KEKULI 5

Ananiya Nu Safira Manyi

1Isala ciwi anyi kesü ma nyan Ananiya nu ma wubvü Safira manyi na keben pahan pi jeü ya. 2Isala ma wubvü manyi kemeshen kesü sa nu apisa pahan pi manyi ghena thengya nu pahan ketan sengho apostelthu kwen wi chia. 3Pitor na ma wi khi, “Ananiya, no mangkesa na Satan yala nmiwi khang thsü nu Kemetha Ghamu tuwi milimesa nu no keben pi jeü keya pisa pahan pi thengya nu? 4Keben tsü pi npi kejeü wi tsüna nji, nu pi kejeü seng wi lela apisa tsüna nji nye kwe? Isathu, mangkesa na no nleben wi hati meshen ten nu? No anyi tuwi nyela Anyiza tuwi milimesadha!” 5Ananiya na tsü zaya meyi khulidu shü wa; nu tsü cüki zakeyathu tsüdila qhethiketen sa. 6Anyi pvünyithu na gho ma kamang mejuya nu pie wa vhüa.

7Amighe kekihhe kecheng seng wi ma wubvü na tsüti sa kesa tsü nchüla ciwi gho. 8Pitor na ma wi keü, “Hi kizalo, no wubanyi na keben pi kejeü men ha maben haju kwe?”

Safira na luneng, “Anle, tsüna maben le!”

9Tsalina Pitor na ma wi kiza, “Mangkesa na no wubanyi na Kemetha Ghamu mechu le cen ten nu? Nwuba pie wa vhü kesathu na khili ajenka wi ngan ben, nu mathu na no la pie bvüaden!” 10Zuli ma Pitor tuwi khulidu shü wa. Anyi pvünyithu na gho ma shükea muya nu ma la pie wa ma wuba shüjjen kete wi vhüa. 11Kemehu maben nu kepathu ha cüki za keyathu tsüdila qhethiketen sa.

Azensu Nu Amankesathu

12Apostelthu na anyithu jawi azensu nu amankesathu kejonla saben. Kenondithu tsüdila gho Solomon Ccühha wi kemetuli. 13Anyithu na mathu kemehai cüki khi lela kepa wi thola ghola mathu gweghe messiya. 14Isala Apvüwa kenondithu nza nu npvüza anyitenti na ghola ji pfüpfü mathu wwaya. 15Apostelthu na tsüti kuli kechi ghena nyu na kesakinaathu pie wa alen wi awe nu awekeshiphi miwi chi nu Pitor na ciwi kewa wi ma ghayen yala mathu miwi gho thsüle sa. 16Anyi anyutithu nu Jerusalem kete wi kahangthu na kesakinaathu nu nkemehai ghamu mathu miwi kebenthu ssinu gho, nu mathu tsüdila sa pi mehai cüa.

Apostelthu Kemeten-kemesha

17Tsaseng Keqhaikedi ntsa nu ma pvüshangthu, nu Sadukithu pahan na apostelthu miwi anyonsa ntsa sa kesalina mathu miwi ajühkaghaten le cenya. 18Mathu na apostelthu ghanya nu pi atssüzüjjen wi chia. 19Isala tsü ghaja Apvüwa nyilo kesü na ghola atssüzüjjen jenkathu sha nu apostelthu ssi shhula akhemi wi mathu kiza, 20“Nthu Kekinyijjen wi wa nu shagha la kahang ketheü ha cüki tsüdi pi anyithu kizalo.” 21Apostelthu na tsü kina nu thangtheghi keshagha wi wala Kekinyijjen wi nyu sansi shhu.

Keqhaikedi ntsa nu ma pvüshangthu na Judah nyi ccülikesathu cighu chi pi hoho keccünengli ben, nu mathu na nyu kesun chi pi wa atssüzüjjen wi apostelthu ssigho mathu tuwi ngan thsüle sa. 22Isala kedithu na atssüzüjjen wi gho nan apostelthu mu meya, tsalina mathu kheneng wa hoho wi kiza chia. 23“Ikhang na wa atssüzüjjen mehaitsü khen ketheng nu aghikehiethu la ajenkathu hie keben mu, isala ikhang na ajjen shadu nan thola nduku wi keben nmu le!” 24Keqhaikedi ntsathu nu Kekinyijjen ghikehiethu na ha zakeya wi apostelthu miwi khati sadha nu meshen pi mathu mansa. 25Tsaseng wi anyi kesü ghola mathu wi kiza, “Kinalo! Nthu anyi pi atssüzü sa thsü kesathu tsüna wala Kekinyijjen wi nyu sansi bendha le!” 26Tsalina Kediwa na ma nyithu ssi wala apostelthu nbhenla ssinu gho neng, kepaghenanye mathu na nyu alon pi mathu kecenthi kesa messi.

27Mathu na apostelthu ssi ghola hoho tuwi ngan thsü, nu Keqhaikedi ntsawa na pala pi mathu keü. 28#Mat 27.25 Ma khi, “Ikhang na nthu anyi hawa nyan pi nyu nsansi lalo kesa kiza ntsa sadha, isala nthu na kesansijüh tsü pi Jerusalem pongdha, nu nthu na anyi hawa keshü tsü pi ikhang miwi chi mvu ben.” 29Pitor nu apostel kepathu na luneng, “Ikhang na anyi miwi Anyiza jühwa nkinathu yishü ben. 30Ithu bamyithu Nyiza na nthu na ghan pi kross miwi jen kesawa Jisu tsü keshü wina sa pi hang cüdha. 31Israel nyithu yala leben khapeghe nu kesami keteshi muya thsüle kesalina Anyiza na Jisu zanki pi ma kwen ajewa chiya nu ma pi Kadimiwa nu Hangshawa sa thsüdha. 32Nu ikhang na hathu chüzathu— tsüna ikhang nu Anyiza na ma ju khuchi pi ma jühkina ketenthu kecü Kemetha Ghamuwa tsü.”

33Mathu na ajüh ha zakeya wi mathu lebentsu ntsa nu apostelthu pi shü thsüale cenya. 34Isala mathu jawi Farisi kesü ma nyan Gamaliel, ayenkesansiwa nu anyi tsüdila ma kinyikü ketenwa na hoho wi ngan shagha nu matsü keujü apostelthu ssinu akhemi wi shhuben lalo khi, 35nu ma mathu wi khi, “Hi Israel nyithu, nthu na anyi hathu miwi mangwa sale ben khe kiden-kesha yalo. 36Kheni kuti tsüwi Theuda na ma ketanla ma pi kedi nyi sa nu anyi meza mejü na ma wwaya. Isala ma pathi nu ma senkeniethu tsüdila bvü zighe, nu ma kekuliwa tsü la nmila. 37Tsaseng wi nyanzhüghu tsüwi Judah Galilee nyiwa na gho nu anyi kejon na ma nie wa, isala ma la pathi nu ma senkeniethu tsüdila bvü zighe shan. 38Tsalina hi khili ha jjügi ghena nthu kizaben, anyi hathu miwi mangla nsa lalo. Mathu teshi chilo! Kepaghenanye keujüla mathu na meshen nu kuli kebenwa hana anyi kekuli lethu nmila ben; 39isala Anyiza wina kegho lethu, mathu cha nben. Nu nthu ketanla nthu na Anyiza shun keben muya ben.”

Mathu na Gamaliel kesansijüh tsü kinaya. 40Mathu na apostelthu cichi nu mathu kihhe nu mathu na Jisu nyan khi pi nyu nsansi nengla yilo kesa kizachi. Isanu mathu na apostelthu teshi chia. 41Apostelthu na Anyiza mathu la pi Jisu nyan wina ketizenkesa qo nyi kesa tsü ghena anonghe ntsa sa nu hoho tsü teshia. 42Mathu atsathang wila nhandhila Kekinyijjen wi nu nyu jjen wi Jisu, Messiya cüki Jühtheü Kemehaiwa tsü pi nyu sansi.

Currently Selected:

KEKULI 5: RENGNBSI

Highlight

Copy