JOHAN 1

Kahang jühwa

1Adechhü wina ajühwa tsüna benden, ajühwa tsüna Anyiza gwegheden, nu ajühwa tsüna Anyiza. 2Adechhü wina ajühwa tsüna Anyiza gwegheden. 3Pala tsüdila ma wina sachi, nu sachi kethengthu tsü ma wina nkenye kesü la nmi. 4Ajühwa tsüna kahang bvüwa, nu kahang tsüna anyi tsüdi kewegüwa. 5Kewegüwa tsüna kejang wi wegüden, nu kejangwa tsüna ma miwi khang meyacha.

6 # Mat 3.1; Mrk 1.; Luk 3.1-2 Anyi kesü Anyiza wina kesun kechi ma nyan Johan kesa na ben. 7Ma kewegüwa tsü cüki pi anyithu kizale gho nu tsüdila ma wina nondiya thsüle kesalina. 8Ma kewegüwa tsü nye, isala ma kewegüwa tsü cüki pi nyu kizale gho. 9Hawa ha atsentsa kewegüwa — kewegüwa tsüna ayyi wi gho nu anyi tsüdi wegüben.

10Ma ayyi wi hang nu ma wina ayyiwa tsü sachi, isala ayyi nyi na ma nchü la. 11Ma ma nyithu wi gho, isala ma nyithu na ma ssi meya mvu la. 12Isala ma ssiya nu ma nyan nondi keyathu tsüdila Anyiza tsangathu saya kemehai kekhang pi tsüthu cüdha. 13Mathu na asajjü kenen nyelela anyi kenen wina nyela Anyiza kenen wina pvügha yadha.

14Ajühwa tsüna asajjü ceng shagha nu nanketizen nu atsentsawa pi pong pvünu ithu jawi hang. Ithu na ma nyankethang muyadha, nyankethangwa tsüna Atsawa ketan Abawa wina mukeya.

15Johan na jisha nu ma cüki khi, “Hawa ha hi kheni ma cüki khila, ‘Ma iseng wi ghoden, isala ma imiwi diki, kepaghenanye ma itu wina bendha,’ kesawa tsüle.”

16Ma nanketizen pong kimenni kesa wina ithu tsüdila nanketizen mu la mu nengya saben. 17Kepaghenanye Mosa wina ayenwa tsü khuchi, isala nanketizen nu atsentsawa tsüna Jisu Khrista wina gho. 18Anyi kesütanla Anyiza npi muya, Atsawa, Abawa kete wi kebenwa tsü ketan na ma sa pi chüya thsüdha.

Johan Baptizwa Ketsijüh

(Mat 3.1-12; Mrk 1.1-8; Luk 3.1-18)

19Hana Johan sheikepi kekhi: Jerusalem wi Judah nyithu na keqhaikedithu nu Levi nyithu pahan kesun pi Johan wi “No thowa nu?” isa keü thsü.

20Ma nkuthila luneng. “Hi Khrista tsü nyele!”

21 # Mal 4.5; Aye 18.15,18 Mathu na ma wi keü, “Isathu no thowa nu? No Elijah kwe?”

Johan na luneng, “Hi ma la nyele!”

Mathu na kheneng ma wi keü, “No atusenjüh-kechüwa kwe?”

Ma “nyele” khineng.

22Tsaseng wi mathu na ma wi khi, “No thowa khe pi ikhang kizalo. Isathu ikhang na pi ikhang kesun kechithu kiza na. No ketanla no pi thowale khiten nu?”

23 # Isa 40.3 Johan kekhi na,

“Hi ‘meshu kesü agheja wi jishanu,

Apvüwa ghena alen satemeshon yalo,’ kesa

Isa atusenjüh-kechüwa na kekhi tsüle! ”

24Ciwi Farisithu na kesun kechi nyilothu na ben. 25Mathu na Johan wi keü, “Keujüla no Khrista tsü nye, Elijah nu atusenjüh-kechü la nye lethu, no mangkesa na nyu baptaiz saten nu?”

26Johan na mathu kiza, “Hi atssü pi nyu baptaiz saben, isala meshu kesü na nthu jawi ngan keben tsü nthu na nchü. 27Anyi iseng wi gho ketenwa tsü hi ma ccüguwenli la nlisha qo le!”

28Hathu ha tsüdila Jordan Ghaku nishuwa Johan na nyu baptaiz sa keben wi sa.

Anyiza khaghanenizza

29Dhitsüwa wi Johan na Jisu ma tetsaki gho keten muya nu khi, “Ae, Anyiza khaghanenizza ayyi kesami sen nu bvüa ketenwa tsüna ka kale! 30Hawa ha hi kheni ma ghena kekhi, ‘Anyi kesü iseng wi ghoden, isala ma imiwi diki, kepaghenanye ma itu wina bendha,’ kesawa tsü. 31Hi ma nchü, isala Israel nyi yala ma chüya thsüle kesalina hi atssü pi nyu baptaiz sagho le!”

32Nu Johan kekhi na, “Hi tang wi aghamu na nkhetsü ti kesa dugho ma miwi ben wa kea muya. 33Hi ma nchü, isala atssü pi nyu baptaiz salo kesun kechiwa Anyiza na hi kiza, ‘Aghamu na dugho ma miwi ben wa kesa no kemuwa hana ma Kemetha Ghamu pi nyu baptaiz sa ketenwa tsü le.’ 34Johan khi, ‘Hi tsü muyadha, nu ma Anyiza Tsawa tsüle kesa hi nthu kizaben.’ ”

Jisu Sansikeyathu Atuwa

35Dhitsüwa wi kheneng Johan na ma sansikeyathu meshu keni ssinu nganben. 36Ma alentsen nu Jisu ghang nu khi, “Ae, Anyiza khaghanenizzawa ka kale!”

37Sansikeyathu meshu keni na ma tsüti kekhi zaya nu Jisu nie wa. 38Jisu na kheneng manyi na ma nie keten muya nu hati keü, “Nshinyi na mangwa ghang ten nu?” Manyi na ma wi, “Rabbi, (ma jjügi Kesansiwa,) no khiewa hang ten nu?” tsüti keü.

39Ma manyi luneng, “Ghala ghangchilo.” (Tsüna minulen wi amighe mejü kekihhe wi sadha.) Tsalina manyi na ma gweghe wa ma kahang ben muya, nu tsü ghanan ma gweghe ben wa. 40Meshu keni Johan jüh kekhi zaya nu ma nie wa kesa tsü kesü na Simon Pitor cünyuwa Andria. 41Ma atuwa wala ma cünyuwa Simon muya nu ma kizala, “Ishinyi na Messiya (ma jjügi Khrista) tsü muyadha le!” 42Isanu ma Simon ssinu Jisu wi gho.

Jisu na ma ghang nu kiza, “No Johan tsa Simon, no pi Kefa (ma jjügi Pitor) isa ciden.”

Jisu na Filip nu Nathanael Manyi Cikeya

43Dhitsüwa wi Jisu na Galilee wi wale keben wi Filip muya nu ma kiza, “Hi nie ghalo!” 44(Filip la Andria nu Pitor manyi nyu Bethsaida wi kahang nyi kesü.) 45Filip na Nathanael muya nu ma wi kiza, “Ikhang na Mosa yenwa wi nu atusenjüh-kechüthu la ma cüki zhü ketheng Josef tsawa Nazareth nyi Jisu tsü muyadha le!”

46Nathanael na ma keüla, “Nazareth nyu wi la pala kemehai shhughoya mehai kwe? ” Filip na ma wi kiza, “Ghala ghangchilo.”

47Jisu na Nathanael ma wi gho keten muya nu ma ketanla ma cüki khi pi ma kiza, “Ae, Israel nyi ntsawa kesami nkemiwa na he wi ben le!”

48Nathanael na ma wi keü, “No khati nu hi chüya nu?”

Jisu na luneng, “Filip na no npi cikechi wi no khhaghabvü ton ccü wi keben hi no mu le!”

49Nathanael na luneng, “Kesansiwa, no Anyiza Tsawa nu Israel Kadimiwa le!”

50Jisu na ma wi khi, “No khhaghabvü ton ccü wi keben hi no mule kekhi ghena no nondiben ma? No ha miwi pala kedi kejon muyaben.” 51#Ade 28.12 Nu ma manyi wi kiza, “Hi atsentsawa nshinyi kizaden: nshinyi na atssan na sha nu Anyiza nyilothu na Anyi Tsawa miwi ki nu dugho keben muya ben.”

Currently Selected:

JOHAN 1: RENGNBSI

Highlight

Copy