BVÜKESHHU 39

Keqhaikedithu Thsümeni Kesa

(Bvü 28.1-14)

1Mathu atsena, nmiepheü, nu ssenthsü kenmie pi kemetha thsümeni saya nu keqhaikedithu na Kemetha Pen wi kekuli kesa wi pvü thsüle kesalina. Apvüwa na Mosa wi khi kechi ti mathu Aaron ghena keqhaikedi thsümeni saya.

2Mathu linen kemehai; atsena, nmiepheü, nu ssenthsü kenmie, nu sunali pi adepfü kewhengthsü sa. 3Mathu na tsü sapi linen kemehai; atsena, nmiepheü, nu ssenthsü kenmie wi chile kesalina suna pha ghapasi cühya nu dendhi pi ma li saya. 4Mathu adepfü kewhengthsü ghena ali keni saya nu pi ma katen ghapeli wi misüki khvu sa. 5Apvüwa na Mosa kekiza ti mathu na atsanqai tsü makesü pi ageshi keqhan mehaitsü degüya nu pi adepfü kewhengthsü wi misüki pi kesütan sa thsü. 6Mathu karnelian lonthu tsü kiden-kesha pi suna tsü vüya; mathu sapichü ntsa sa nu Jakob tsa taghakeni nyan pi ciwi zhükiya. 7Apvüwa na Mosa kekiza ti mathu na tsüthu pi Israel mizza taghakeni mithon wina adepfü kewhengthsü miwi chi.

Adeshi Keqhan Kesa

(Bvü 28.15-30)

8Mathu na adepfü kewhengthsü kesa wi kesen atsanqaithu nu ayakekhu makesü sala adeshi keqhan saya. 9Tsüna ketikesie meceqe, kesie sentimeter 22, kemeza sentimeter 22, sa nu shen pi keni saya. 10Mathu alon menkedhu alen mejü sapi tsü vüya; len atuwa wi rubi, topaz, nu garnet; 11len keniwa wi emerald, safir, nu diamond; 12len kechengwa wi turquois, agat, nu amethist; 13len mejüwa wi beril, karnelian, nu jasper tsüti saya. Hathu ha pi tsü mi zhüten pi ma tsisa theng. 14Alon taghakeni ha kesüsü miwi Jakob tsa nyan kesüsü zhüya nu pi Israel mizza mithon saya. 15Adeshi keqhan ghena mathu sunali tsen sapi kemejüliya. 16Mathu suna khang keni nu suna qei keni saya nu qei keni tsüpi adeshi keqhan ccügwen meiwa miwi tsü chiya. 17Mathu sunali keni tsüpi ma qei keni wi misükiya, 18nu sunali keni ma shi pahanwa tsüpi ma khang keni wi tsü khünkiya, tsüti nu tsüpi adepfü kewhengthsü atuwa misükiya. 19Mathu suna qei keni sapi adeshi keqhan ccügwen ssanwa adepfü kewhengthsü ketsaki katen miwi chiya. 20Mathu hela suna qei keni saya nu pi adepfü kewhengthsü keni atuwa ma shi ageshi keqhan mehaitsü degü ketheng ketsaki miwi tsü chiya. 21Apvüwa na Mosa kekiza ti mathu na atsenali pi adeshi keqhan nu adepfü kewhengthsü qeithu tsü khünghu, isanu adeshi keqhan tsüna ageshi keqhan miwi ben nu nkeqhu thsüla.

Keqhaikedi Kepathu Thsümeni Kesa

(Bvü 28.31-43)

22Adepfü kewhengthsü miwi pongca keben agwomejuwa kaghazu tsü mabenla ssenthsü atsena pi saya. 23Ali ku tsü qae nwa thsüle kesalina athsü kezü pi jekevüliya. 24-26Apvüwa na Mosa kekiza ti ma katen ssanwa maben wi tsü suna tsen pi ahhibvü kuti wina linen kemehai; atsena, nmiepheü, nu ssenthsü kenmie pi ma tsanzü mighe sa kevüliya.

27Mathu na Aaron nu ma tsathu gwomejuwa sa, 28ali kemejuthsü, aliwen, linen patono kenkhangwa, 29nu linen kemehai; atsena, nmiepheü, nu ssenthsü kenmie pi alaweng keqhan sa nu ayakhu pi ma tsi saya, tsüna Apvüwa na Mosa kekiza ti sa. 30Mathu suna tsen pi tsü tsisa nu satemetha kesa zensu “Satemetha pi Apvüwa cüdha” hapi ma miwi jenkiya. 31Apvüwa na Mosa kekiza ti mathu na atsenali pi tsü misüki pi ali kemejuthsü atuwa misükiya.

Kekuli Sacenkeya

(Bvü 35.10-19)

32Apvüwa ketenpen Nithsüjjenwa wi tsü kekuli tsüdila sacenya. Apvüwa na Mosa kekiza ti Israel nyithu na tsüdila saya. 33Mathu na hathu ha sen nu Mosa wi gho: Anithsüjjen nu ma tsanqaithu tsüdi, ma dhasü, ma khuki, ma kenthsüchan, ma zenza, nu ma donbvüthu; 34ma keshan aneni hyu ghang pi nmieni kesa, ma keshan asahyu kemehai pi kesa, keshonthsü; 35alonpha keni na ma non wi keben Cenkethenjüh Khitson, ma kepieji, nu ma keshanthu; 36miz nu ma tsanqaithu tsüdi, nu amesa pi Anyiza kinyi kesa; 37suna tsen pi kesa ahula kedonpen, ma hula, ma tsanqai tsüdi, nu ahula ghena deli; 38suna pi kesa kekinyipen, kenyenji deli, hankedemvu; Nithsüjjen wi kedulen keshonthsü; 39lezza pi kesa kekinyipen nu ma nyagha, ma kepieji, nu ma tsanqaithu tsüdi; kwenkemetsikhu nu ma donbvü; 40shon kevüli keshonthsü, ma zenza nu ma donbvüthu; shon kevüli kedulen keshonthsü, nu ma ssülithu; Nithsüjjen kejetenji, ciwi kesenji tsanqaithu tsüdi; 41nu Kemetha Pen wi kepvüji keqhaikedithu thsümeni kemethathu tsü — keqhaikediwa Aaron nu ma tsathu ghena thsümeni kemethathu. 42Apvüwa na Mosa kekiza ti Israel nyithu na kekuli tsüdila saya. 43Mosa na pala tsüdi ghang wa nu mathu na tsüdi wila Apvüwa na khi kechi ti sa ketheng muya. Tsalina Mosa na sawegü pi mathu cüa.

Currently Selected:

BVÜKESHHU 39: RENGNBSI

Highlight

Copy