LEVIYEN 2

Asu pi Kekinyi

1Anyi kesüle kesü lela asu pi kekinyi kesü sa lethu ma atuwa sa tsü don pi awheng sa. Ma oliv deli nu hankedemvu pi tsü miwi chi, 2nu tsü sen nu Aaron nyi keqhaikedithu wi gho. Keqhaikedi kekuli sa kebenwa na awheng, adeli, nu hankedemvu awha kesü khuya nu tsü maben pi Apvüwa cüdhale kesa zensu wina tsüpi kekinyipen miwi mecang ben. Apvüwa na atsse pi kekinyi hawa han nenden. 3Asu pi kekinyi kesa wi kesentu tsüna keqhaikedithu ji; tsüna atsse pi Apvüwa cü kesa wi khushikeya ghena metha ntsawa.

4Keujüla annibhon wi kegü mesa pi kekinyi sa lethu azimi pi nchila. Tsüna awheng nu oliv deli saghu pi amesa shamlu nyelela adeli pi awheng tsü nyen pi ghapasi güya mehai.

5Keujüla kegü khu wi kegü mesa pi kekinyi sa lethu tsüna awheng nu oliv deli saghu pi azimi nchila güben. 6Nthu tsüpi kekinyi kesa wi pakhhi pi kizzakiki sa nu adeli pi ma miwi keshuchi.

7Keujüla kennunpfü wi kegü mesa pi kekinyi sa lethu tsüna awheng nu oliv deli saghu pi güben. 8Tsüpi kekinyi kesü sapi Apvüwa cü nu pi keqhaikediwa cüthu ma tsü sen nu kekinyipen wi waben. 9Tsü maben pi Apvüwa cüdha le kesa zensu wina keqhaikediwa na tsü pahan khuya nu sen wa kekinyipen miwi mecang ben. Apvüwa na atsse pi kekinyi hawa han nenden. 10Pi kekinyi kesa wi kesentu tsüna keqhaikedithu ji; tsüna atsse pi Apvüwa cü kesa wi khushikeya ghena metha ntsawa.

11Nthu na asu pi Apvüwa kekinyi kesa kesü wila azimi nsenla; nthu atsse pi Apvüwa kekinyi kesa wi azimi nyelela anikholi nsenla. 12Nthu na amapi kaghapen alli kewwi su tsü sen nu Apvüwa wi ghoben, isala tsüpi kekinyipen miwi nmecangla. 13Asu pi kekinyi tsüdi wila amcü pi chi, kepaghenanye amcü na nthu nu Anyiza jüwi cenkethenjüh kesü. (Nthu na kekinyi kesa tsüdi wi amcü pi chilo.) 14Nthu na alli kewwi su atuwa sengho Apvüwa wi kekinyi sa lethu asu tsüpi mecang nyelela tenegüchha pi kinyilo. 15Oliv deli nu hankedemvu pi tsü miwi chi. 16Keqhaikediwa na atsse nu adeli pahan pi cü kesa zensuwa tsü nu hankedemvu tsüdi saghu pi atsse pi Apvüwa kekinyi sala mecang ben.

Currently Selected:

LEVIYEN 2: RENGNBSI

Highlight

Copy