JOHAN 2

Kana wi Keshanyikesa

1Ghanan keni seng Galilee yyi wi Kana nyuti wi keshanyi kesü sa, nu Jisu jja la ciwi ben. 2Jisu la ma sansikeyathu ssinu keshanyi kemishu witsü gholo qhechi. 3Kisengtssü zeng kesa seng wi Jisu jja na ma wi, “Mathu kisengtssü nmidha le,” kiza.

4Jisu na ma luneng, “Nzawa, hi no gweghe mangwa saya nu? Itsüwa na npi gho le!”

5Jisu jja na ketsikinathu wi kiza, “Ma mangwa le nthu kiza khe tsü salo.”

6Judah nyi satekemetha yen sa keten kenie wina ciwi alakhü tugho na ben, kesü wi liter meza-u chiya mehai. 7Jisu na mathu wi kiza, “Atssü de pi alakhüthu tsü pongti chilo.” Tsalina mathu atssü de pi alakhüthu tsü pongti chia. 8Tsaseng wi ma mathu wi kiza, “Khili tsü pahan ssuya nu pie wala kemishu wi kediwa cülo.” Tsalina mathu tsü pahan ssu pienu ma wi wa. 9Kemishu wi kediwa na atssü tsü jjü kewa wi tsüna kisengtssü ceng benla, nu ma kisengtssü tsüna khie wina gho khe nchü, (isala atssü tsü ssukeya ketsikinathu na tsü chüben.) Tsalina kemishu wi kediwa na shanyiwa cichi, 10nu ma wi khi, “Anyi tsüdila atuwa sa kisengtssü kemehai pi nyu jjü thsüden, nu mathu na jjü khiya lethu, tsaseng wi ccüna kessaneng pi jjü thsüten le, isala no tsü kisengtssü kemehai ntsawa tsü pi theng nu khili kecu ben man!”

11Jisu na Galilee yyi Kana nyuti wi amankesa kulikechi hawa ha atuwa nu ma ciwi ma nyankethang pi ccücachi nu ma sansikeyathu na ma nondiya.

12 # Mat 4.13 Ha seng wi Jisu na ma jja, ma cünyuthu, nu ma sansikeyathu gweghe Kapernaum wi wa nu ciwi ghanan keu ben wa.

Jisu na Kekinyijjen wi kewa

(Mat 21.12-13; Mrk 11.15-17; Luk 19.45-46)

13 # Bvü 12.1-27 Tsüna Shhukeya Kho kesa tsü cu wa tendha, tsalina Jisu na Jerusalem wi wa. 14Ma Kekinyijjen wi amesü, khaghaneni, nu dukturthu pi jeü nu apisa kemilithu na apisa kemili keben la muya. 15Tsalina ma pala kekihheji kesü saya nu sen wa Kekinyijjen wina khaghaneni, amesü, nu mathu tsüdila jügüshia, nu ma apisa kemilithu pisa kejjü zighe nu mathu miz pakhakulia. 16Nu ma duktur jeü kebenthu wi kiza, “Pala hathu ha sen nu bvülo! Nthu iBa jjen pi asenkesajjen nsa lalo!” 17#Zak 69.9 Ma sansikeyathu na ntsawajüh wi hati khi keten tsü meshenya, “O Anyiza, hi njjen wi lebenkechi tsüna anni ti hi mecang ben.”

18Tsaseng wi Judah nyithu na ma wi keü, “No hati saya kemehai kemeshon keben ghena azensu mangwa pi ithu ccücaten nu?”

19 # Mat 26.61; 27.40; Mrk 14.58; 15.29 Jisu na mathu wi kiza, “Kekinyijjenwa ha yasalo, hi ghanan kecheng jü ketan na sa neng cüa na.”

20Mathu ma wi keü neng, “Amapi jügha nu tugho Kekinyijjen ha sa thengthu, no ghanan kecheng jü ketan saacü ben ne?”

21Isala Jisu na Kekinyijjenwa tsüna ma gwo cüki khiben. 22Tsalina ma keshü wina keshagha seng wi sansikeyathu na ha meshenya, nu mathu na ntsawajüh nu Jisu kekhi jüh tsü nondiya.

Jisu na Anyi Cüki Kechü

23Jisu na Jerusalem wi Shhukeya Kho tsü wi azensuthu kulikechi ghena anyi kejonla tsü muya nu ma nondiya. 24Isala Jisu na mathu meshen pi nmehai, kepaghenanye ma mathu cüki tsüdi chüben. 25Anyi thola mathu cüki khi pi ma nkiza la mehai, kepaghenanye ma ketanla mangwa na mathu leben wi ben khe chüben.

Currently Selected:

JOHAN 2: RENGNBSI

Highlight

Copy