BVÜKESHHU 19

Israel nyithu Sinai Yikha wi kewa

1Mathu na Ejipt teshi nu asha kechengwa ghanan atuwa wi Israel nyithu na Refidim teshi nu wa Sinai yyikeshü wi ghoya. 2Ciwi mathu na Sinai Yikha ccü wi kemnanpen saben, 3nu Mosa na ayikha wi Anyiza metule ki.

Apvüwa na ayikha wina ma cichi nu ma wala Israel nyithu, Jakob shicübvüghathu wi khilo ma kiza: 4“Nthu na hi Apvüwa Ejipt nyithu miwi mangwa sachi nu hi nthu pi amumu na ma zza kaghanie pi ma gisha kekhu wi chipvü keten ti nthu ssi shhugho hi wi chiya kesa muyadha. 5#1 Pi 2.9. #Aye 4.20; 7.6; 14.2; 26.18; Tit 2.14. Khili nthu keujüla ijühkina nu hi cenkethenjüh tsü nie lethu nthu na inyithu saden. Ayyi mabenla iji, isala nthu na hi kessiya kesa nyithu saden, 6#Ccü 1.6; 5.10. sametha pi hi wi chikeya nyi, nu nthu na keqhaikedithu sala hi kekuli saden.” 7Tsalina Mosa na cü anyithu ccülikesathu cighu chi nu Apvüwa na ma kekiza tsüdi pi mathu kizachia. 8Isanu anyithu tsüdila gweghe nu khineng, “Ithu na Apvüwa kekhi tsüdila saden,” nu Mosa na tsüpi Apvüwa wi kiza neng chia.

9Apvüwa na Mosa kiza, “Hi akulukeshü jang ntsa kesa non wina gho no ccüneng den, isanu anyithu na ihhai zaya nu khili nten na no nondi wa tendha.” Mosa na anyithu khati luneng khe khipi Apvüwa kiza, 10nu Apvüwa na ma kiza, “Wala anyithu wi kekinyi ghena nansü nu dhitsü wi mathu sametha yalo kizalo. Mathu athsümeni ghasü nsathu yishü, 11nu pitsü wi kiden-kesha yalo. Tsü ghanan wi hi Sinai Yikha miwi dugho den, nu anyi tsüdila hi muya mehai. 12Ayikha tsü vüla aggü sa nu anyithu ya tsü nthenkeghe thsüla, nu mathu thola ayikha wi nkila nyelela ma kete wila nwa lalo kizalo. Keujüla anyi kesüla accü pi tsü miwi nne lethu ma pi shü thsüaben; 13thola ma nkidhenla alon pi kecenthi nyelela alakusü pi ma ghonthi nsathu yishü. Hawa ha anyi le asahang lela tsüti kesawa tsü pi shü thsüaben. Isala khathansha wi tutuwa khouchi khe anyithu na ayikha wi kilo.”

14Tsaseng wi Mosa na ayikha wina dugho nu anyithu wi wa kekinyi ghena kiden yalo kiza. Tsalina mathu na athsümeni ghasüya, 15nu Mosa na mathu wi khi, “Pitsü wi tsü kiden-keshaya, nu nza npvüza yen nsa lalo.”

16 # Ccü 4.5. #Aye 4.11,12. Pitsüwa ghanen wi atsanshigü nu atsancwe sa, nu akulukeshü jang ntsa gho ayikha tsü kejiya nu tutuwa kekhou hhai misi ntsa kesa za. Kemnanpen wi anyi tsüdi messi pi kedheggü wa. 17Mosa na kemnanpen wina mathu ssinu Anyiza metule mathu wa ayikha ccü wi nganben. 18Annikekhu na Sinai Yikha tsüdila shübhon gho, kepaghenanye Apvüwa na anni wina ciwi dugho. Annikekhu na anni kejon kemecang nikhu ti tang wi ki, nu anyi tsüdila messi pi kedheggü ntsa sa. 19Tutuwa kekhou hhai misi ntsa sa. Mosa na khi nu Anyiza na atsankeshigü wina ma jüh luneng. 20Apvüwa na Sinai Yikha shoni wi dugho nu Mosa cipi ciwi chi. Mosa na ciwi ki 21nu Apvüwa na ma wi kiza, “Cüla anyi thola aggü tsü pvüdhi gho hi n-ghang lalo kesa mathu kitsan chilo; keujüla mathu na tsüti sa lethu mathu kejon na shüaben. 22Keqhaikedithu lela mathu sametha ccüla ikete wi nghothu yishü nyelethu hi mathu metenmesha ben.”

23Mosa na Apvüwa kiza, “Anyithu hewi kegho nben, kepaghenanye no ikhang ya ha pi sa kemetha yikha sa nu aggü sapi vü thsü kesalina.”

24Apvüwa na luneng, “Cüla Aaron ssinu no gweghe shhugholo. Isala keqhaikedithu nu anyithu na aggü pvüdhi sen nu hi wi kegho yishü, isalethu hi mathu metenmesha ben.” 25Tsaseng wi Mosa na cüla anyithu wi Apvüwa na kekhi tsüpi mathu kiza.

Currently Selected:

BVÜKESHHU 19: RENGNBSI

Highlight

Copy