ADECHHÜ 39

Josef nu Potifar Wubvü

1Ishmael nyithu na Josef ssinu Ejipt wi wa nu ma pi Potifar, kadimi kadipen kehiethu meza miwi kediwa, wi jeü chia. 2#Kek 7.9. Apvüwa na Josef ssiden nu ma sapi haicenya thsüden. Ma Ejipt nyi pvüwa jjen wi hang. 3Apvüwa na Josef ssiden nu kekuli alentagha wila ma sapi haicenya thsüden kesa ma pvüwa na muya. 4Potifar na Josef nenya kesalina pi ma ketsikinawa sa thsü, isanu Josef pi ma jjen wi ma keben tsüdila kenonccawa sa thsüa. 5Tsü nten na Josef ghena Apvüwa na sawegü pi Ejipt nyiwa theghi nu ma jjenlli wi keben tsüdi miwi chi cü. 6Potifar na ma keben tsüdi pi Josef dhenchi, nu ma kedsakejjü tsse ketan khe mangla n-ghangchila.

Josef na akhüton mehai nu atsimehai. 7Matsü keu seng wi ma pvüwa wubvü na Josef ghang pi nenya nu gho ma gweghe jenlo khi. 8Ma male nu nzawa wi khi, “Ghangchilo, hi hewi keben ghena ipvüwa na ajjen wi mangla n-ghangchi ladha. Ma ma keben tsüdi pi hi dhenchi cüdha. 9Hi la ma ti ajjen hawi kekhang ben, nu ma no ma wubvü ghena no ketan khe pala tsüdi pi ikwen wi chidha. Isathu, hi khatinu nkemetha kekuli ha sa nu kesami sapi Anyiza shunya mehai nu?” 10Nzawa na ghanan kaghapen Josef ci lela Josef na wa ma gweghe njen.

11Isala ghanan kesü wi Josef na ajjen wi kekuli sa wa, ciwi amaghathu thola nmi. 12Nzawa na gho ma ghanya nu khi, “Ghola hi gweghe jenlo.” Isala ma ma gwomejuwa teshi pi nzawa kwen wi chi nu akhemi wi bvü shhua. 13Nzawa na Josef ma gwomejuwa teshi chi nu akhemi wi bvü shhu kesa tsü mukeya wi 14ma jjen wi amaghathu cichi nu khi, “Ha ghangchilo! Iwuba na ssi keghowa Ibri nyiwa ha ikhang kimenni ben. Ma hi messameshü le dugho isala hi magha ntsa saya. 15Ma hi magha kechi zakeya wi ma gwomejuwa teshi theng nu akhemi wi bvü shhudha le!”

16Josef pvüwa na ajjen wi npi kegho chu nzawa na ma gwomejuwa tsüpi ma kwen wi thengya. 17Ma tsü cüki makesü khipi ma wuba kiza; “No Ibri nyi amagha ssi keghowa tsüna hi messameshü le hi kejen pen wi dugho. 18Isanu hi magha ntsa saya nan ma gwomejuwa teshi theng nu akhemi wi bvü shhu le!”

19Josef pvüwa na ajüh tsü zakeya wi ma aghepvü ntsa sa, 20nu Josef ghan pi kadimi tssüzüthu pen wi atssüzü sa thsü nu ma ciwi ben wa. 21#Kek 7.9.Isala Apvüwa na Josef ssiden nu sawegü pi ma cü, tsalina atssüzüjjen kediwa na Josef nen. 22Ma Josef pila atssüzüthu tsüdi miwi nu atssüzüjjen kekuli tsüdi miwi kediwa sa thsü. 23Atssüzüjjen wi kediwa na pala pi Josef dhenchi kesathu tsü mangla n-ghang nengla, kepaghenanye Apvüwa na Josef ssiden nu alentagha wi ma sapi haicenya thsüden.

Currently Selected:

ADECHHÜ 39: RENGNBSI

Highlight

Copy