KEKULI 8

1Saul na kesau wina Stefan tsü pathile sa.

Saul na Kemehu Kemeten-kemesha

Tsü ghanan nten na Jerusalem wi kemehu na kemeten-kemesha wi ketizen sa ntsa shagha . Nu apostelthu ketan khe kenondithu tsüdila Judea nu Samaria yyi tsüdi wi bvü zighe bvüa. 2Kenondithu pahan na Stefan pie wa vhü nu ma ghena qai. 3#Kek 22.4-5; 26.9-11 Isala Saul na kemehu yasa cüle keten. Ma ajjen tsüdi wi wa kenondithu npvüza le nza lela zanshiya nu mathu pi atssüzüjjen wi chia.

Jühtheü Kemehaiwa pi Samaria wi Kesansi

4Kenondithu na bvü zighe sen wa apen tsüdi wi kesansijüh tsü pi khi wa. 5Filip na Samaria ghazen nyunutiwa wi wa nu Khrista cüki pi anyithu sansi. 6Anyitenti na Filip na mangwa khi khe kina ntsa sa, anyi tsüdila ma jühkina nu ma azensuthu kekuli tsü mu. 7Nkemehai ghamuthu na anyi kejon wina magha sen nu shhugho; kecügüshü nu accü nkemehaithu kejon la sa pi mehai cü. 8Tsalina anyunuti tsüwa wi anyithu na anonghe ntsa sa.

9Ciwi anyi kesü ma nyan Simon na ben, ma matsü pahan wi kedema pi Samaria nyithu madeja pi amansa. Ma ketanla ma pi kedi nyi saden, 10isanu anyi anyunuti ciwi kahangthu tsüdila ma jüh kinaden. Mathu khi, “Anyi hawa ha Anyiza kekhangwa ‘Kekhang Ketiwa’ tsü le khiden.” 11Matsü kesiela ma kedema pi mathu madeja thsü kesalina mathu na ma mangwale khi khe tsü kinaden. 12Isala mathu na Filip na Anyiza Kadiyyi Jühtheüwa nu Jisu Khrista cüki kekhi tsü nondiya, nu mathu npvüza le nzathu lela baptaiz saya. 13Simon la nondiya nu baptaiz sakeya seng wi ma Filip gweghe ben wa. Ma Filip na amankesa nu azensuthu kuli keben tsü mu pi amansa.

14Jerusalem wi apostelthu na Samaria nyithu la Anyiza jüh yaya bendha le kesa zaya, tsalina mathu na Pitor nu Johan manyi kesun pi mathu wi chia. 15Manyi na wa cu keya wi kenondithu yala Kemetha Ghamu muya thsüle kesalina mathu ghena kekhie sa. 16Kepaghenanye Kemetha Ghamu na mathu miwi npi gho; mathu na Apvüwa Jisu nyan wi ketan baptaiz sa pvüben. 17Tsaseng wi Pitor nu Johan manyi na akwen chang pi mathu miwi chi, nu mathu na Kemetha Ghamu muya. 18Simon na apostelthu akwen chang pi kenondithu miwi kechi wi mathu na Aghamu mukeya tsü mu. Tsalina ma apisa pi Pitor nu Johan manyi cü, 19nu khi, “Kekhang ha pi hi la cülo, isanu hi ikwen chang pi thowa miwi chi khe ma yala Kemetha Ghamu muya thsülo.”

20Isala Pitor na ma wi khi, “No npisa tsü sen nu annighajü wi wa kesawa salo, kepaghenanye no Anyiza ju khukechiwa tsü apisa pi sheiya benle meshenben! 21Kekuli ha wi nkuti nyelela nshei mangla nmi, kepaghenanye Anyiza tuwi nleben nmeshon. 22Nkemehai kemeshen ha wina nleben khapegheya nu Apvüwa wi khielo, isathu ma no hati kemeshen wi no kesami teshi cüben. 23Kepaghenanye no nkemehai anyonghokepvü pi no pong pvü nu kesami tssüzü sa keben hi muben.”

24Simon na Pitor nu Johan manyi wi khi, “Nshinyi kekhi hathu ha kesütanla imiwi ngho thsüle kesalina ighena kekhie sa cülo.”

25Pitor nu Johan manyi na manyi sheikepijüh nu Apvüwa ketsijüh pi kekhi seng wi Jerusalem wi wha neng. Manyi wha keten alenca wi Jühtheü Kemehaiwa pi Samaria nyu kejon wila nyu sansi.

Filip nu Ethiopia nyi Kedi

26Apvüwa nyilo kesü na Filip wi kiza, “Shagha kidenya nu Jerusalem wina Gaza wi kewa len acülawa wi tsü walo.” (tsüna alenman sadha.) 27Tsalina Filip na kidenya nu wa. Ciwi Ethiopia nyi kedi kesü Ethiopia kadijja keben kenoncca wi kemechan nyi kesü na Jerusalem wi Anyiza kinyi wa nu ajjen wi whaden. 28Ma gorugari miwi na wha keten wi Isa atusenjüh-kechüwa lesüshen tsü siben. 29Kemetha Ghamu na Filip wi kiza, “Gorugari katsüwa tetsaki whalo.” 30Filip na tsü tetsaki wha nan anyi tsüna Isa atusenjüh-kechüwa lesüshen tsü si keben zaya. Tsalina Filip na ma wi keü, “No no si keben tsü chüben ma?”

31Kedi tsüwa na luneng, “Nyu ha khimetha pi hi nkiza lethu, hi khati nu tsü chüya nu?” Isanu ma Filip ci pi ma gweghe gorugari miwi donkiya thsüa. 32#Isa 53.7-8 Ma Ntsawajüh si keben tsüna ha:

“Ma pathiale ssi wa keten khaghaneniwa tsüti kesa,

ma khaghaneni ma kenyen ce lela

nmaghala kebenwa tsüti.

Ma ajüh kesüla nkhi.

33Ma kimenni nu ma miwi kemeshonwa tsü nsala.

Anyi thola ma shicüthu cüki khiya nben,

kepaghenanye ayyi wi ma kahang sakhen sadha.”

34Kediwa na Filip wi keü, “Atusenjüh-kechüwa na ha thowa cüki khiben khe pi hi kizalo. Ha ma ketanla ma cüki la nyu kepa wi cüki nu?” 35Tsaseng wi Filip na khi; ma Ntsawajüh ha wina khiwa Jisu cüki Jühtheü Kemehaiwa pi ma kiza. 36Manyi gweghe wala atssü keben apen kesü wi ghoya nan kediwa na khi, “Ghangchilo, he wi atssü pahan ben le! Mangwa na hi baptaiz sale kesa khen ben nu?” 37Filip na ma wi khi, “Keujüla no nleben tsüdi pi nondi ben lethu, no baptaiz saya mehai.” Ma luneng, “Anle, hi nondi ben! Jisu Khrista hana Anyiza Tsawa le kesa hi nondi ben.”

38Kediwa na ma gorugari khen pi ngan thsü nu Filip nu kediwa manyi gweghe atssü wi dula Filip na ma pi baptaiz saya thsü. 39Manyi atssü wina shhugho meyi Apvüwa Ghamu na Filip ssi bvüa nu kediwa na ma nmula, isala ma anonghe ntsa nu wa. 40Filip na Azota wi ghoya, nu ma Kaesarea wi wa, ma alenca wi Jühtheü Kemehaiwa pi anyuti tsüdi wi nyu sansi.

Currently Selected:

KEKULI 8: RENGNBSI

Highlight

Copy