BVÜKESHHU 33

Israel nyithu na Sinai yikha teshilo Apvüwa na Ahza khuchi

1 # Ade 12.7; Ade 26.3; Ade 28.13. Apvüwa na Mosa kiza, “No nu no Ejipt wina ssi keshhugho anyithu apen ha teshilo, nu hi ayyi pi Abraham, Isak, Jakob, nu mathu shicübvüghathu cüle khishi ketheng witsü walo. 2Hi tangnyilo kesü kesun pi nlentsütson thsüben, nu hi Kanaan, Amor, Hitti, Periz, Hivi, nu Jebus nyithu jügüshiaben. 3Nthu na ayyi kemehai nu kinyan pen witsü wa tendha. Isala hi nthu gweghe wa nten, kepaghenanye nthu na leben kedhu nyithu nu hi alenca wi nthu yasathu meshü.”

4Anyithu na ha zakeya wi mathu nongü nu mathu alon menkedhu tsanqai npvü la. 5Kepaghenanye hati mathu kizalo Apvüwa na ahza pi Mosa cü theng, “Nthu na leben kedhu nyithu. Hi matsü keujü nthu gweghe wa lethu hi nthu yasatha sa cüben. Khili nthu gwo wi alon menkedhu tsanqai tsü khushi pilo, isathu hi nthu ssinu mangwa saten khe chüyaben.” 6Tsalina mathu Sinai Yikha keteshi seng wi Israel nyithu na alon menkedhu tsanqai tsü npvü neng la.

Apvüwa Na Ketenpen Nithsüjjen

7Israel nyithu na khathansha wi kemnanpen sa khe Mosa na kemetha Nithsüjjen tsü sengwa kemnanpen na ameiwa temeja wi sa. Tsü pila Apvüwa na ketenpen Nithsüjjen isa ci, nu anyi kesüle kesü lela Apvüwa ssinu ccüneng mvu lethu ciwi wa. 8Mosa na khathansha ciwi wa khe anyithu na mathu nithsüjjen jenka wi ben nu Mosa na ciwi npi kedu chu hie. 9Mosa na ma non wi kedu seng wi akulukeshü cü na dugho Nithsüjjen jenka wi benya, nu Apvüwa na akulukeshü wina Mosa ccüneng. 10Akulukeshü cü na dugho Nithsüjjen jenka wi keben muya meyi anyithu na nkhwencadu. 11Apvüwa na ghangti nu anyi kesü na ma pvüshang ccüneng keben ti Mosa ccüneng. Tsaseng wi Mosa na kemnanpen wi ghoneng lela anyi pvünyi kesü ma kiqa keten Nun tsawa Joshua na Nithsüjjen wi ben wa.

Apvüwa Na Ma Nyithu Ssibentenle Khishikechi

12Mosa na Apvüwa wi khi, “Ntsakhiwa no hi anyi hathu ssinu ayyi ciwi walo kizadha, isala no anyi thowa kesun pi hi gweghe wa thsüten khe hi nkizale. No mehaitsü hi chüben nu hi nen benle kesa la kizadha. 13Tsalina keujüla no tsüti lethu khili, no kemeshen pi hi kizalo, isathu hi no kekuli sa nu no kenen saki benden. No pi nji sale mizzatenti hawa ha kessiya kesa tsü la meshen chilo.”

14Apvüwa na khi, “Hi no gweghe waden, nu khangkeya pi no cüden.” 15Mosa na khineng, “Keujüla no ithu gweghe nwa lethu ithu ya apen ha nteshi thsü lalo. 16No ithu gweghe nwa lethu nyu khati nu no hi nu n-nyithu nen benle chüya mehai nu? No ithu gweghe keten tsüna ithu na ayyi nyi kepathu jawi makepa kesale chüyaben.”

17Apvüwa na Mosa kiza, “Hi no kekhie tsüdi saben, kepaghenanye hi no mehaitsü chüben nu no nen kesalina.”

18Tsaseng wi Mosa na khie, “Nchala, hi ya no keten kewegüwa tsü muya thsülo.”

19 # Rom 9.15. Apvüwa na luneng, “Hi kemehai kewegü tsüdila ntuwi wa thsüben, nu no keben wi inyan kemethawa tsü khishi chiben. Hi Apvüwa, hi ketizen pi ccüca nu nanketizen pi hi kessiya kesathu cüden. 20Hi no ya immi muya thsü nten, kepaghenanye anyi thola hi mu nu hangya nben, 21isala he ikete wi apen kesü ben no alon ha miwi nganya mehai. 22Khathansha wi hi keten kewegü tsüna pvüdhi wa khe hi no pi alon miwi chi nu hi npi kewa chu ikwen pi no shanbhon yaben. 23Isanu hi ikwen khuya lethu no isengwa muyaben, isala immi muya nben.”

Currently Selected:

BVÜKESHHU 33: RENGNBSI

Highlight

Copy