ADECHHÜ 14

Abram Na Lot Zanshikeya

1Kadimithu mejü: Babylonia wi Amrafel, Elahsar wi Ariok, Elam wi Khedorlaomer, nu Goüm wi Tidal, 2mathu na kadimi kepathu wi manga hathu ha ssinu aghisa: Sodom wi Bera, Gomorrah wi Birsha, Adma wi Shinab, Zeboüm wi Shemeber, nu Bela (Zoar) kadimiwa. 3Kadimithu ha manga mathu apfüwa saya nu Siddim Yyiketijü khili pi Keshü Tssükedone le khi keten wi mathu süpahithu gweghe saghuya. 4Mathu amapi 12 Khedorlaomer cakhu wi ben, isala 13 mapi wi mathu ma ssikaghashen shagha. 514 mapi wi Khedorlaomer nu ma pfüwathu na mathu süpahithu ssigho hathu miwi khangya; Ashteroth Karnaim wi Refaim, Ham wi Zuzim, Kiriathaim, deshentijü wi Emim, 6nu Edom yikha wi Horit nyithu, mathu jügü sen wa Elparan yyikeshü katen kecu chia. 7Tsaseng wi mathu kheneng vüsen Kadesh (Tsü tsüwi Enmishpat) wi gho. Mathu Amalek nyithu yyi tsüdi nkaya nu Hazazon Tamar wi hang keben Amor nyithu miwi khangya.

8Tsaseng wi Sodom Gomorrah, Adma, Zeboüm, nu Bela kadimithu mathu süpahithu ssighu sen nu Siddim yyiketijü wi aghisa wa, 9nu ciwi kadimi kepathu Elam, Goüm, Babylonia, nu Elahsar ssikesali, tsüti kadimi manga na kadimi mejü shun. 10Yyiketijü tsüwa wi zententssü kechhü ku na pong kesalina Sodom nu Gomorrah kadimithu na aghi wina bvüale bvü wa ayyiku wi khuli dua, isala kadimithu kepa kecheng na bvü sen nu ayikha wi wa. 11Kadimi mejüthu na Sodom nu Gomorrah wi pala tsüdi pi kedsakejjü saghu khuya nu pvü bvüa. 12Abram cünyuwa tsa Lot na Sodom wi hangden, tsalina mathu ma keben tsüdila khuya nu ma la ssi bvüa.

13Isala anyi kesü na bvü shhuya nu wala ha cüki tsüdi khi pi Amor nyiwa Mamre ji chan kemetha kete wi hang keten Ibri nyiwa Abram kiza. Mamre nu ma cünyuwa Eshkol, Aner manyi na Abram pfüwa. 14Abram na nyu ma cünyuwa tsa tsü ghanyadha le kesa zakeya wi ma nyu wi aghikesa nyi 318 tsüdi ssiya nu kadimithu mejü tsüdi jügü sen wa Dan kecu chia. 15Ciwi ma nyithu gishü pi akhang kepapa sa nu aghaja na aghinyi ssisa nu mathu miwi khangya. Ma mathu jügü sen wa Damaska na ameiwa Hoba kecu chia, 16nu atsanqai shuya kesathu tsüdila khunengya. Ma cünyuwa tsa Lot nu keben pi wwala nzathu nu atssüzüthu tsüdila ssineng ghoa.

Melkhizedek na sawegü pi Abram kecü

17Abram na Khedorlaomer nu kadimi kepathu miwi khangya nu khenen gho keten wi Sodom kadimiwa na wa Shaveh Yyiketijü (nyelela Kadimiwa Yyiketijü) wi ma metu. 18#Ibr 7.1-10. Salem kadimiwa Melkhizedek Kemisintsa Anyiza ghena keqhaikedi sa kebenwa na amesa nu kisengtssü sengho Abram cü, 19nu sawegü pi ma cü nu khi, “Atssan nu ayyi sakechiwa Kemisi ntsa Anyiza ya sawegü pi Abram kecüwa salo! 20Kemisi ntsa Anyiza na no ya nghinyithu miwi khangya thsü kesawa nyankethangwa salo!” Abram na nyu tsanqai shuya nu khunengya kesa tsüdi wi gishü tagha wi kesü pi Melkhizedek cü.

21Sodom kadimiwa na Abram kiza, “Atsanqaithu pi thengya, isala inyithu tsüdi pi hi cü nenglo.”

22Abram na luneng “Hi atssan nu ayyi sakechiwa, Kemisi ntsa Anyiza, Apvüwa tuwi atsentsa kishen ben, 23hi ntsanqai mangla anan nyelela accüguwenli kesü lela ya nbenle. No ya ‘Hi Abram sapi benya thsü le’ nkhi thsüle kesalina. 24Inyithu na atsanqaithu senkesa tsü ketan khe hi ighena mangla khuya nten. Isala ipfüwathu Aner, Eshkhol, nu Mamre mathu ya mathu shei khuya thsülo.”

Currently Selected:

ADECHHÜ 14: RENGNBSI

Highlight

Copy