JOHAN 8
8
Nza Keqheza Kesü ghankeya
[ 1Isanu mathu tsüdila papa jjen wi wha, isala Jisu na Oliv Yikha wi wa. 2Ma ghanenwa wi mitu na Kekinyijjen wi gho neng. Anyi tsüdila ma vüla donkiya nu ma shagha mathu sansi shhu. 3Ayenkesansithu nu Farisithu na nza kesü qheza keben ghan sengho ma pi mathu tsüdi tuwi ngan thsüa. 4Mathu na Jisu wi khi, “Kesansiwa, nza hawa ha keqheza sa keben ghanya le. 5#Lev 20.10 Ithu na Mosa Yenwa kenie wina alon pi nza hati kesawa ha kecenthi nsathu yishü. No khili khatile khiten nu?” 6Mathu na Jisu kimenni cüle kesalina hati khi pi ma mechu. Isala Jisu na kukedu ma kwenzza pi ayyi wi pala zhü wa. 7Mathu na ma wi keü khvu sa wa kesalina ma shagha nu mathu wi khi, “Nthu jawi thowa na kesami nsa khe ma yala atuwa sa alon pi nzawa kecen tegü thsülo.” 8Ma kheneng kukedu ma kwenzza pi ayyi wi pala zhü wa. 9Mathu na ajüh ha zaya meyi keqhaiwa na wa ghanyiwa kecu meshu kesüsü na tsüdila apen tsü teshi nu bvüa. Nu Jisu ma ketan sa, nu nzawa na ciwi ngan ben. 10Jisu na shagha ma ghang nu khi, “Nzawa, mathu khiewa bvüshandha nu? Thola no nmeshensa ladha kwe?”
11Nzawa na luneng, “Apvüwa, thola tsüti nsale!” Jisu na khi, “Mehaidha, hi la no nmeshensadha. Wa nu nsami nengla yilo.”]
Jisu na Ayyi Kewegüwa
12Jisu na Farisithu wi khineng, “Hi ayyi kewegüwa. Anyi thowa na hi nie ten khe ma kahang kewegüwa wi tsü bendha, nu khiela kejang wi lentsen meyacha.”
13 #
Jhn 5.31
Farisithu na ma wi kiza, “No khili no ketanla nshei khi bendha, nu nsheikepi jüh tsüna atsentsawa nye.”
14Jisu na luneng, “Nyele, hi ketanla isheipi lela isheikepi jüh hana atsentsa, kepaghenanye hi khiewa na gho nu khiewa wa ten khe chüben, isala nthu tsü hi khiewa na gho nu khiewa wa ten khe nchü. 15Nthu na asajjü wina nyu ghan-nan den, hi thola ghan-nan nten. 16Isala keujüla hi nyu ghan-nan lethu hi ghan-nan ketenwa tsüna atsentsa, kepaghenanye hi ketan nyela iBa hi kesun kechiwa na hi ssiden. 17Nthu Yenwa wi hati zhütheng: meshu keni sheikepi jüh tsüna makesü sa lethu, ciwi atsentsa ben. 18Hi ketanla isheipi nu hi kesun kechiwa iBa la isheipi den.”
19Mathu na ma wi keü, “NBa na khiewa ben nu?” Jisu na luneng, “Nthu na hi nu iBa nchü. keujüla nthu na hi chü lethu, iBa la chü kesa.”
20Jisu na Kekinyijjen wi keben kechipen wi nyu sansi nu ha tsüdi khichi. Isala thola ma ghan meya, kepaghenanye ma tsüwa tsüna npi cu.
Nthu na Hi wa keten pen wi Waya Nben
21Jisu na mathu wi khineng, “Hi bvüaben; nthu na hi bhaben, isala nthu na nthu kesami wi shüaben. Nthu na hi wa keten pen wi waya nben.”
22Tsalina Judah nyi kekhang kesenthu na khi, “Ma ikhang na ma wa keten pen wi waya nbenle khiben. Ha mangwa jjügi nu, ma ketanla ma pathia ten la?”
23Jisu na mathu luneng, “Nthu na ayyi hawa ji, isala hi tang wina ghole! Nthu na ayyi ha wina gho, isala hi ayyi ha wina ngho. 24Tsalina hi nthu na nthu kesami wi shüabenle kiza. Nu keujüla nthu na ‘Hi tsüna Hi’ kesa tsü nondi meya lethu, nthu na nthu kesami wi shüaben.”
25Mathu na ma wi “No thowa nu?” tsüti keü. Jisu na luneng, “Hi aghatsan wina mangwa le nthu kizadha nu? 26Hi nthu cüki kekhi-u nu nthu kemeshensa-u kejon na ben, isala hi kesun kechiwa tsüna atsentsa saden nu hi ma wi zakeya ketan pi ayyi nyi kizaden.”
27Mathu Jisu na Abawa cüki khi pi mathu kiza keben tsü nchü. 28Tsalina Jisu mathu wi kiza, “Nthu na Anyi Tsawa tsü zankichi lethu, nthu na ‘Hi tsüna Hi’ kesa tsü chüyaben; tsaseng wi nthu na hi ketanla hi kekhang wina mangla nsala Abawa na hi kekiza ketan khile kesa chüyaben. 29Nu hi kesun kechiwa na hi teshi nsala hi ssi benden, kepaghenanye hi keshüthangla ma kenenwa tsü ketan saden.”
30Anyi kejonla Jisu na hathu kekhi zaya nu ma nondiya.
Anyi Ahvuthu nu Amaghathu
31Tsalina Jisu ma nondi ketenthu wi kiza, “Keujüla nthu na hi kesansi jüh kinaten lethu, nthu na ntsakhiwa hi sansikeyathu. 32Nthu na atsentsawa chüyaben, nu atsentsawa na nthu lisha chi cüaben.”
33 #
Mat 3.9; Luk 3.8 Mathu na luneng, “Ikhang na Abraham shicübvüghathu, nu ikhang na khiewi la nyu maghathu sa nten. Isathu no khati nu ‘Nthu lisha chi cüaben’ khiya mehai nu?”
34Jisu na mathu kiza, “Hi atsentsawa nthu kizaden: anyi kesü le kesü lela kesami kesawa ma kesami magha saben. 35Amagha kesü tsüna anuphanla atheghi jjen wi ben nten, isala atsawa tsüna anuphanla atheghi ji sa benden. 36Keujüla Atsawa na nthu lisha chi cü lethu, nthu na ntsakhiwa lishakeya nyi sayaden. 37Nthu na Abraham shicübvüghathu le kesa hi chüben. Isala nthu na hi pathiale bhaden, kepaghenanye nthu na hi kesansi jüh tsü ya nben. 38Hi iBa pi hi keccücathu tsü khiden, isala nthu na nthu ba na pi nthu kekiza tsü khiden.
39Mathu na ma luneng, “Abraham na ikhang ba.”
Jisu na khineng, “Keujüla nthu na ntsakhiwa Abraham shicübvüghathu lethu, nthu na ma kekuli tsüti kuli kesa. 40Hi Anyiza wi zakeya atsentsawa tsüdi pi nthu kiza le sa, isala nthu na hi pathiale bhaden. Abraham na hati nsa le! 41Nthu na nthu ba kekuli ti saben.”
Mathu na luneng, “Ikhang na Aba kesütan Anyiza ketan ben, nu ikhang na ma tsa ntsathu.”
42Jisu na mathu kiza, “Keujüla ntsakhiwa Anyiza na nthu ba lethu nthu na hi tizen kesa, kepaghenanye hi Anyiza wina gho khili hewi ben. Hi hi kekhang wina ngho, isala ma hi kesun chi le! 43Nthu mangkesa na hi kekhi jüh tsü chüshi meya nu? Tsüna nthu hi ketsijüh tsü nkina mvutha kesa ghena. 44Nthu na nthu ba atsaghang tsangathu, nu nthu na nthu ba kenenwa tsü sa mvuden. Ma adechhü wina nyu kepathi nyi nu ma khiela atsentsawa tsü sa nten, kepaghenanye atsentsawa tsüna ma miwi nmi. Ma milimesa lethu tsüna ma yen kenie wi ghena khiben, kepaghenanye ma milikemesawa nu milikemesa tsüdi bawa. 45Hi atsentsawa pi nthu kekiza ghena nthu na hi n-nondi. 46Nthu thowa na hi sami benle kesa chüben nu? Keujüla hi atsentsawa khi pi nthu kiza lethu, nthu mangkesa na hi n-nondi nu? 47Anyiza wina keghowa na Anyiza jüh kinaden. Isala nthu Anyiza wina nkegho ghena nthu na tsü kina nten.”
Jisu nu Abraham
48Judah nyithu na Jisu keü, “Ikhang na no Samaria nyi nu atsaghang kesü no wi benle kekhi tsüna sazzidha kwe?”
49Jisu na luneng, “Atsaghang na imiwi nmi, hi iBa kinyiküden, isala nthu na hi kinyikü nten. 50Hi ketanla inyankethang bha nten. Isala ciwi anyi kesü na tsü bhaden, nu ma isheikhi nu nyu ghan-nan den. 51Hi atsentsawa nthu kizaden: thowa na ijüh kina ten khe ma khiela shü meyacha.”
52Mathu na ma wi khi, “Ikhang na khili atsaghang kesü no wi ben kesa chüti yadha! Abraham nu atusenjüh-kechüthu la shüdha, isala no anyi thowa na no kesansi jüh kina ten khe khiela shüya nbenle khiben. 53No ithu ba Abraham shü kesawa miwi diki ben kwe? Atusenjüh-kechüthu la shüdha. No thowa le meshen ben nu?”
54Jisu na luneng, “Keujüla hi ketanla inyanthang lethu, tsüna mangla nye. isala inyanthang chi ketenwa tsüna Anyiza, nthu na pi nthu ba le khi ketenwa tsüle! 55Nthu na khiela ma npi chü, isala hi ma chüben. Keujüla hi ma nchüle khithu hi la nthu ti milikemesa nyi saben, isala hi ma chüben nu ma jüh kinaden. 56Nthu ba Abraham na hi gho keten tsüwa ha muya keten ghena anonghe, nu ma tsü muya nu anonghe le!”
57Mathu na ma wi khi, “No kahang mapi deni la npi centhu no Abraham mudha ne?
58Jisu na luneng, “Hi atsentsawa nthu kizaden: ‘Hi’ Abraham npi kepvügha wina ben ghodha.”
59Tsaseng wi mathu na alon khuya nu pi ma kecenthiale sa, isala Jisu na Kekinyijjen wina bvüa.
Currently Selected:
JOHAN 8: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
