KEKULI 3

Accü Nkemehai Nyi Kesü sa pi Mehaikeya

1Ghanan kesü Pitor nu Johan manyi minulen amighe kecheng kekihhe kekhie kesa tsü wi Kekinyijjen wi wa. 2Ciwi anyi kesü ma kahang chu accü nkemehai na ben. Mathu na atsathangla ma pie gho Khweti-jenka Tsikemehaiwa wi tsü chi nu ma yala nyu Kekinyijjen wi kewathu wi kuwhe thsüden. 3Anyi tsüna Pitor nu Johan manyi na Kekinyijjen wi du keten muya nu manyi wi pala khie. 4Manyi anyi tsü ghang nu Pitor na khi, “Ishinyi ghanglo.” 5Tsalina ma manyi wi pala pahan muya ben she meshen nu manyi ghangchi. 6Pitor na ma wi kiza, “Hi suna rükatssü mangla nmi, isala hi mangwa ben khe pi no cüden; Nazareth nyiwa Jisu Khrista nyan wina shagha nu alentsen walo!” 7Isanu ma anyi tsüwa kwen ajewa zan nu ma zankichi. Tsü meyi anyi tsüwa ma ccü nu ma kwen na zü shagha; 8ma penshagha nganya nu alentsenwa. Tsaseng wi ma manyi gweghe Kekinyijjen wi wa nu penshagha alentsen nu kephenki nu Anyiza seng. 9Anyi tsüdila ma alentsen keten muya nu Anyiza seng, 10nu mathu na anyi tsüwa tsüna Khweti-jenka Tsikemehaiwa wi donki nu kuwhe ketenwa tsüle kesa chüya, mathu tsüdila ma miwi khati sa khe tsüghena amansa ntsa sa.

Pitor Na Kekinyijjen Wi Ketsijüh Kekhi

11Anyi tsüna Solomon Ccühha wi Pitor nu Johan manyi gweghe keben ghena anyi tsüdila amansa nu bvü sen nu mathu wi wa. 12Pitor na anyithu mu keya wi ma mathu wi khi, “Hi Israel nyithu, nthu mangkesa ha ghena amansa nu ikhang ghangben nu? Nthu kemeshen tsü ha ishinyi kekhang kemehai wina anyi ha sa pi alentsenya thsüle ben kwe? 13#Bvü 3.15 Abraham, Isak, nu Jakob Nyiza, nu ithu baqhaithu Nyiza na ma maghawa Jisu nyankethang sa kechi. Nthu na ma ghan pi kekhang kesenthu kwen wi chia, nu Pilat na ma teshi chiale sa lela nthu na Pilat tuwi na ma meya mvula. 14#Mat 27.15-23; Mrk 15.6-14; Luk 23.13-23; Jhn 19.12-15 Ma metha nu tsatan, isala nthu na ma meya mvula, nu nthu na Pilat wi nthu kenenwa anyi kepathi nyi tsü lisha chi cüa. 15Nthu na ma wina kahang keghowa tsü pathia; isala Anyiza na keshü wina ma sa pi hangnengya thsüa— nu ikhang na ha ghena chüzathu. 16Hawa ha Jisu nyan kekhang wina kezü pi anyi accü nkemehaiwa ha kecü. Nthu na mu nu chü kebenwa hana ma nyan kenondi wina saya; Ha Jisu kenondi wina nthu tsüdi tuwi hati ma sa pi mehai cüdha.

17“Icünyuthu, nthu nu nthu ccülikesathu na Jisu miwi kuli kechi tsüna nkechü ghena le kesa hi chüben. 18Anyiza na kheni wi atusenjüh- kechüthu wina Khrista na ketizen saben kesa khi ketheng tsü hati nu cenya thsüdha. 19Tsalina leben khapegheya nu Anyiza wi gholo, isathu ma nthu kesami teshi pi cüben na. 20Isanu Apvüwa wina aghamulen wi sa ketezü matsü na ghoben, nu ma nthu ghena kessikeyawa Jisu, pi Messiya le ci ketenwa tsü kesun chi cüben. 21Anyiza na kheni ma atusenjüh-kechü kemethathu wina khi ketheng pala tsüdila sa pi ketheü sa keten matsü na npi kegho chu ma tang wi nbenthu yishü. 22#Aye 18.15,18 Kepaghenanye Mosa na khitheng: ‘Apvüwa nthu Nyiza na atusenjüh-kechü kesü kesun pi nthu wi chi cüben; ma hi kesun kechi ti, ma nthu nyi kesü saben. Ma pala pi nthu kekiza tsüdila nsathu yishü. 23#Aye 18.19 Anyi thowa na atusenjüh-kechüwa tsü jüh nkina khe Anyiza nyithu jawi na ma kepa sa nu pi yasaben.’ 24Atusenjüh- kechüthu, Samuel nu ma seng wi keghothu tsüdila ketsijüh-khi nu shita-ghanen mangwa saben khe tsü cüki la khi. 25#Ade 22.18 Atusenjüh-kechüthu wina Anyiza jühkhukechi tsüna nthu ghena, nu Anyiza na nthu bamyithu ssinu cenkethenjüh wi tsü nthu shei la ben. Ma Abraham wi kekhi ti, ‘Nthu shicübvüghathu wina hi sawegü pi ayyi nyi tsüdi cüben.’ 26Anyiza na nthu tsüdila nkemehai len wina kheneng gho nu kesawegü pvüyalo kesalina ma ma maghawa kessiya nu atuwa kesun pi nthu wi chicüle.”

Currently Selected:

KEKULI 3: RENGNBSI

Highlight

Copy