LUK 13

Kesami wi khapegheya nyethu Keshü

1Tsü tsüwi anyi pahan na Pilat na Anyiza nkechü nyi Galilee nyithu na ahhansha sa pi Anyiza kinyi keben pathi kesa cüki pi Jisu kiza. 2Jisu na mathu wi khineng, “Galilee nyithu tsüti pathi kesalina nthu na mathu Galilee nyi kepathu miwi samiki le meshen ben kwe? 3Nyele! Hi nthu kizaben, nthu na kesami wi khapeghe meya lethu, nthu la mathu ti shüaben. 4Siloam wi anyi meshu tagha nu tazen aducü kezhü na qanca dugho mathu kecenthi kesathu tsü khati nu? Nthu tsü mathu na Jerusalem wi kahang kepathu tsüdi miwi nmehaiki le meshen ben kwe? 5Nyele! Hi nthu kizaden, nthu na kesami wi khapeghe meya lethu, nthu la mathu ti shüaben.”

Achanton mabi Nkebünwa pi Ajühkaghape

6Tsaseng wi Jisu na ajühkaghape ha pi mathu kiza: “Anyi kesü ma lli wi khhaghabvüton kesü na ben. Ma mabi laya le bha wa, isala kesütanla mu meya. 7Tsalina ma alli kehiewa wi kiza, ‘Ghangchilo, hi amapi ha kecheng khhaghabvüton ha wi mabi laya le ghang gho lela kesütanla mu meya. Ha shüchilo! Mangkesa na ha pi hati ayyi khenla ben thsü nu?’ 8Isala alli kehiewa na khineng, ‘Kediwa, amapi hawa ghena makesasalo. Hi ma ccü chhükevüli nu ayyi kemehai pi chiaden. 9Isanu vvüthi wi mabi bün lethu mehaidha, isala keujüla mabi nbünla lethu tsü shüchilo.’ ”

Jisu Na Sabbath tsathang wi Nza Kesü sa pi Mehaikecü

10Sabbath tsathang kesü wi Jisu na Sinagog wi nyu sansiben. 11Nza kesü nkemehai ghamu na amapi tagha nu tazen ma miwi ben kesalina ma sanaa nu meshonqhe shagha meya kukela lenketsen nyi kesü ciwi ben. 12Jisu na ma mukeya wi ma cichi nu khi, “Nzawa, no kesakinaa wina mehai yaden!” 13Jisu na ma kwen chang pi nzawa miwi chi, nu ma wan meshonqhe shaghaya nu Anyiza seng.

14 # Bvü 20.9-10; Aye 5.13-14 Isala Sinagog wi kediwa na Jisu na Sabbath tsathang wi nyu sa pi mehai kecü ghena ma lebenminu nu anyithu wi khi, “Ciwi ithu kekuli kesa ghena ghanan tugho na ben, tsalina tsü ghanan jüwi gho nu nthu sa pi mehai yathu khe Sabbath tsathang wi ngho lalo.”

15Apvüwa na ma wi khineng, “Nthu nkenyeghe kesathu! Nthu tsüdila Sabbath tsathang wi nthu mesü nyelela gada ma jjen wina lisha sen wa atssü pi jjü thsü nten kwe? 16Khili he wi Abraham shicübvügha nza kesü Satan na amapi tagha nu tazen ma bhen pi theng; Sabbath tsathang wi ma nkelisha chi cü-u kwe?” 17Ma luneng kechi tsüna ma ghinyithu tsüdi sa pi jüghe thsüa, isala anyithu tsüdila ma amankesa sa kechi ghena anonghe.

Hanuwencü pi Ajühkaghape

(Mat 13.31-32; Mrk 4.30-32)

18Jisu na keü, “Anyiza Kadiyyi hana khati kesa nu? Hi ha pi mangwa ghapeya mehai nu? 19Tsüna hati kesa: Anyi kesü na hanuwencü khuya nu sen wa ma lli wi vvüchi. Tsüna shigü shagha ma ton kesü saya, nu awathu na gho ma cünathu wi mathu ghacen sayaden.”

Azimi pi Ajühkaghape

(Mat 13.33)

20Jisu na kheneng keü, “Hi Anyiza Kadiyyi ha pi mangwa ghapeya nu? 21Tsüna hati kesa: Nza kesü na azimi pahan khuya nu pi ashijü kecheng wi awheng maben kuwenghu pi azü npi keceng chu theng.”

Ajenka Kemanghanwa

(Mat 7.13-14,21-23)

22Jisu na Jerusalem wi kewalen sala anyuti nu anyu kejon pvüdhi wa nu nyu sansi. 23Anyi pahan na ma wi keü, “Kesansiwa, anyi kezeng-u ketan hangsha yaben kwe?”

Jisu na mathu luneng, 24“Ajenka kemanghanwa wi dule nthu piketsü salo; kepaghenanye anyi kejon na ciwi dule saben isani duya nben. 25Ajjen pvüwa shagha ajenka khenyaben; tsaseng wi nthu na akhemi wi ngan nu hati khila ajenka kekha ben, ‘Kediwa, ikhang ghena ajenka shachi cülo!’ Ma khineng, ‘Nthu na khiewa na gho khe hi nthu nchü le!’ 26Tsaseng wi nthu na khineng ben, ‘Ikhang na no gweghe dsa nu jjü, no alen wi ikhang sansi le!’ 27#Zak 6.8 Isala ma khineng ben, ‘Nthu na khiewa na gho khe hi nthu nchü. Nthu gheshighena nyithu, hi wina bvülo!’ 28#Mat 22.13; 25.30 #Mat 8.11-12 Nthu na Abraham, Isak, Jakob, nu atusenjüh-kechüthu tsüdi na Anyiza Kadiyyi wi ben, isala nthu pi akhemi wi chi ketheng kemu wi nthu na qai nu ayha kemeküliben. 29Anyithu na ayyi niduwa, nishuwa, nu acülawa, aghawa wina ghola Anyiza Kadiyyi kemishu wi donkipen. 30#Mat 19.30; 20.16; Mrk 10.31 Isanu khili asakhen sa kebenthu na atu sa, nu khili atu sa kebenthu na asakhen saben.

Jisu Na Jerusalem Nanketizen

(Mat 23.37-39)

31Tsü tsüwi Farisithu pahan na Jisu wi gho nu ma wi kiza, “No apen ha wina bvü nsathu yishü, kepaghenanye Herod na no pathi mvuben.”

32Jisu na mathu luneng, “Wala whewhe kizala, ‘Hi nansü dhitsü ha atsaghangthu jügüshi nu kesakinaathu sa pi mehaiben, nu kecheng ghanan wi hi kekuli sacen yaben.’ 33Isala hi nansü, dhitsü, nu pitsü ha ilen wi ntenthu yishüben; kepaghenanye atusenjüh-kechü kesü tsüna Jerusalem wi ketan khe khiewi la ma pathi nben.

34“O, Jerusalem, Jerusalem! No atusenjüh-kechüthu pathi, nu Anyiza nyilothu kesun pi no wi kechi tsü alon pi kecenthi le! Hi khaju tughu awegübvü na ma gisha pi ma zzathu ghong keten ti ikwen chang pi n-nyithu tsüdi ghatisen ben mvu, isala nthu na hi ya tsüti nsa thsü mvu le! 35#Zak 118.26 Ghangchilo, nthu Kekinyijjen teshiaden. Hi nthu kizaden, matsü na gho nu nthu na ‘Anyiza na sawegü pi Apvüwa nyan wina gho ketenwa kecüwa salo,’ npi kekhi chu nthu na hi mu nbendha.”

Currently Selected:

LUK 13: RENGNBSI

Highlight

Copy