MARK 13
13
Jisu na Kekinyijjen Yasa Keten Kekhi
(Mat 24.1-2; Luk 21.5-6)
1Jisu na Kekinyijjen teshi nu bvü keten wi ma sansikeyathu kesü na ma wi khi, “Kesansiwa, ghangchilo! Ajjen nu alonthu ha khatila amankesa nu!”
2Jisu na luneng, “No ajjen ha muben ma? Alon kesütanla ma pen wi nbenla, nu tsüdila pasha ben le!”
Agükeccü nu Kemeten-kemesha
(Mat 24.3-14; Luk 21.7-19)
3Jisu na Kekinyijjen kejentan Oliv Yikha wi donki keben wi Pitor, James, Johan, nu Andria, hathu na gho kuthila ma wi keü, 4“Kusi hathu ha saben khe pi ikhang kizalo. Nu hathu ha tsüdi sacen keten wi zensu khati saben nu?”
5Jisu na mathu kiza, “Nyu ya nthu nmechu thsüle kesalina kiden-kesha yalo. 6Anyi kejonla inyan wina hati khi ghoben, ‘Hi Khrista le’ isanu mathu anyi kejon mechuben. 7Nthu na akete wi nu kelensie wi aghikesa nu kekivvü jüh zaya lela leben güccü nsala. Hathu ha atuwa nsathu yishü isala asakhenwa tsüna npi gho. 8Diyyithu na khokho ssi kesali; nu kadiyyithu na khokho ssi kaghashen ben. Apen tsüdi wi ameghükuju nu azeng saben. Hathu hana atsakepvügha wi kinaa atuwa ti kesa.
9 #
Mat 10.17-20; Luk 12.11,12. “Isala nthu kiden-kesha yalo, kepaghenanye nyu na nthu ghan sen nu ajühkekaghaten pen wi waben. Sinagogthu wina nthu kiccü; nthu na kekhang kesenthu nu kadimithu tuwi ngan nu ighena Jühtheü Kemehaiwa pi mathu kizaben. 10Isala asakhenwa tsü npi kegho wina Ajühkemehaiwa ha pi anyi tsüdi wi khichi nsathu yishü. 11Nyu na nthu ghan sen nu ajühkekaghaten pen wi wa lethu, nthu na npi wina mangwa le khitennu kesa leben güccü nsala; isala matsü wina mangwa pi nthu cü khe tsü khilo. Kepaghenanye nthu na khi ketenwa ajüh tsüna nthu jüh nye isala Kemetha Ghamu wina ghoben. 12Anyithu na mathu cünyuthu ghan pi nyu kwen wi chi nu shü thsüaben, nu abathu la mathu tsangathu wi tsüti saben. Atsangathu na mathu bajjathu ssi kaghashen nu mathu pi shü thsüaben. 13#Mat 10.22 Ighena nyu tsüdila nthu nanmeghü ben. Isala thowa na kekheneng sen wa asakhen cuya khe ma hangsha yaben.
Qhethiketen Kesawa
(Mat 24.15-28; Luk 21.20-24)
14 #
Dan 9.27; 11.31; 12.11 “Nthu na ‘Qhethiketen Kesawa’ tsüna ma pen nkenye wi ngan keben muben.” (Kesithu na: ha mangwa jjügi khe chüshi yalo!) “Tsaseng wi Judea wi kebenthu tsüdila ayikha wi bvü wa nsathu yishü. 15#Luk 17.31Anyi ajjen mili wi kebenwa na matsü dedi sen du ajjen wi atsanqai khuya le nsala. 16Anyi alli wi kebenwa na kheneng ajjen wi whala ma thsü khuyale nsala. 17Tsü tsüwi kinyibvü atsa-npvü, nu atsa ssi ketenthu ghena khatila qhethiketen saten nu! 18Hathu ha pathsü wi nsa thsüle kesalina Anyiza wi kekhie sabenlo. 19#Dan 12.1; Ccü 7.14 Kepaghenanye tsü tsüwi ketizenkesa na adechhü Anyiza na ayyi kesachi wina ghola khili kahang kecu wi tsüti npi sa, nu ghaketen wi la tsüti sa neng nben. 20Isala Apvüwa na atsathang tsü sa pi zeng cüdha, keujüla ma tsüti nsa lethu anyi thola hangya nkesa. Ma nyi ma kessiya kesathu ghena atsathang tsü sa pi zeng cüdha.”
21“Keujüla anyi kesü na nthu wi ‘Ghangchilo, Messiya na he wi benle,’ nyelela ‘Ghangchilo, ma kawi benle,’ khi lela ma n-nondi lalo. 22Kepaghenanye milikemesa Messiyathu nu milikemesa atusenjüh-kechüthu na ghoben. Mathu na saya kemehai chu Anyiza na kessi keyathu lela mechu sen bvüale kesalina amankesa nu azensuthu saben. 23Nthu kiden-kesha yalo! Hi matsü npi wina pala tsüdi pi nthu kizadha.”
Anyi Tsawa na Ghoketen
(Mat 24.29-31; Luk 21.25-28)
24“Ketizenkesa tsathangthu seng wi aghani na jang, asha na nwegüla, 25#Isa 34.4; Ccü 6.13; Jol 2.10 ghotsithu na tang wina qanca dugho, nu atssan wi kekhangthu pakuliaben. 26#Dan 7.13; Ccü 1.7 Tsaseng wi Anyi Tsawa na akulu- keshü miwi na khang ntsawa nu anyankethang sa ghoben. 27Ma tangnyilothu kesun pi ayyi ccügwen mejü wi kesü na wa pahanwa kecu chi nu Anyiza na kessikeya nyithu saghu yaben.
Khhaghabvü ton wi Chüya
(Mat 24.32-35; Luk 21.29-33)
28“Nthu khhaghabvü ton wina chüyalo. Khathansha wi ma cüna wi mawa kaghani na bighi shigü shagha khe mazu wa tendhale kesa nthu na chüyaden. 29Tsü makesü, nthu na pala hathu kuli keben kemu wi matsü na tetsakidha nu ghole kidenyadha kesa chüyalo. 30Anyi nansü hang kebenthu ha tsüdi npi keshü tuwi hathu ha tsüdi saben kesa meshenyalo, 31Atssan nu ayyi na nmilaben, isala ijüh tsü nmila sa nben.
Thola Atsathang nu Matsüwa Tsü Nchü
(Mat 24.36-44)
32 #
Mat 24.36
“Anyi thola tsü tsathang nu matsüwa tsüna khathansha wi ghoben khe nchü. Abawa ketan khe tangnyilothu nu Atsawa lela nchü. 33Kiden-kesha, meghe-metsa nu hie benlo, kepaghenanye nthu na matsüwa tsüna khathansha wi ghoten khe nchü. 34#Luk 12.36-38Tsüna anyi kesü na ma jjen wi kekuli pi ma maghathu dhenchi, kesüsü ma kekuli salo pi cüchi nu ajjen kehiewa wi hieben lalo kiza nu kijünyi wa kesa tsüti saben. 35Kiden-kesha nu hie benlo, kepaghenanye nthu na ajjen pvüwa na kusi ghoten khe nchü. Tsüna minulen, aghaja non, atsantheghi keben nyelela aghani shhugho meyi wi saya mehai. 36Keujüla ma zuli gho lethu, ma nthu na jen keben mu meya thsüla. 37Hi nthu wi kiza keben ha tsüdi wi kiza benle. Hie benlo.”
Currently Selected:
MARK 13: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
