LUK 6

Sabbath Jjügi Kekeü

(Mat 12.1-8; Mrk 2.23-28)

1 # Aye 23.25 Sabbath tsathang kesü wi Jisu na allithu pvüdhi wa. Ma sansikeyathu na asubi mahan pi mathu kwen wi menu nu dsaben. 2Farisithu pahan na keü, “Nthu mangkesa na Sabbath tsathang yen tsü pakhhi ben nu?”

3 # 1 Sam 21.1-6 Jisu na mathu luneng, “David nu ma nyithu na ghamaya kesa wi khati sa khe nthu na si meya kwe? 4#Lev 24.9 Ma Anyiza jjen wi du nu keqhaikedithu ketan khe kepa wi kedsa ayen nkemi mesawa tsü khuya nu dsa nu pi ma nyithu la cü.”

5Nu Jisu na khi, “Anyi Tsawa ha Sabbath Pvüwa la le.”

Anyi Ma kwen kecügüshüwa

(Mat 12.9-14; Mrk 3.1-6)

6Sabbath tsathang kepa wi Jisu na Sinagog wi wa nyu sansiben. Ciwi anyi kesü ma kwen ajewa kecügüshü na ben. 7Ayenkesansithu nu Farisithu na Jisu Sabbath tsathang wi nyu sa pi mehaicü tenlanu ghang ben, kepaghenanye mathu na ma kesazzi muyathu ma kimenni cüle saben. 8Isala Jisu na mathu kemeshen tsü chüya nu kecügüshüwa wi kiza, “Shagha nu he atuwi gholo.” isanan ma shagha ciwi nganya. 9Tsaseng wi Jisu na mathu wi kiza, “Hi nthu keüben: Sabbath tsathang wi pala kemehai kulila nkemehai kuli nu? Kahangli kesü hangshayala yasa pi kesa ayen ben nu?” 10Ma mathu tsüdi ghang kevüli chi nu anyi tsüwa wi kiza, “Nkwen chang chilo.” Anyi tsüwa na tsüti sachi nan ma kwen na mehai nengya. 11Isala mathu na alebenminu nu mathu jawi Jisu pi khati sanu kesa keccünengli wa.

Jisu na Apostelthu Taghakeni Kessikeya

(Mat 10.1-4; Mrk 3.13-19)

12Tsü tsüwi Jisu na kekhie sale ayikha kesü miwi ki nu ghaja thangthang Anyiza wi kekhie sa. 13Atsathang keshagha wi ma sansikeyathu ci pi ma wi chi nu mathu jawi meshu taghakeni kessiya nu tsü nyan pi Apostel ciya: 14Simon (pi Pitor le khi ketenwa) nu ma cünyuwa Andria; James nu Johan; Filip nu Bartholoma, 15Mathi, Thoma, Alfia tsa James, nu Simon (pi Leben kezüwa ciden), 16James tsawa Judah, nu Iskariot Judah nyu kematsawa.

Jisu na Nyu Kesansi nu sa pi Mehaikecü

(Mat 4.23-25)

17Jisu na ayikha wina apostelthu ssi dugho ketijü wi ngan nu ciwi ma sansikeyathu kejon na ben. Ciwi anyi kejon na Judea, Jerusalem, nu Tur nu Sidon tssüghüsa nyunutithu wina gho, 18mathu na ma jühkina nu mathu kesakinaa sa pi mehaiyale ghoben. Nkemehai ghamuthu na pondeja ketenthu la gho nu sa pi mehai cü. 19Anyi tsüdila ma payale sa, kepaghenanye ma wina kekhang shhugho nu mathu tsüdi sa pi mehai cüben.

Anonkeghe nu Ahathakina

(Mat 5.1-12)

20“Nthu ketha-uthu kemihhi ntsa;

kepaghenanye Anyiza Kadiyyi tsüna nthu ji saden!”

21“Nthu khili ghama kebenthu na kemihhi ntsa;

kepaghenanye nthu na ben yaden!”

“Nthu khili qai kebenthu na kemihhi ntsa;

kepaghenanye nthu na anonghe yaden!” 22#1 Pi 4.14 “Anyi Tsawa ghena nyu na nthu nanmeghü, nthu meya mvu, nthu kimenni, nu nthu nkemehai khi lethu, nthu na kemihhi ntsa! 23#2 Kc 36.16; Kek 7.52 Tsü ghanan nthu anonghe nu nashü benlo, kepaghenanye nthu kutimen tsüna tang wi ben. Kepaghenanye mathu bamyithu la atusenjüh-kechüthu miwi tsü makesü sale.

24“Isala nthu khili kebenthu ghena qhethiketen saben;

nthu na hang pi ccayadha!”

25“Nthu khili kejonla kebenthu qhethiketen saben;

nthu na ghama ben!”

“Nthu khili anonghe kebenthu qhethiketen saben;

nthu anongü nu qai ben!”

26“Nyu na nthu seng kebenthu qhethiketen saben; kepaghenanye mathu bamyithu la milikemesa tusenjüh-kechüthu cüki tsü makesü khi .

Ghinyithu Ketizen

(Mat 5.38-48; 7.12)

27“Isala ijüh za kebenthu, hi nthu kizaden: Nthu ghinyithu tizenyalo, nthu nanmeghü ketenthu ghena kemehaiwa sa, 28sawegü pi nthu kishencü ketenthu cü, nu nthu nkhichila ketenthu ghena kekhie salo. 29Keujüla nyu ndephi kesü cen cü lethu, ma ya pahanwa la cen thsülo; keujüla nyu nthsü khuya lethu, ma ya ngwomejuwa la khuya thsülo. 30Nyu na nthu wi pala kekhie tsüdila pi cülo, nu nyu nthu ji khuya lela tsü nkhie neng lalo. 31#Mat 7.12 Nyu ya nthu kenenwa sa thsü mvu keben tsüti nthu la nyu kenenwa satenlo.

32“Keujüla nthu na nthu tizen ketenthu ketan tizen lethu, nthu mangkesa na kemihhi ghang ten nu? Kesami nyithu lela nyu mathu tizen ketenthu tizenten le! 33Nu keujüla nyu nthu ghena kemehai kuli ketenthu ghena ketan nthu la mathu ghena kemehaiwa kuli lethu, nthu mangkesa na kemihhi ghang ten nu? Kesami nyithu lela tsü makesü saten le! 34Nu keujüla mu nengya kemehaithu wi ketan nthu ji pi nna thsü lethu, nthu mangkesa na kemihhi ghang ten nu? Kesami nyithu la mathu ji pi kesami nyithu nna thsü nu kejon mu nengyale sa tenle! 35Isala nthu nankemeghüthu tizen, nu mathu ghena kemehaiwa salo; pala pi nyu nna thsü nu mu neng yale nsa la. Isathu nthu kutimen muyaben, nu nthu na Kemisintsa Anyiza tsangathu sayaben. Kepaghenanye ma nkemehaithu nu gheshighenathu tuwi lela mehaiden. 36Nthu Ba na nyu nantizen keten ti nthu la nyu nantizen tenlo.

Nyu Kesami Kebha

(Mat 7.1-5)

37“Nyu kesami nbha la, isathu Anyiza la nthu kesami bha nben; nyu n-nyuwa nsa la, isathu Anyiza la nthu n-nyuwa sa nben; nyu kesami teshi pi cülo, isathu Anyiza la nthu kesami teshi pi cüben. 38Pala pi nyu cülo, isathu Anyiza la pi nthu cüben; tsüna kede kemehai sala deshenchi, kecügüchi, nu zügüpongca pi nthu thsü wi keshuchi cüben. Kepaghenanye nthu na kede pi nyu kecü tsüti Anyiza la kede pi nthu ccü neng shaben.

39 # Mat 15.14 Nu Jisu na ajühkaghape ha pi mathu wi kiza, “Anyon nkemu nyi kesü na kepawa lentsütsonya nben; keujüla ma tsüti sa lethu manyi qho ayyiku wi khuliduaben. 40#Mat 10.24-25; Jhn 13.16; 15.20 Shüka kebenwa tsüna ma kesansiwa miwi ndiki; isala shüka kebenwa tsü lela shüka cenya lethu ma la ma kesansiwa tsüti sayaben.

41“Mangkesa na n-nyon wi kenenkuwa keti keben tsü nchüla ncünyuwa nyon wi kenenkuwa kizzakeu keben tsü ghang ten nu? 42No khati nu n-nyon wi kenenkuwa keti keben tsü nmula ncünyuwa wi ‘Icünyuwa, hi n-nyon wi kenenkuwa kizzakeu keben tsü khüshi cü na,’ isa khiya mehai nu? Nthu nkenyeghekesathu! Atuwa sa nthu nyon wi kenenkuwa keti keben tsü khüshilo, isathu ncünyuwa nyon wi kenenkuwa kizzakeu keben tsü mehaitsü mushiya mehai le.”

Achanton Kesü nu Mabi

(Mat 7.16-20; 12.33-35)

43“Achanton kemehai na ma bi nkemehai bün nten; nyelela ma ton nkemehai na ma bi kemehai bün nten. 44#Mat 12.33 Achanton tsüdila ma bi wina chüyaden; nthu na aghazüton wi khhaghabvü bi laya nten, nyelela ataqaeton wi kemeshentsse bi laya nten. 45#Mat 12.34 Anyi kemehai nyi na ma leben wi pala kemehai keben tsü sen shhugho den; nu anyi nkemehai nyi na ma leben wi pala nkemehai keben tsü sen shhugho den. Kepaghenanye anyi kesü ma leben wi mangwa ben khe ma pang pi tsü khishi chiden.

Ajjen Keni Kesathu

(Mat 7.24-27)

46“Nthu mangkesa na, ‘Apvüwa, Apvüwa,’ hi ci nu hi salo pi nthu kekiza tsü sa nten nu? 47Anyi thowa na hi wi gho ijühthu zaya nu tsü saten khe ma khati kesa khe hi pi nthu ccücaden. 48Anyi tsüwa tsüna ma jjen pi alonshi hoh pi dhugü sa nu ma miwi kedegüki pi sa ketheng ti le! Aghaku na pong menni pi atssüdan sagho ajjen tsü shun lela qanca nben, kepaghenanye tsü na mehaitsü satheng. 49Isala thowa na ijühthu zaya nu tsü sa nten khe tsüna anyi kesü na ma jjen pi ayyi nchhüla magi kedegüki pi sa ketheng ti le! Atssüdan sagho ajjen tsü shun nu tsüna qanca, nu tsü keyasa na qhethiketen sa!”

Currently Selected:

LUK 6: RENGNBSI

Highlight

Copy