BVÜKESHHU 25

Kemetha Nithsüjjen Ghena Kinyikechi

(Bvü 35.4-9)

1Apvüwa na Mosa wi khi, 2“Israel nyithu kekinyi sapi hi cülo kizalo. Anyi kesü le kesü lela ma nen nu kekinyi mangwa sachi mvu khe khuyalo. 3Mathu hathu pi kekinyi saben: suna, rükatssü, nu lezza; 4linen kemehai; atsena, nmiepheü, ssenthsü kenmie, aneni ssenthsü kede; 5aneni süpon hyu ghang pi kenmie; asahyu kemehai; akakia chan; 6ahula ghena deli; nyenketen deli nu handemvu ghena cüdemvu; 7karnelian lon nu alon menkedhu pi keqhaikedi depfü kewheng nu deshi keqhan thsü. #25.7: deshi keqhan thsü: matsü kejon tughu wila deshi keqhan thsü tsüna kekinyikü thsü pi adepfü miwi chipvü keten tsü khiben. Tsüna athsü ma men kedhu nu ma tsikesa pi satheng nu pala keni pila ciwi misüki nu tsü sen nu Anyiza kemeshen chüyale sa keten ji Urim nu Thummim 8Anyithu na ighena nithsüjjen kemetha sa nu hi gho mathu jawi hangya kemehai nsathu yishü. 9Hi pi no ccüca keten kenie wina ma yen nu ma tsi la sayalo.

Cenkethenjüh Khitson

(Bvü 37.1-9)

10“Akakia chan pi Akhitson kesü ma kesie sentimeter 110, kemeza sentimeter 66, kemisi sentimeter 66, tsüti sayalo. 11Suna kemetha pi ma non, ma mei, nu ma katen tsüdila meju kevüli yalo. 12Tsü kepieji suna qei mejü saya nu tsüthu pi ma ccü mejü wi chiya, qei kenini pi kawa hewa chiya. 13Akakia chan pi kepiechanthu sa nu suna pi tsüthu mejuya, 14nu tsüthu pi Akhitson miwi ma qeithu wi tsü ghechiya. 15Kepiechanthu tsü nkhushi la nu pi ma qeithu wi ghechi pi thenglo. 16Tsaseng wi hi pi no cü keten alonpha keni miwi ayenkhukechithu zhü ketheng tsüpi Akhitson non wi chiya.

17 # Ibr 9.5. “Suna kemetha pi ma keshan kesie sentimeter 110, kemeza sentimeter 66 saya. 18Suna pi cherubim keni cühya, 19kesüsü pi ma keshan katen ghapeli wi chile kesalina. Tsü keni pi ma keshan wi zhüghu pi kesütan sa thsü. 20Cherubim keni tsüna ma keshan miwi kepegheli nu manyi gisha zanshigü pi tsü whengbhon yathsü. 21Alonpha keni tsü pi Akhitson non wi chi nu ma keshan pi shanlo. 22Hi cherubim keni ma keshan keben jüwi gho no metuden, nu iyenthu tsüdi Israel nyithu ghena khukechi tsüpi no cüden.”

Amesa Pi Anyiza Kekinyi Ghena Miz

(Bvü 37.10-16)

23Akakia chan pi miz kesü ma kesie sentimeter 88, kemeza sentimeter 44, nu kemisi sentimeter 66, tsüti cühyalo. 24Suna kemetha pi tsü mejuya nu ma katen la meju kevüliya. 25Füghancü kesa kesü ma kemeza milimeter 75 saya nu suna pi tsü ma katen mejuya. 26Kepieji suna qei mejü sapi ma ccügwen mejü wi ma ccü keben pen wi tsü chi. 27Miz piekile kesa ghena kepiechan pi chile kesa qeithu tsüpi füghancü kesa kete wi chi. 28Kepiechanthu tsü akakia chan pi sa nu suna pi tsüthu mejuya. 29Kisengtssü pi kekinyi kesa wi senle kesalina akhu, ahyi, afü, nu akhuzzathu sayalo. Hathu ha tsüdila suna kemetha pi saben. 30#Lev 24.5-8. Miz tsüpi Cenkethenjüh Khitson tuwi chi, nu hi kekinyi kemetha mesa tsüna keshüthangla pi miz miwi theng ben. #25.30: Apvüwa na ketenpen Nithsüjjen; Ajüh jjügi wi ghangchi.

Ahula Pi Kedonpen

(Bvü 37.17-24)

31“Suna kemetha pi ahula kedonpen kesü saya. Ma bvü nu ma kukhithu tsü suna pi cühya; ma tsikesa thighethu, kebvüjjen nu ma tsangthu pi tsü zhüghu pi kesütan sa thsü. 32Ma cüna tugho na ma katen ghapeli wi kechengcheng chang wa ben. 33Ma cüna tugho qho kesüsü wi tsikesa thighe kecheng tsüna mcüshüli kebvüjjen nu ma tsangthu saghu pvü keben tsi ti kesa. 34Ahula kedonpen kukhiwa wi tsikesa thighe mejü tsüna mcüshüli thighe kebvüjjen nu ma tsangthu saghu pvü keben tsi ti saben. 35Ciwi kebvüjjen kesü na ma cüna kechengcheng kesa keni kekhu wi ben. 36Kebvüjjen, ma cüna, nu ahula kedonpenthu tsü suna kemetha pi cüh pi zhüghu pi kesütan saya. 37Ahula tagü canki pi ahula kedonpen wi chi nu tsüthu ya atuwi wegü yathsü. 38Kemecangqae nu ma khala kechipenthu tsü suna kemetha pi saya. 39Ahula kedonpen nu tsü tsanqaithu tsüdi kesa ghena suna kemetha kilogram changha nu manga senlo. 40#Kek 7.44; Ibr 8.5. Hi ayikha wi mayen pi no keccüca tsü kenie wina mehaitsü tsüthu tsü sayalo.”

Currently Selected:

BVÜKESHHU 25: RENGNBSI

Highlight

Copy