JOHAN 12

Bethani Wi Adeli Pi Jisu Kenyen

(Mat 26.6-13; Mrk 14.3-9)

1Shhukeya Kho npi ghanan tugho tuwi Jisu na ma Lazar sa pi hangneng kecü Bethani nyu witsü wa. 2Ciwi mathu ma ghena kedsakejjü kiden, nu Martha na kugü; Lazar na nyu kepa wi gweghe miz wi donkiben. 3#Luk 7.37-38 Maria na adeli menkedhu ntsa nard pi kesa pahan sengho Jisu ccü miwi zügüchi nu ma lissen pi nyen, isanu adeli han na ajjen maben kepong sa. 4Isala sansikeyathu jawi meshu kesü Jisu matsa ketenwa Iskariot kekhi na, 5“Mangkesa na adeli ha pi akutimen meza kecheng jeü ya nu apisa tsü pi ketha-u cü nsa nu?” 6(Ma ketha-u cüki kemeshen ghena ajüh ha nkhi, isala ma kaghanfü nyi kesü ghena. Ma apisa hikhu tsü pvü nu ciwi ma ghena apisa tsü khuyaya saden.)

7Isala Jisu na khi, “Ma kesasa sa thsülo! Ma mangwa ben khe pi hi kevhü tsathang ghena thengya thsülo. 8#Aye 15.11 Nthu na keshüthangla ketha-u ssi benden, isala nthu na keshüthangla hi gweghe ben nben.”

Acho sa pi Lazar Keshun

9Anyi kejon na Jisu na Bethani wi benle kesa zaya, tsalina mathu Jisu ghena ketan nyela ma keshü wina sa pi hangneng kecüwa Lazar la ghangchile kesalina ciwi wa. 10Tsalina keqhaikedi ntsathu na Lazar la pathiale kesa acho kiden, 11kepaghenanye ma ghena Judah nyi kejon na mathu teshi nu Jisu nondi wa bendha.

Khang ntsa nu Jerusalem wi Kedu

(Mat 21.1-11; Mrk 11.1-11; Luk 19.28-40)

12Dhitsüwa wi anyitenti keti na Jisu na Jerusalem wi Shhukeya Kho kesa witsü gho tenle kesa zaya. 13#Zak 118.25-26 Tsalina mathu na palm chan cüna shhüya nu wa ma metu nu jisha, “Hosanna! Anyiza na sawegü pi Apvüwa nyan wi gho keten Israel Kadimiwa kecüwa salo!” 14Ntsawajüh wi khi keben ti, Jisu na gada zza kesü muya nu tsü miwi donkiya,

15 # Zek 9.9 “Zion nyunutiwa, nmessi lalo!

No Kadimiwa na Gada zza miwi donki nu gho tendha.”

16Ma sansikeyathu na aghatsan wi ha chüshi meya, isala Jisu nyankethang saya ccüla, mathu Ntsawajüh na ma cüki kekhi nu nyu ma miwi kulikechi ha meshenya.

17Jisu na ashüjjen wi Lazar cichi nu keshü wi ma sa pi hangneng kecü wi anyitenti ma gweghe kebenthu na ma sheipichi. 18Tsalina anyitenti na ma azensuthu ha sachile kesa zakeya wi ma metule wa. 19Tsaseng wi Farisithu na khokho wi khi, “Ghangchilo! Ikhang na mangla saya nbendha! Ayyi nyi maben la ma nie wa tendha le!”

Grik Nyithu Pahan na Jisu Kebha

20Jerusalem wi akho tsü wi kinyi kewathu jawi Grik nyi pahan na ben. 21Mathu Filip (Galilee yyi Bethsaida wina keghowa) wi gho nu ma kiza, “Kediwa, ikhang na Jisu ghangchi mvu ben le!”

22Filip na wala Andria kiza, nu manyi gweghe wa Jisu kiza. 23Jisu na manyi wi khineng, “Anyi Tsawa nyanthang yale kesalina matsü na ghodha. 24Hi atsentsawa nshinyi kizaden: asu bi kesü tsüna qancadu ayyi wi npi keshüchi chu tsüna kesütan saben. Isala keujüla tsüna shüchi lethu ma bi kejon bün yaden. 25#Mat 10.39; 16.15; Mrk 8.35; Luk 9.24; 17.33 Anyi thowa na ma kahang tepagha ten khe bhataghaben, isala thowa na ayyi ha wi ma kahang tepagha nten khe noncca pi anuphan kahang wi chiaben. 26Anyi thowa na hi kekuli sa mvu ten khe hi n-niethu yishü, isathu hi kekuli kesa nyi na hi gweghe benyaden. Thowa na hi kekuli saten khe Abawa la ma nyuwaküden.

Jisu na Ma Keshü Cüki Kekhi

27“Khilitsü hi ileben ketizen sa wadha, nu hi khatile khi nu? ‘IBa, matsüwa ha pi imiwi ngho thsü lalo,’ isa khi kwe? Isala hi matsü hawa ghena ghole — tsalina hi ketizenkesa tsüwa wi ha saaden. 28IBa, n-nyankethang sa keyawa salo!” Tsaseng wi tang wina ahhai kesü gho, “Hi anyankethang sa chidha, nu hi tsü sa neng chiden.”

29Anyitenti ciwi ngan kebenthu na tsü zaya nu pahan na tsüna atsankeshigü le khi, nu kepathu na “Tangnyilo kesü ma ccüneng benle!” khi.

30Isala Jisu na mathu wi khi, “Ahhai tsüna ighena nyela nthu ghena ghole. 31Khili ha ayyi nyi jühkaghaten den; khili ha ayyi hawi kekhang kesenthu jügüa tendha. 32Ayyi wi hi zankiya lethu, hi anyi tsüdi zan pi hi wi chiya ben.” 33(Ha kekhi ha ma keshü khati kesa wi shü ten khe pi ccüca kechi.)

34 # Zak 110.4; Isa 9.7; Ezk 37.25; Dan 7.14 Anyitenti na luneng, “Khrista tsüna anuphanla hang benle kesa Ayenwa na ithu kizaben. Isathu, no khati nu Anyi Tsawa tsü zankiya nsathu yishü le khiya mehai nu? Anyi Tsawa tsüna thowa nu?”

35Jisu na luneng, “Kewegüwa na matsü keu nthu jawi benden. Kejangwa na nthu wi ngho thsüle kesalina kewegüwa keben jü ciwi alentsen tenlo; kepaghenanye kejang wi alentsen ketenwa na ma khiewa wa ten khe chü nten. 36Kewegüwa na nthu jawi keben jü tsü nondiyalo, isathu nthu na kewegü tsangathu sayaben.”

Anyithu na Nkenondi

Jisu na ha khichi nu mathu kuthi bvüa. 37Ma mathu jawi azensuthu ha tsüdi sachi lela mathu na ma nondi meya, 38#Isa 53.1 tsalina kheni Isa atusenjüh- kechüwa na kekhi tsü sacen:

“Apvüwa, thowa na ithu ketsijüh ha nondiya nu?

Apvüwa na ma kekhang pi thowa ccücachi nu?”

39Tsalina mathu na nondi meyala, kepaghenanye Isa na hati la khi:

40 # Isa 6.10 “Anyiza na mathu nyon pabhon

nu mathu leben shanbhondha;

isanu mathu nyon pi mu

nu mathu leben pi chüshiya,

nu hi wi kheneng ghothu

hi mathu sa pi mehai cüthu keyishü ghena.”

41Isa na Jisu nyankethang nu ma cüki khi ketheng ghena ma ha khichi.

42Tsüti sa lela Judah nyi kekhang kesenthu kejon na Jisu nondiya; isala Farisithu na Sinagog wi mathu jügüshithu kemessi ghena mangla nkhi la. 43Kepaghenanye mathu na Anyiza miwi anyi kesengwa tsü nen kesalina.

Jisu Jüh wina Ghankenan

44Jisu na jisha nu khi, “Anyi thowa na hi nondi ten khe hi kesun kechiwa la nondiden. 45Nu thowa na hi mu ten khe hi kesun kechiwa la muden. 46Hi kewegüwa sa nu ayyi wi gho, isanu thowa na hi nondi ten khe kejang wi ben meyacha. 47Keujüla kesü le kesü lela ijüh zaya nu tsü n-nondi lethu, hi ma ghan-nan nten. Kepaghenanye hi ayyi nyi meshensale kesawa nyela tsü hangshayale kesa ghena gho. 48Thowa na hi meya mvu nu ijüh kina nten khe ma ghan-nan ketenwa kesü na ben. Hi kekhi jühthu tsüna atsathang sakhen wi ma kaghanwa saben. 49Tsüna ntsakhiwa, kepaghenanye hi ketanla hi kekhang wina nkhi, isala Abawa hi kesun kechiwa na hi nkhithu keyishü pi hi kiza. 50Nu ma khikechi tsüna anuphan kahang senghoden kesa hi chüben. Tsalina hi mangwa khi khe tsüna Abawa na hi khilo kekiza le!”

Currently Selected:

JOHAN 12: RENGNBSI

Highlight

Copy