dsa nu tsü pi ma nyithu la cü.”
27Nu Jisu na khi, “Anyi ghena Sabbath tsathang sachi khe Sabbath tsathang ghena anyi nsachi. 28Tsalina Anyi Tsawa tsüna Sabbath Pvüwa la le.”
Currently Selected:
MARK 2: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
