ADECHHÜ 35

Bethel wi Anyiza na Sawegü pi Jakob Kecü

1 # Ade 28.11-17. Anyiza na Jakob wi kiza, “No wa Bethel wi hang walo. Ciwi kekinyipen kesü sapi no kheni ncünyuwa Esau wina bvü keten ntuwi keghowa Anyiza tsü cülo.”

2Tsalina Jakob na tsü khipi ma theghi nu ma gweghe ketenthu tsüdila kiza, “Nthu asang cenpvüthu keben tsü khupi khalalo, nthu samethaya, nu athsümeni ketheü pvüyalo. 3Ithu apen ha teshi theng nu Bethel wi wa tendha, ciwi hi kekinyipen kesü sapi Anyiza igükeccü wi hi kiqa nu hi khiewi wa khe hi ssi keghowa cüden.” 4Tsalina mathu sen keten asang cenpvüthu tsüdi nu mathu khuna thighithu la khupi Jakob cüa. Jakob na tsüthu khupi Shekhem kete wi ayangton kekhu wi chhüvhüa.

5Jakob nu ma tsathu na apen tsü keteshi wi kemessi na anyuti tsü kevü anyithu miwi gho nu mathu Jakob nu ma tsathu jügü nwala. 6Jakob na ma nyithu tsüdi ssinu Kanaan yyi wi khili pi Bethel le khi keten Luz wi ghoya. 7Ma ciwi kekinyipen kesü saya nu apen tsüpi Bethel Nyizawa nyan ci, kepaghenanye ma kheni ma bi wina bvü keten Anyiza na apen ciwi ma tuwi gho. 8Rebeka maghalewa Deborah shü nu pi Bethel na acülawa ayangton cakhu wi vhüa. Tsalina tsüpi “Kiqai yangton” tsüti cia.

9Jakob na Mesopotamia wina kegho wi Anyiza na kheneng ma tuwi gho nu sawegü pi ma cü. 10#Ade 32.28. Anyiza na ma wi khi, “N-nyan na Jakob, isala khili nten pi Israel sa tendha.” Tsalina Anyiza na ma nyan pi Israel ci cüa. 11#Ade 17.4-8. Nu Anyiza na ma wi khi, “Hi kekhang ntsawa Nyiza. Atsanga kejon benyalo. No wina mizzatentithu shhugho ben, nu no kadimithu baqhai saben. 12Hi ayyi pi Abraham nu Isak kecü tsüpi no cüden, nu pi nseng wi nshicübvüghathu la cüden.” 13Tsaseng wi Anyiza na ma teshia. 14#Ade 28.18,19 Ciwi Anyiza na ma keccüneng pen wi Jakob na meshenkeben lon kesü pi sheng, nu kisengtssü nu oliv deli pi tsü miwi zügüchi nu sametha. 15Ma apen tsü nyan pi Bethel cia.

Rachel Keshü

16Jakob nu ma theghi na Bethel teshi nu mathu wa Efrath cule kesa kesiela keben wi Rachel na atsa kepvügha tsü gho, nu aggüsakinaa ghena agüccü ntsa sa. 17Kinaa agüccü ntsa sa keben wi ma kenonccawa na ma wi khi, “Rachel, nmessi lalo, no atsa kesü mu nengyadha.” 18Isala ma shü wa tendha nu ma jüh sakhenwa wi ma tsa nyan pi Benoni #35.18: Benoni; Anyan hawa ha Ibri jüh wina ‘ahathakina tsa’ ci, isala ma ba na ma nyan pi Benjamin #35.18: Benjamin; Anyan hawa ha Ibri jüh wina ‘kemihhi tsa’ cia.

19Rachel na shü nu pi Efrath kewalen wi khili pi Bethlehem le khi keten kete wi tsü vhüa. 20Jakob na ciwi meshenkeben lon kesü pi sheng nu tsüna Rachel shüjjen le kesa nansü kecu lela ben. 21Jakob na apen ketsen sen wa Eder ducü kaghapi wi ma kemnanpen saya.

Jakob Tsathu

(1 Kc 2.1-2)

22 # Ade 49.4. Jakob na ciwi hang keben wi Reuben na ma ba wubvü meshibvüwa Belha ssimehai; Jakob na tsü cüki zakeya wi ma aghepvü ntsa sa.

Jakob ma tsa taghakeni na ben. 23Leah tsathu na Reuben (Jakob tsa keqhaiwa), Simeon, Levi, Judah, Issakhar, nu Zebulun. 24Rachel tsathu na Josef nu Benjamin. 25Rachel maghalewa Belha tsathu na Dan nu Naftali. 26Leah maghalewa Zilpa tsathu na Gad nu Asher. Atsa hathu ha Mesopotamia wi pvüghaya.

Isak Keshü

27 # Ade 13.18. Jakob na Abraham nu Isak manyi kahang pen Hebron kete Mamre wi ma ba Isak wi wa. 28Isak na amapi meza nu achentazen hang. 29Isak na qhai nu shü, nu ma tsa Esau nu Jakob manyi ma chhüvhüa.

Currently Selected:

ADECHHÜ 35: RENGNBSI

Highlight

Copy