LEVIYEN 13

Agükedsakenaa ghena Ayenthu

1Apvüwa na ayen hathu pi Mosa nu Aaron manyi cü. 2Keujüla anyi kesü ma gwo wi kekhuma nyelela avünen nyelela cüccen shhugho nu naa sen wa agükedsakenaa sa wa lethu, ma ssinu Aaron nyi keqhaikedi wi ghoben. 3Keqhaikediwa na kekhuma tsü ghang kaketsü sa, nu ciwi assen na mekidhi shagha nu kekhuma tsüna kevü hyu miwi dhuki shagha lethu tsüna agükedsakenaa sadha, nu keqhaikediwa na anyi tsüwa na keccüna wi nmetha ladhale khishiaben. 4Isala kekhuma tsüna mekidhi lela tsü kevü hyu miwi ndhuki nu assen na mekidhi nwa lethu, keqhaikediwa na anyi tsüpi ghanan tagü ma kepa satheng shaben. 5Keqhaikediwa na tagü ghanan wi wa ma ghang neng ben, nu kekhuma tsüna makesü nu dikayi nwa lethu ma anyi tsüwa pi ghanan tagü ma kepa theng neng shaben. 6Keqhaikediwa na kheneng tagha ghanan wi ma ghang ben, nu kekhuma tsüna mawa nu dikayi nwa lethu ma anyi tsüwa na methaben le khishiaben; tsüna kekhuma ketan le. Anyi tsüwa na ma thsümeni ghasüthu ma keccüna wi metha ben. 7Isala keqhaikediwa na ma ghang kaketsü sa nu ma metha benle kekhishi seng wi kekhuma tsüna dikayi wa lethu ma keqhaikediwa tuwi ngho nengthu yishü. 8Keqhaikediwa na kheneng ma ghang kaketsü saben, nu tsüna dikayi wa benla lethu ma anyi tsüwa na nmethale khishiaben; hana agükedsakenaa le.

9Keujüla anyi kesüle kesü lela ma agükedsakenaa ben lethu ma ssinu keqhaikediwa wi ghoben, 10ma anyi tsüwa ghang kaketsü saben. Ma hyu wi bvüshen shhugho ma ssen na mekidhi sa nu anieten benla lethu, 11tsüna agükedsakenaa ben keten kesüdha. Keqhaikediwa na anyi tsüwa na nmethale khishiaben: anyi tsüpi ma kepa nsala mehai kepaghenanye ma nmetha kesa mutiyadha. 12Agükedsakenaa tsüna anyi kesü gwo wi pvükayi nu ma li na ma ccü kecu wa lethu, 13keqhaikediwa na ma ghang kaketsü saneng ben. Ma agükedsakenaa tsüna agwo maben pong kesa muya lethu ma anyi tsüwa na keccüna wi methale khishiaben. Ma gwo maben mekidhi sa lethu ma keccüna wi methadha. 14Isala kekhuma na shhugho meyi tsü ma nmethaladha. 15Keqhaikediwa na ma ghang kaketsü saneng nu kekhuma ketheü muya lethu ma anyi tsüwa na nmethale khishiaben. Kekhuma ketheü kesü tsüna agükedsakenaa nu anyi tsüna nmetha. 16Isala kekhuma tsü mehaiya nu mekidhi saneng lethu anyi tsüwa na keqhaikediwa wi wa nengben, 17ma anyi tsü ghang kaketsü saneng ben. Tsüna mekidhi sa lethu ma keccüna wi methadha, nu keqhaikediwa na ma methadhale khishiaben.

18Keujüla anyi kesü na avünen pvü nu mawa, 19nu tsaseng wi ma yisü witsü mekidhi ccüccen nyelela nmiemeki shhugho lethu ma keqhaikediwa wi waben. 20Keqhaikediwa na ma ghang kaketsü sa nu ma yisü tsüna ma kevü miwi dhuki nu assen na mekidhi sa wa benla lethu ma anyi tsüna nmethale khishiaben. Hana agükedsakenaa avünen kepvü ben wina shhugho ben. 21Isala keqhaikediwa na ma ghang kaketsü sa kewa wi assen na mekidhi nsa nu ayisü la ma kevü miwi ndhuki, isala mekiza muya lethu keqhaikediwa na anyi tsüpi ghanan tagü ma kepa ben thsüaben. 22Keujüla kekhuma tsüna pvükayi wa lethu, keqhaikediwa na anyi tsüna nmethale khishiaben; ma kekhuma nkemehai pvüden. 23Isala tsüna makesü nu npvükayi lethu, tsüna avünen kesa yisü ketan nu keqhaikediwa na anyi tsüwa na keccüna wi metha benle khishiaben.

24Keujüla anyi kesü na anni wi mecangya nu ma sa mekidhi nyelela nmiemeki sa shagha lethu, 25keqhaikediwa na ma ghang kaketsü saben. Ciwi assen na mekidhi nu ayisü na ma kevü miwi dhuki shagha lethu tsüna anni kemecang yisü wi agükedsakenaa shaghadha, nu keqhaikediwa na anyi tsüna nmethale khishiaben. 26Isala assen na mekidhi nsa nu ayisü la ma kevü miwi ndhuki, isala mekiza benla lethu keqhaikediwa na anyi tsüpi ghanan tagü ma kepa ben thsüaben. 27Keqhaikediwa na tagü ghanan wi ma ghang neng ben, nu tsüna pvükayi wa benla lethu tsüna agükedsakenaa, nu keqhaikediwa na anyi tsüna nmethale khishiaben. 28Isala tsüna makesü nu pvükayi nwa nu ma tsi na mekiza lethu tsüna agükedsakenaa nye. Keqhaikediwa na anyi tsüwa na metha benle khishiaben, kepaghenanye tsüna anni kemecang yisü ketan.

29Nza nyelela npvüza kesü ma li nyelela ma khekhen wi kekhuma shhugho lethu, 30keqhaikediwa na ma ghang kaketsü saben. Keujüla tsüna ma kevü miwi dhuki nu assen na hichuli nu ghapasi sa lethu tsüna agükedsakenaa sadha, nu ma anyi tsüna nmethale khishiaben. 31Keqhaikediwa na ghang kaketsü sa kewa wi kekhuma tsüna ma kevü miwi ndhuki, isala ciwi assen na nmehai lethu ma anyi tsüpi ghanan tagü ma kepa ben thsüaben. 32Keqhaikediwa na tagü ghanan wi ma ghang neng ben, nu kekhuma tsüna pvükayi nwa, assen kehichu nmi, nu ma kevü miwi ndhuki lethu, 33anyi tsüwa na ma kekhuma ben kevü wi assen tsü cah piaben. Tsaseng wi keqhaikediwa na ma pi ghanan tagü ma kepa ben thsü neng shaben. 34Tagü ghanan wi keqhaikediwa na ma kekhuma tsü ghang kaketsü sa neng ben, nu tsüna pvükayi nwa nu ma kevü miwi ndhuki lethu, ma anyi tsüna keccüna wi metha benle khishiaben. Anyiwa tsüna ma thsümeni ghasüthu ma metha aben. 35Isala ma metha benle kekhishi seng wi kekhuma tsüna pvükayi wa lethu, 36keqhaikediwa na ma ghang neng ben. Keujüla kekhuma tsü pvükayi benla lethu ma assen kehichu tsü n-ghanla mehai; anyi tsüna nmethale kesa mutiyadha. 37Isala keqhaikediwa kemeshen wi tsü kekhuma tsü pvükayi nwa nu ciwi assen na mehaitsü shigü ben nu kekhuma na mawa, isalethu keqhaikediwa na anyi tsüna metha benle khishiaben.

38Nza nyelela npvüza kesü na ma gwo wi ayisü mekidhi shhugho lethu, 39keqhaikediwa na anyi tsü ghang kaketsü saben. Keujüla ayisü tsüna nmiemeki lethu tsüna ahyu patena keya yisü ketan; anyi tsüna keccüna wi methaben.

40-41Keujüla anyi kesü na ma tie nyelela ma pfüshan wi alissen nmi lela tsüna ma sapi nmethala saya thsü nben. 42Isala kekhuma nmiemeki kesa na alissen nkemi witsü shhugho lethu tsüna agükedsakenaa kesüdha. 43Keqhaikediwa na ma ghang nu ciwi kekhuma nmiemeki na benla lethu, 44keqhaikediwa na anyi tsüna nmethale khishiaben, kepaghenanye agükedsakenaa na ma li wi bendha.

45Anyi agükedsakenaa kebenwa na athsüqae mphi, ali mehhela, athsü pi ma mmi ssanwa kejibhon pvü, nu “Nkemetha, nkemetha!” tsüti khiben. 46Ma kekhuma tsü keben chu ma nmetha, nu ma nyu nkemi pen wi kemnanpen na ameiwa nhangthu yishü.

Kekhuma ghena Ayenthu

47Agükedsakenaawa na athsümeni, ssenthsü nyelela linen, 48nyelela linen katsüha nyelela ssenthsü nyelela asahyu nyelela asahyu pi kesa katsüha miwi ben lethu, 49tsüna mejjüdhi nyelela nmieni sa lethu, hana agükedsakenaa na pvükayi ben nu pi keqhaikediwa nccücathu yishü. 50Keqhaikediwa na atsanqai tsü ghang kaketsü sa nu tsüpi ghanan tagü ma kepa ben thsüaben. 51Ma tagü ghanan wi tsü ghang neng ben, nu agükedsakenaa tsüna pvükayi benla lethu atsanqai tsüna nmetha. 52Keqhaikediwa na tsüpi mecang shaben, kepaghenanye tsüna kekali wa keten agükedsakenaa ghena anni pi tsü mecang nsathu yishü.

53Isala keqhaikediwa na tsü ghang kaketsü sa kewa wi agükedsakenaa tsüna atsanqai miwi pvükayi nwa lethu, 54ma tsüpi bhu nu pi ghanan tagü ma kepa ben thsü lo ahza khuchiaben. 55Tsaseng wi ma tsü ghang nu agükedsakenaa tsüna pvükayi nwa nu ma tsi la nkemili lela tsüna nmetha; ma kebighe pen tsüna asengwa sale atuwa sa lela nthu na tsüpi anni miwi mecang nsathu yishü. 56Isala keqhaikediwa na tsü ghang neng kewa wi agükedsakenaa tsüna keqha benla lethu, ma tsüna athsü le asahyu lela mezüqhe shaben. 57Tsaseng wi agükedsakenaa tsüna shhugho neng lethu, tsüna pvükayi waben, atsanqai pvüwa na tsüpi mecang nsathu yishü. 58Keujüla ma tsüpi ghasü nu ma yisü nmula lethu, ma kheneng tsüpi ghasü, nu tsüna keccüna wi metha ben.

59Tsalina hawa ha agükedsakenaa na athsümeni, ssenthsü nyelela linen nyelela linen nan nyelela ssenthsü nan nyelela asahyu pi kesa katsüha miwi ben lethu tsüghena ayenwa.

Currently Selected:

LEVIYEN 13: RENGNBSI

Highlight

Copy