ADECHHÜ 2
2
1Tsütinu atssan, ayyi, nu ciwi keben tsüdila sa cenya. 2Ghanan tagüwa wi Anyiza na ma kuli keben tsü sacenya nu atsathang tagüwa wi ma nkulila ngan wa. 3Anyiza na sawegü pi atsathang tagüwa miwi chi nu tsü sametha, kepaghenanye ma sahangchi cenya theng#2.3: ma sahang cenya theng; ma tsü ghanan sahang cenya nu tsü ghanan mnan wa. 4Hatinu atssan, ayyi sahangya.
Eden Sanku
Apvüwa#2.4: APVÜWA: Ibri wi Yahweh, kheni wi tsü zhükemili pi Jehovah isa, ha pi Shüha jüh wi kezhüyen ketiwa pi atuwa sa nu APVÜWA tsüti sen ben. Anyiza na atssan nu ayyi sa kechi wi 5aghanglanithu ayyi miwi nmi nu pala cü mangla npi shhughoya, kepaghenanye ma atsankegho kesun pi ayyi wi npi chi nu thola ciwi ayyiwa tsü npi ca; 6isala atssü manon wina lle shhugho ayyi ten tecca cü.
7 #
1 Kor 15.45. Apvüwa Anyiza na ayyi#2.7: ayyi; Ibri jüh wina ‘anyi’ nu ‘ayyi’ kekhi hhai makesüwi anisha pahan khuya nu tsüpi anyi zhüya; ma kahang khuchi keten hathakissa pi anyi tsüwa mitsan wi chi nu anyi tsüna hang shagha.
8Tsaseng wi Apvüwa Anyiza na nishuwa Eden wi asanku kesü saya; nu ma sahangkeyawa anyi tsüpi ciwi chi. 9#Ccü 2.7; 22.2,14 Apvüwa Anyiza na achanton tsikemehai tsüdi sapi ciwi shigü thsü nu ma bi kemehai bünya thsü. Asanku non wi kahang khuchiketen nu kemehai-keteshi #2.9:kemehai-keteshi; nyelela pala tsüdila chüya keten chüya keten chanton na ben.
10Eden wi aghaku kesü lle shhugho atssü na asanku tsü zügü cüden; ciwi tsüna gishü pi aghaku mejü saben. 11Aghaku atuwa tsüna Pishon; tsüna lle sen nu Havila diyyiwa vüben. 12(Ciwi suna kemetha hankedemvu nu alon menkedhu la muyaden.) 13Aghaku keniwa tsüna Gihon; tsüna lle sen nu Kush #2.13: Kush (Mesopotamia wi); nyelela Ethiopia diyyiwa vüben. 14Aghaku kechengwa tsüna Tigri; tsüna Assiriya nishu lenwa lle waben, nu aghaku mejüwa tsüna Eufrat.
15Tsaseng wi Apvüwa Anyiza na anyi tsüpi Eden Sanku wi chi nu tsü ca nu hie thsü. 16Apvüwa Anyiza na anyiwa wi khi, “No asanku wi kedsau bi tsüdila la dsaya mehai; 17isala kemehai-keteshi chüya keten chan bi tsü ndsala, no tsü dsa lethu tsü ghanan no shüaben.”
18Apvüwa Anyiza na khi, “Anyi tsüwa ma ketan kahang thsü na mejumaghali. Hi ma kaghanpfü kemehai kesü sapi ma kekiqawa sa thsüden. 19Tsalina Apvüwa Anyiza na ayyi wi anisha pahan khuya nu pi aghangsathu nu awathu tsüdila zhüya. Isanu ma tsüthu ssinu anyiwa wi gho nu ma tsüthu nyan pi mangwale citen khe ghang; nu anyiwa na tsüthu pi mangwale ci khe tsüpi ma nyan sa. 20Tsalina anyi na awathu nu aghangsathu tsüdi nyan ci cü; isala tsüthu kesütanla anyi kaghanpfü kemehaiwa sa meya.”
21Tsalina Apvüwa Anyiza na anyi tsü sapi jenchi ntsa wa thsü, nu ma jen keben jü ma menni gü kesü khushiya nu ma yisü meyen bhon. 22Apvüwa Anyiza na amenni gü tsüpi nza kesü zhüya nu ma ssinu npvüzawa wi gho. 23Tsaseng wi npvüzawa na khi,
“Ha hi ti kesa kesü —
Agü la igü, wina khushiya, asa la isa pi saya.
Ma nyan na ‘nza’, kepaghenanye npvüza wina ma khushiya. ”
24 #
Mat 19.15; Mrk 10.7-8; 1 Kor 6.16; Efe 5.31 Tsalina npvüza na ma ba, ma jja teshi nu wa ma wubvü manyi pen waden, nu manyi tsüna asajjü kesütan saden.
25Npvüzawa nu nzawa manyi qho kemissü lela njüghe.
Currently Selected:
ADECHHÜ 2: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
