ADECHHÜ 7

Atssüdon Kegho

1Apvüwa na Noah kiza, “Ntheghithu maben ssinu ahunjjen wi duyalo; kepaghenanye hi ayyi wi no ketan ketsatan nyi muyale! 2No aghangsa kemethathu len kepapa kesa wubanyi tagügü isala nkemethathu wubanyi kesüsü ketan kessiya. 3Awathu la alen kepapa kesa wubanyi tagügü kessiyalo. Aghangsa nu awa alen kepapa kesa ayyi wi hang nu mizzasa wa thsüle kesalina tsüti sayalo. 4Ghanan tagü seng wi hi atsankegho kesun pi ghanan jügha nu ghaja jügha ghothsü den, isanu ayyi wi hi sachi ketheng kahangli keben tsüdi dedi thsüaden.” 5Noah na Anyiza ma kekiza tsüdila saya.

6Noah kahang amapi 600 wi atssüdon na ayyi wi gho. 7#Mat 24.38,39; Luk 17.27. Noah nu ma wubvü, ma tsathu nu mathu wubvüthu na atssüdon wina shhuyale ahunjjen non wi duya. 8Aghangsa nu awa len kepapa kesa kemethathu nu nkemethathu lela wubanyi tsüdi, 9Anyiza na khikechi ti Noah gweghe ahunjjen wi duya. 10Ghanan tagü seng wi atssüdon na gho.

11 # 2 Pi 3.6. Noah kahang mapi meza tugho asha keni ghanan tagha nu tagüwa wi ayyi non wi atssü keben pen tsüdila pvükhhi nu tang wi atsanku tsüdila shachi, 12nu ghanan jügha ghaja jügha ayyi wi atsangho thsü. 13Tsü ghanan wi Noah nu ma wubvü manyi tsa kecheng Shem, Ham, nu Jafeth, nu mathu wubvüthu gweghe ahunjjen non wi du. 14Aghangsa nu asahang kepapa kesa, kizza nu keti, nu awathu len kepapa kesa tsüdila ssinu mathu gweghe du. 15Kahangli keben len kepapa tsüdi wubanyinyi na Noah gweghe ahunjjen wi du, 16tsüna Anyiza na khikechi ti sa. Tsaseng wi Apvüwa na ajenka khenya.

17Ghanan jügha atsan na mahandhila gho nu atssüdon na dhu pi ahunjjen na ma mei wi benya kemehai sa. 18Atssüdon jikayi pi dhu ntsa nu ahunjjen na ma miwi ben wa. 19Atssüdon na ji ntsa pi yyishiphon kemisi ntsathu lela donbhon; 20tsüna yyishiphon kemisi ntsathu miwi meter tagü kia. 21Ayyi miwi kahangli keben aghangsa, awa, nu anyi tsüdila shüa. 22Ayyi miwi ahathakissa keten tsüdila shüa. 23Apvüwa na ayyi wi kahangli keben anyi, aghangsa, nu awathu tsüdila dedi thsüa. Noah nu ma gweghe ahunjjen wi kebenthu tsü ketan meyasa. 24Ghanan meza nu deni sa lela ayyi wi atssü na qan nwa.

Currently Selected:

ADECHHÜ 7: RENGNBSI

Highlight

Copy