LUK 22
22
Jisu Ghanyale Achokesa
(Mat 26.1-5; Mrk 14.1-2; Jhn 11.45-53)
1 #
Bvü 12.1-27
Shhukeya Kho azimi nkechi mesa pi Kemishu Kho tsüwa na tetsakia. 2Keqhaikedi ntsathu nu Ayenkesansithu na anyithu messi kesalina mathu alen bha nu kuthila Jisu pi shü thsüale sa.
Judah na Jisu Matsa Cüale Kecen
(Mat 26.14-16; Mrk 14.10-11)
3Tsaseng wi Satan na Judah Iskariot, sansikeyathu Taghakeni jawi kesü tsü leben wi dua. 4Tsalina Judah na shhula ma khati nu Jisu matsa pi mathu kwen wi chiya nu kesa keqhaikedi ntsathu nu Kekinyijjen ghikehie kedithu ssinu keccünengli. 5Mathu na anongheya nu apisa pi ma cü. 6Judah la tsü anlo sa nu anyithu nchü thsüla Jisu ghan pi mathu kwen wi chiale kesa matsü kemehai ghang wa.
Jisu na Shhukeya Kho tsse dsale Kekiden
(Mat 26.17-25; Mrk 14.12-21; Jhn 13.21-30)
7Shhukeya Kho ghena azimi pi nkechi mesa pi Kemishu Kho wi khaghaneni zza kepathi tsathang na gho cua. 8Jisu na hati khi nu Johan nu Pitor manyi kesun pi wa thsü, “Ithu gweghe Shhukeya Kho tsse dsale kesalina wala kidenyalo.”
9Manyi na ma keü, “No ishinyi ya wa khiewa kidenya thsü mvuben nu?”
10Ma luneng, “Nshinyi na anyunutiwa wi du lethu, anyi kesü na atssü khüti pvü keten metu yaben. Ma niesen nu ma ajjen khiewa wa khe ciwi dulo, 11nu ajjen tsü pvüwa wi khilo, ‘Kesansiwa na no keü ben, hi sansikeyathu ssinu Shhukeya Kho tsse dsa keten tsüna ajjen-keshondhi khie wi nu?’ 12Isalethu ma ajjenshha tangwa keshondhi keti kesü pi nshinyi ccüca benna ciwi pala tsüdi kidenyalo.”
13Manyi wa nan Jisu na manyi kekiza tsüdila muya, nu manyi Shhukeya Kho tsse tsü kidenya.
Apvüwa Ssinu Kemishu
(Mat 26.26-30; Mrk 14.22-26; 1 Kor 11.23-25)
14Matsü na kegho wi Jisu na apostelthu ssinu miz wi donkiya. 15Ma mathu wi khi, “Hi ketizen npi kesa wi nthu ssinu Shhukeya Kho tsse ha dsa mvu ntsa sale! 16Kepaghenanye hi nthu kizaden, Anyiza Kadiyyi wi ha ma jjügi npi kesacen chu hi khiela ha dsa nbendha.”
17Tsaseng wi Jisu na ahyi pieya nu Anyiza keseng kekhie sachi nu khi, “Ha pieya nu pi nthu jawi gishü yalo. 18Hi nthu kizaden, Anyiza Kadiyyi na npi kegho chu hi khili nten na kisengtssü ha njjüdha.”
19Tsaseng wi amesa be kesü khuya nu Anyiza keseng kekhie sachi nu pakhhiya nu pi mathu cü nu khi, “Hawa ha igwo, nthu ghena khukechiwa tsü. Hi meshen benle kesalina hawa ha satenlo.” 20#Jer 31.31-34 Tsüti dsakeya seng wi ma ahyi pi mathu cü nu khi, “Ahyi hawa ha Anyiza na ijjü wina cenkethenjüh ketheüwa sa kechi nthu ghena keji kechiwa tsü.” 21#Zak 41.9. “Isala, ghangchilo! Hi matsa ketenwa tsüna he wi miz wi hi gweghe ben le! 22Anyiza na khi ketheng ti Anyi Tsawa na shüaben, isala anyi ma matsa ketenwa ghena tsü khatila qhethiketen saten nu!” 23Tsaseng wi mathu na mathu jawi thowa na hawa ha sa ten nu kekeüli wa.
Kediwa sa keten ghena Keccücanli
24 #
Mat 18.1; Mrk 9.34; Luk 9.46 Sansikeyathu jawi thowa na kedi ntsawa sa ten nu kesa keccücanli shagha. 25#Mat 20.25-27; Mrk 10.42-44 Jisu na mathu wi khi, “Ayyi ha wi kadimithu na mathu nyithu miwi kekhang ben, nu kekhang kesenthu pi ‘Anyi pvüshangthu’ ciden. 26#Mat 23.11; Mrk 9.35 Isala nthu ghena tsü hati nyele, isani nthu jawi kedi ntsawa na ghanyi ntsawa ti, nu aliwa na amaghawa nsathu yishü. 27#Jhn 13.12-15 Donki nu dsajjü kebenwa la kugü pi ma cü kebenwa, manyi thowa di nu? Donki kebenwa le. Isala hi kugü pi cü kebenwa tsüti sa nu nthu jawi ben.
28“Nthu na hi ketizen kesa tsüdi wi hi gweghe ben; 29nu iBa na kekhang senya kemehai pi hi kecü tsüti hi la pi nthu cüden. 30#Mat 19.28 Nthu na hi Kadiyyi wi hi gweghe dsa nu jjüben, nu nthu na kadipen wi donki nu Israel mizza Taghakeni miwi kekhang senben.
Jisu na Pitor Ma Nchüle Khiaketen Kekhi
(Mat 26.31-35; Mrk 14.27-31; Jhn 13.36-38)
31“Simon, Simon! Kinalo! Satan na allikeca kesü na asu kemeshhü ti, kemehai nu nkemehai pi kepapa sale kesalina nthu tsüdi ghan nanle khieyadha. 32Isala Simon, no kenondi nmi lathu keyishü ghena hi nghena khie. Nu no hi wi kheneng gho lethu, no npvüshangthu leben satezü cülo.”
33Pitor na luneng, “Apvüwa, hi no gweghe atssüzü sa wa nu no gweghe shüya mehai le!”
34Jisu na khi, “Pitor, hi no kizaden, no shita wi kecheng tughu no hi nchüle npi kekhi chu awegü na khou nben.”
Apisa Hikhu, Ajula, nu Njünnu
35 #
Mat 10.9-10; Mrk 6.8-9; Luk 9.3; 10.4 Tsaseng wi Jisu na ma sansikeyathu keü, “Hi nthu na apisa hikhu, ajula, nyelela accüguwen nsenla kesunshi kechi wi nthu na pala pahan zeng kwe?
Mathu na khineng, “Nyele, mangla nsale.” 36Jisu khi, “Isala khilitsü thowa na apisa hikhu nyelela ajula ben khe khuyalo, nu thowa na njünnu nmi khe ma gwomejuwa jeü pi kesü sheiya nsathu yishü. 37Hi nthu kizaden, Ntsawajüh wi hati ighena khi ketheng tsü sacen nsathu yishü, ‘Ma pi kesami nyithu jawi sichi ghudha,’ kepaghenanye ighena zhü kethengwa tsü sacen nsathu yishü.”
38Sansikeyathu na khi, “Apvüwa, ghangchilo! He wi njünnu keni ben le!” Ma khineng, “Tsüna mehaidha.”
Jisu na Oliv Yikha wi Kekhie
(Mat 26.36-46; Mrk 14.32-42)
39Jisu na khenighani sa keten ti anyunutiwa tsü teshi nu Oliv Yikha wi wa; nu sansikeyathu la ma gweghe wa. 40Nu ma wala apen cukeya seng wi mathu wi kiza, “Nthu na kemechu wi ndule kesalina kekhie saki benlo.”
41Tsaseng wi ma mathu teshi nu alon pi kethenchi-u wi wa ma khutsüdu nu kekhie sa. 42Ma hati khi, “Iba, keujüla no kenen lethu hi wina ahyi ha khuyalo, isala hi kenen nyela no kenen ti sayalo.” 43Tangnyilo kesü tang wina gho ma satezü cü. 44Ma ketizen sa ntsa kekhie sa, nu tsü miwi la sa neng, nu ma keshijü na ajjü ti llesen nu ayyi wi qanca wa. 45Ma kekhie seng wi shagha nu sansikeyathu wi wha nan mathu na ahathanathi jen keben muya. 46Ma mathu wi kiza, “Nthu mangkesa na jenben nu? Nthu na kemechu wi ndule kesalina kekhie saki benlo.”
Jisu Ghankeya
(Mat 26.47-56; Mrk 14.43-50; Jhn 18.3-11)
47Jisu na ajühkhitu keben wi Judah, sansikeyathu Taghakeni jawi kesü tsüna aliwa sala anyitenti ssinu ghoa. Ma Jisu kete wi wha nu ma kimang chi. 48Isala Jisu na khi, “Judah, no Anyi Tsawa kimang nu ma matsa cüaten kwe?”
49Sansikeyathu Jisu gweghe ketenthu na khati saben khe mukeya wi mathu keü, “Apvüwa, njünnu pi mathu süla khati nu?” 50Isanu mathu meshu kesü na njünnu pi Keqhaikedi Kemisiwa maghawa khuna ajewa handhia.
51Isala Jisu na khineng, “Teshi yilo, mehaidha!” Ma anyi tsüwa khuna pachi nu sa pi mehai cüa.
52Tsaseng wi Jisu na ajühkhi pi ma ghanle keghothu keqhaikedi ntsathu, Kekinyijjen ghikehie kedithu, nu keshenpfüthu wi kiza, “Nthu na hi pi kaghanfü nyi kesü ti sa nu njünnu nu achanghonthu sen nu hi ghanle ghoben kwe? 53#Luk 19.47; 21.37 Hi atsathangla nthu gweghe Kekinyijjen wi ben lela nthu na hi ghan meya. Isala matsü hawa ha nthu ji nu kejang kekhangwa tsü sadha.”
Pitor na Jisu Nchüle Kekhi
(Mat 26.57-58,69-75; Mrk 14.53-54,66-72; Jhn 18.12-18,25-27)
54Mathu na Jisu ghanya nu ma ssi nu Keqhaikedi Kemisiwa jjen wi wa; nu Pitor na temeja wi ma nieden. 55Accühha non wi anni satheng nu Pitor la wa ciwi donki kebenthu gwegheya. 56Maghale kesü na ma anni kete wi donki keben muya nu gho ma ghangti nu khi, “Anyi ha la Jisu nieten le!”
57Isala Pitor na nyele nu khi, “Nzawa, hi ma thowa khe nchüle!”
58Matsü keu seng wi anyi kesü Pitor muya nu khi, “No la mathu jawi meshu kesü le!”
Isala Pitor na luneng, “Hi nyele!”
59Nu amighe kekihhe kesü-u seng wi anyi kepa wi kesü la gho hati khi khvu sa, “Anyi hawa ha la ma nieten kesa chütiben, kepaghenanye ma la Galilee nyi kesü le!”
60Isala Pitor na luneng, “No mangwa le khiben khe hi nchü le!”
Ma tsü khiben meshü awegü na wan khou shagha. 61Apvüwa na khapeghe ghala Pitor ghangchi, nu Pitor na Apvüwa na mangwale ma kiza khe tsü meshenya, tsüna: “No shita awegü npi kekhou tuwi kecheng tughu no hi nchüle khiaben .” 62Pitor na akhemi wi shhula qai ntsa wa.
Jisu Nankeqhe nu Kekiccü
(Mat 26.67-68; Mrk 14.65)
63Anyi Jisu ghihie kebenthu na ma nankeqhe nu ma kiccüwa. 64Mathu na ma nyon qhanbhon nu ma wi keü, “Thowa na no shunben khe khi nanlo!” 65Mathu na kepa wi la pala kejon khi pi ma metsimeni.
Jisu na Ajühkaghaten Tuwi kewa
(Mat 26.59-66; Mrk 14.55-64; Jhn 18.19-24)
66Atsathang keshagha wi keshenpfüthu, keqhaikedi ntsathu, nu Ayenkesansithu na kemetuli, nu Jisu ssinu mathu tuwi gho. 67Mathu na ma wi keü, “Ikhang kizalo; no Messiya kwe?”
Ma luneng, “Keujüla hi nthu kiza lethu, nthu na hi nondi nben, 68nu keujüla hi nthu wi pala kesü keü lethu, nthu na khiya nben. 69Isala khili nten na Anyi Tsawa na Kemisintsa Anyiza kwen ajewa wi donkiwa tendha.”
70Mathu tsüdila keü, “No Anyiza Tsawa kwe?”
Ma luneng, “Nthu na hi tsüle khi.”
71Mathu na khi, “Ikhang ha miwi chüza nsenla mehaidha le! Ikhang ketanla ma mangwale khi khe zayadha!”
Currently Selected:
LUK 22: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
