BVÜKESHHU 31
31
Apvüwa Ketenpen Nithsüjjen Ghena Sapichüthu
(Bvü 35.30—36.1)
1Apvüwa na Mosa kiza, 2“Hi Judah mizza wi Hur tsawa Uri tsa Bezalel kessiyadha, 3nu hi kekhang pi ma pong cüdha. Hi chüshikeya, sapichü, nu kekuli tsikemehai tsüdila saya kemehai kekhang pi ma cüdha, 4sapichü ntsa sa ma tsisa, nu suna, rükatssü, nu lezza sen nu kuliya kemehai ghena; 5alon menkedhu ha, achan kuho ghena, nu kekuli tsikemehai tsüdila saya kemehai ghena. 6Hi Dan mizza wi Ahisamak tsa Oholiab ya ma gweghe kuli thsüle kessiyadha. Hi sapichü nu kekuli tsikemehai sakeya kekhang pi kepa sapichüthu la tsüdi cüdha, isanu mathu gweghe hi khi kechi tsüdila sa thsüle kesalina; 7hi ketenpen Nithsüjjen, Cenkethenjüh Khitson nu ma keshan, Nithsüjjen non wi keben tsanqai tsüdi, 8miz nu ciwi keben tsanqaithu, suna tsentsa pi ahula kedonpen sa ketheng nu ciwi keben tsanqaithu, hankedemvu pi kemecang ghena kekinyipen, 9mecang pi kekinyipen nu ciwi keben tsüdi, kwenkemetsikhu nu ma kedonpen, 10Aaron nu ma tsathu na keqhaikedi kekuli kesa wi sen keten thsümeni kemetha, 11kenyenji deli nu Kemetha Penwa ghena hankedemvu. Hathu ha tsüdi kesa wi hi no kekiza tsü nieti nu salo.”
Sabbath, Kemnan Tsathang
12Apvüwa na ahza pi Mosa cü, 13nu Israel nyithu kiza thsü, “Sabbath, hi kemnan tsathang tsü nieyalo, kepaghenanye hawa ha hi Apvüwa na nthu satemetha pi inyi sayadha kesa abvüye ghaketen tsüdi wila chüya thsüle kesalina hi nu nthu jüwi azensu kesü sadha. 14Nthu na kemnan tsathang yenwa ha n-niethu yishü, kepaghenanye hawa ha metha. Anyi thowa na tsü n-niela tsü ghanan wi kekuli sa la khe ma pi shü thsülo. 15#Bvü 20.8-11; 23.12; 34.21; 35.2; Lev 23.3; Aye 5.12-14. Nthu na ghanan tugho jüwi nthu kekuli saya, isala tagü ghanan tsüna kemnan tsathang sametha pi hi wi chidha. Anyi thowa na tsü ghanan wi kekuli sa khe ma pi shü thsülo. 16Israel nyithu na atsathang hapi cenkethenjüh zensu sa nu nieden. 17#Bvü 20.11 Hawa ha anuphanla hi nu Israel nyithu jüwi azensu kesü saden, kepaghenanye hi Apvüwa, ghanan tugho jüwi atssan nu ayyi sacen nu tagü ghanan wi nkulila mnanwa.”
18Anyiza na Sinai Yikha wi ajühkhi pi Mosa kiza cen kesa wi Anyiza na alonpha keni miwi ayenkhukechithu zhü ketheng tsüpi ma cü.
Currently Selected:
BVÜKESHHU 31: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
